Qaqapita yaku yarqamunqan
17
Sin niyanqan tsunyaq jirkacho taykäyanqanpitami Tayta Dios ninqannölla Israel runakuna patsakur patsakur Refidim partiman chäyarqan. Tsaychöpis yaku manami karqantsu. 2 Tsaymi Moisésta runakuna ajashqa niyarqan: “Kaychöqa ¿ima yakutatä upuyäshä?”Niyaptinmi Moisés nirqan: “ ‘Yaku manami kantsu’ niyämaptikipis ¿imatatä rurashä? ¿Imanirtä Tayta Diosta obligayta munaykäyanki yakuta kamaripäyäshunaykipä?”
3 Moisés tsaynö niptinpis runakuna pasaypa yakunarmi qayapar niyarqan: “¿Kaynö ñakatsiyämänaykipäku Egiptupita jipiyämashqayki? ¿Llapan wamräkunata y uywäkunata yakunaypita wanutsiyämänaykipäku jipiyämashqayki?”
4 Runakuna tsaynö niyaptinmi Tayta Diosta mañakur Moisés nirqan: “Taytay, kay runakunawan ¿imatatä rurashä? Tsaynölla karqa saqmaykällarmi wanutsiyämanqa”.
5 Tsaymi Moisésta Tayta Dios nirqan: “Juk ishkay Israel mayor runakunata pushakurkur llapan runakunapa ñöpanta ayway. Nilo mayuta wirunqayki tukruykita apay. 6 Horeba jirka qaqachömi shuyäshayki. Tsay qaqata tukruykiwan wiruptikimi yaku yarqamunqa llapan runakuna upuyänanpä”.
Tsaymi Moisésqa Tayta Dios ninqannölla Israel mayor runakuna rikaykäyaptin rurarqan.
7 Tsay partipa jutintami churarqan Masahb y Meriba.c Tsay jutikunatami churaparqan Israel runakuna descontentu kar “¿noqantsikwan Tayta Dios kaykanku o manaku?” niyanqanpita.
Amalecita runakunata vinciyanqan
8 Israel runakuna Refidimcho taykäyaptinmi amalecita runakuna aywayarqan paykunata atacayänanpä. 9 Tsaymi Josuéta Moisés nirqan: “Amalecita runakunawan pelyaq aywanaykipä runakunata akray. Waray tutami jirkacho kaykäshä Tayta Dios ‘apay’ nimanqan tukrü aptashqa”.
10 Moisés ninqannöllami Josuéqa runakunata akraskir amalecita runakunawan pelyaq aywarqan. Moisés, Aarón y Hurnami jirkaman witsäyarqan. 11 Ishkan rikranta Moisés joqariraptinmi Israel runakuna amalecita runakunata vinciyaq. Rikrankuna utikaptin Moisés bäjatsiptinnami amalecita runakuna vinciyaq. 12 Tsaynö utikaptinmi Aarónwan Hur Moisés jamananpä rumita churapäyarqan. Nirkurmi ishkanläpa Moiséspa rikranta joqariräyarqan rupay jeqanqanyaq. 13 Tsaynöpami Josué y akranqan runakuna espädankunawan wanutsir amalecita runakunata vinciyarqan.
14 Tsaypitanami Moisésta Tayta Dios nirqan: “Kay pelya kanqanta mana qonqäyänanpä juk rölluman qellqay. Amalecita runakunata chipyaq ushakätsinäpä kanqanta Josuéta willay”.†