Chunka mandamientukuna
20
Tayta Diosmi nirqan:2 “Noqami Tayta Diosniki kaykä. Egiptucho wätay kanqaykipitami jipimushqä.
3 “Ama juk dioskunamanqa yärakunkitsu.
4 “Ama ima ïdulutapis rurankitsu ciëlucho kaykaq niraqta, kay patsacho kaykaq niraqta ni lamar rurincho kaykaq niraqtapis. 5 Tsaykunamanqa ama qonqurikunkitsu ni adorankitsu.† Noqallami [munayyuq] Tayta Diosniki kaykä. Noqallata adoramänaykitami munä. Mana cäsukamar ïdulukunata adoraqkunataqa castigashä kikinta, tsurinta, willkanta y shurukta willkanta. 6 Noqata kuyamar mandamientükunata cumpliqkunatami itsanqa kuyaparnin juk waranqa (1,000) generación kayanqanyaq yanapashä.†
7 “Ama llutallaqa Tayta Diosnikipa jutinta joqarinkitsu. Jutinta llutalla joqariq kaqtaqa castiganqami.
8 “Ama qonqankitsu jamay junaq sagrädu kanqanta.† 9 Semänacho soqta junaq arur llapan ruranaykipä kaqkunata ruranki. 10 Qanchis kaq junaqchöqa Tayta Diosnikita adorar ama arunkitsu.† Tsaynölla ama arutsinkitsu ollqutapis warmitapis tsurikikunata, ollqutapis warmitapis wätaynikikunata, uywaykikunata ni nacionnikicho jäpa runakunatapis. 11 Tayta Diosmi ciëluta, kay patsata, lamarta y llapan imaykatapis soqta junaq kamaskir qanchis kaq junaqcho jamarqan. Tsaynö jamanqanpitami tsay junaqta bendisarnin sagrädu junaq kananpä churarqan.†
12 “Mamaykita y taytaykita respitanki.† Tsaynöpami Tayta Diosniki rikatsishunaykipä kaq nacioncho atska wata kawanki.†
13 “Ama runa mayikita wanutsinkitsu.†
14 “Ama majaykita qanratankitsu.†
15 “Ama suwakunkitsu.†
16 “Ama manakaqkunata pitapis tumpankitsu.†
17 “Ama runa mayikipa wayinta munapankitsu. Tsaynölla ama munapankitsu warminta, ollqu wätayninta, warmi wätayninta, törunta, ashnunta, ni imaykankunatapis”.†
Israel runakuna mantsariyanqan
18 Tsay hörami Israel runakuna wiyayarqan maqakuy bunrurunqanta y cornëtata tukamunqanta. Tsaynöllami illaqukamunqanta y jirka qoshninqanta rikayarqan. Tsaymi pasaypa mantsarir karullapita rikaräyarqan. 19 Tsaychömi Moisésta niyarqan: “Tayta Dioswan parlamunaykipä qamlla ayway. Tayta Dios nishunqaykita willayämaptiki llapantami cäsukuyäshä. Noqakunata Tayta Dios parlapäyämaptinqa wanuyäshächir”.†
20 Tsaynö niyaptinmi Moisés nirqan: “Ama mantsariyaytsu. Tayta Dios shamushqa munayyuq kanqanta tantiyar jutsata mana rurayänaykipämi”.
21 Nirkurnami runakuna karullapita rikaraykäyaptin Tayta Dios kaykanqan yana pukutayman Moisés witsarqan.
Altarta imanö rurayänanpä tantiyatsinqan
22 Tsaypitanami Moisésta Tayta Dios nirqan: “Israel runakunata niy: ‘Tayta Diosmi nin: Ciëlupita parlamunqätami wiyayashqayki. 23 Ama qoripita ni qellaypita adorayänaykipä diosnikikuna rurayankitsu.
24 “ ‘Allpapita altarta noqapä ruraskir üshata, cabrata, wäkata o töruta karpis rupatsina sacrificiupä y alli päsakuy sacrificiupä rupatsiyanki. Maychöpis adorayämänaykipä ninqä kaqcho tsaynö rurayaptikimi noqa shamur bendicionnïta qamkunaman churamushä. 25 Noqata adorayämänaykipä altarta pirqarqa llaqllanni rumikunallawan pirqayanki.† Llaqllashqa rumikunawan pirqayaptikiqa manami allitsu kanqa. 26 Tsaynöpis grädayuqta ama rurayankitsu. Grädayuqta ruraykur witsäyaptikiqa penqaynikikunami rikakanqa’ ”.