2 Mas puntallatanami Moisésqa warmin Séforata taytan kaqman kutinanpä despacharqan. Chaykuptinmi Jetruqa tsurin Séforata 3 ishkan wawankunatawan chaskirqan.^† Juklä markacho tashqa karmi jukaq wamranpa jutinta Moisés churarqan Gersónta.^{a †} 4 Jukaqpanami jutin karqan Eliezer.^b Tsay jutita churarmi nirqan: “Faraón wanutsimänanpä kaykaptinmi taytä yärakunqan Tayta Dios yanapamar salvamashqa”.

5 Tsay witsanmi tsunyaq jirkacho Israel runakunawan Moisés patsaraykäyarqan Tayta Dioswan tinkuna jirka cercancho^†. Tsaymanmi willkankunata y Séforata pushashqa suegrun Jetro charqan. 6 Chaykurmi Moisésta nirqan: “Hïju, warmikita y tsurikikunata pushakurkurmi watukaqniki shamushqä”.

7 Moisésnami suegrun Jetruta chaskir qonqurikuykur winchikurnin mutsarqan. Imanö kaykanqanta parlaskirmi toldunman yaykuyarqan. 8 Tsaychömi suegrunta Moisés willarqan Israel runakunapa janan shärir Faraónta y Egipto runakunata qatiparnin aywaqkunata Tayta Dios ushakätsinqanta. Tsaynöllami willarqan Egiptupita yarqamur nänicho ñakayanqanta y imanö Tayta Dios yanapanqantapis.

9 Egiptupita Israel runakunata Tayta Dios jipimunqanta willaptinmi Jetro pasaypa kushikur 10 nirqan: “Tayta Dios alabashqa kaykullätsun. Paymi Faraónpa munaynincho kaykäyaptiki y Egipto runakuna ñakatsiyäshunqaykipita jipiyämushushqayki. 11 Egipto runakuna contrayki kaykaqta vincishqa kaptinmi tantiyä llapan dioskunapitapis Tayta Dios mas munayyuq kanqanta”.

12 Tsaymi Jetruqa uywata pishtaskir Tayta Diospä sacrificiuta rupatsirqan. Wakin uywakunatapis Tayta Diospa ñöpancho^c pishtarmi Aarónwan y Israel mayor runakunawan aytsata mikuyarqan.

13 Tsaypita waraynin junaqnami Israel runakuna quejakuyanqanta arreglananpä Moisés jamakurqan. Tsaymanmi tutapita tardiyaq quejakuq aywayarqan.

14 Moisés qoyat arreglaqta rikarmi suegrun nirqan: “Tutapita tardiyaq ¿imanirtä quejakuyanqanta japallayki arreglaykanki?”

15 Tsaynö niptinmi Moisés nirqan: “Tayta Diosta mañakur arreglanäpämi Israel runakuna shayämun. 16 Imallatapis rimanakuskir noqamanmi shayämun mayqanpis jutsayuq kanqanta arreglanäpä. Nirkurnami Tayta Diospa estatütunkunata y leyninkunata tantiyatsï”.

17 Tsaymi suegrun Jetro nirqan: “Noqapa tantiyaynïpitaqa alläpami tsaykunaman jatikaykanki. 18 Tsaynölla karqa pasaypami utikanki. Tsaynöllami runakunapis ajayäyanqa. Tsaytsika runakunataqa manami japallayki arreglayta kamäpakunkitsu. 19 Kanan yätsinqäta shumaq wiyamay. Yätsinqänö ruranaykipä Tayta Dios yanapaykulläshuy. Tayta Diosta mañakur runakunata arreglanqaykiqa allimi kaykan. 20 Tsaynöllami Tayta Diospa estatütunkunata y leyninkunata yachatsinqayki alli kaykan. Tayta Dios munanqannö kawayänanpä yachatsinqaykipis allimi. 21 Tsaynö kaptinpis yanapayäshunaykipä formal runakunata akray. Paykuna kayätsun Tayta Diospita mantsapakuq, mana llullakuq y mana chaskipakuq. Paykunapita wakinta churanki juk waranqa (1,000) runakunapa jueznin kananpä, wakintana churanki juk pachak (100) runakunapa jueznin kananpä, wakintana churanki pitsqa chunka (50) runakunapa jueznin kananpä y wakintana churanki chunka runakunapa jueznin kananpä. 22 Tsay juezkunanami ima quëju kaptinpis arreglayanqa. Arreglayta mana kamäpakuyanqallantanami qamman apayämunqa. Tsaynö yanapayäshuptikiqa manami alläpa utikankinatsu. 23 Tayta Dios kamakätsiptin yätsinqänö ruraptiki valorniki kanqarämi. Quejakuyanqanta shumaq arreglayaptinmi llapan runakunapis kushishqa wayinman kutikuyanqa”.

24 Moisésqa suegrun yätsinqannöllami llapanta rurarqan. 25 Tsaymi formal runakunata akraskir wakinta churarqan juk waranqa (1,000) runakunapa jueznin kananpä, wakintana churarqan juk pachak (100) runakunapa jueznin kananpä, wakintana churarqan pitsqa chunka (50) runakunapa jueznin kananpä y wakintana churarqan chunka runakunapa jueznin kananpä. 26 Tsay juezkunanami runakuna quejakuyanqanta qoyay qoyay arreglayaq. Arreglayta mana kamäpakuyanqantami itsanqa Moisés arreglananpä apayaq.

27 Tsaypitanami Moiséspita despidikurir markanpa suegrun kutikurqan.