Israel runakuna Sinaí tsunyaq jirkaman chäyanqan
19
Egiptupita yarqurmi kimsa killata Sinaí tsunyaq jirkaman Israel runakuna chäyarqan. 2 Tsayman chäyänanpämi Refidimpita yarqayämurqan. Sinaí tsunyaq jirkaman chaykurmi jirka chakincho patsakuyänanpä toldunkunata shäritsiyarqan. 3 Nirkurmi Tayta Dioswan tinkunanpä jirkaman Moisés witsarqan. Tsay jirkapita qayamurmi Moisésta Tayta Dios nirqan: “Israel runakunata willar niy: 4 ‘Qamkuna rikayashqaykimi Egipto runakunata imanö ushakätsinqätapis. Musyayankimi noqaman yärakayämänaykipä qamkunata imanö qorikunqätapis. Wawankunata anka apanqannömi qamkunatapis Egiptupita apamushqä.5 “ ‘Tsaymi llapan ninqäkunata cäsukayämar qamkunawan pactu ruranqäta cumpliyaptikiqa wakin runakunapitapis mas kuyayäshayki. Llapan kay patsacho taq runakunata kamashqa karpis qamkunatami mas kuyayäshayki.† 6 Qamkunataqa nacionninpami sirvimaq sacerdötikunanö kayänaykipä churayäshayki. Tsaymi santu kar noqallata sirviyämanki’.† Tsay llapan ninqäta Israel runakunata willay”.
7 Tsaymi Moisés kutiykur mayor runakunata qoriskir Tayta Dios ninqankunata willarqan. 8 Tsaynö willaptinmi Israel runakuna niyarqan: “Tayta Dios ninqantaqa llapantami rurayäshä”.
Paykuna awniyaptinmi jirkaman kutiykur Tayta Diosta Moisés willarqan.†
9 Tsaynö willaptinmi Moisésta Tayta Dios nirqan: “Israel runakuna wiyayänanpämi yana pukutay rurinpita parlapäshayki. Tsaynöpami imaypis criyiyanqa qamta parlapanqäta”.
Israel runakuna awniyanqanta Tayta Diosta Moisés willaptinmi 10 Tayta Dios nirqan: “Aywar runakunata willanki kanan y waray junaqpis purificakuyänanpä† y latsapankunata taqshakuyänanpä. 11 Kananpita kimsa junaqtami llapan rikaykäyämaptin Sinaí jirkaman urämushä. Tsaypä kamarikushqalla shuyäyämätsun.
12 “Runakuna jirkaman mana witsäyämunanpä jirka chakinman señalta tumaypa churanki. Tsaynölla willanki tsayman pipis mana witimunanpä. Mayqanpis tsay señalta päsaq kaqqa wanutsishqami kanqa. 13 Runa o uywa kaptinpis mana yatayllapa saqmaypa o flëchaypa wanutsiyanki. Cornëtata tukamunqanta wiyarrämi señal kanqanyaq runakuna witsäyämunqa”.†
14 Tayta Dios tsaynö niptinmi Sinaí jirkapita Moisés urarqan runakunata kamarikatsinanpä. Tsaymi runakuna kamarikur latsapankunata taqshakuyarqan. 15 Tsaychömi runakunata Moisés nirqan: “Warantin junaqpä llapayki kamarikuyay. Tsay paqaskunaqa warmikikunatapis ama yatapäyankitsu”.
16 Tsaypita kimsa junaqta patsa waraskiptinmi illaqukuypis maqakuypis† karqan. Tsaymi yana pukutay jirkata tsapaskirqan. Tsaynöllami cornëtata tukamunqanpis wiyakämurqan. Tsaymi llapan Israel runakuna mantsarir pasaypa tsuktsukyäyarqan. 17 Tsaypita Tayta Dioswan tinkuyänanpä runakunata Moisés pushaptinmi jirka chakillancho shuyaräyarqan. 18 Sinaí jirkaman nina rurincho Tayta Dios urämushqa kaptinmi jornupitanörä yana qoshni shärirqan.† Jirkapis pasaypami tsuktsukyarqan. 19 Cornëtata tukamunqanpis mas jinchi mas jinchimi wiyakämurqan. Tsaychömi Moisés parlapaptin maqakuynörä Tayta Dios contestamurqan. 20 Sinaí jirkaman Tayta Dios urämurmi tsayman witsänanpä Moisésta qayarqan. Tsaymi jirkaman Moisés witsarqan.
21 Tsaychömi Tayta Dios nirqan: “Kaypita kutir runakunata willay rikamayta munar señalpita mana päsayämunanpä. Señalta päsamuq kaqqa llapanmi wanuyanqa. 22 Ñöpäman shamuq sacerdötikunapis purificakuyätsunrä. Mana purificakuyaptinqa paykunatapis wanutsishämi”.
23 Tsaynö niptinmi Tayta Diosta Moisés nirqan: “Señalpita pipis mana päsamunanpämi kikiki nimashqayki. Kay sagrädu Sinaí jirkamanqa runakuna manami witsäyämunqatsu”.
24 Tsaymi Tayta Dios nirqan: “Aywar wawqiki Aarónta pushakurkur kutimunki. Paqtä sacerdötikunapis runakunapis señal churanqaykipa päsamur noqa kaykanqäman witsäyämunman. Päsamuq kaqtaqa llapantami ushakätsishä”.
25 Tsaymi jirkapita Moisés uraskamur Tayta Dios ninqankunata runakunata willarqan.