Manáta y codornizta Tayta Dios qaranqan
16
Elim partipita aywakurmi Israel runakuna Sin niyanqan tsunyaq jirkaman chäyarqan. Tsayqa kaykan Elimpita Sinaíman aywaqchömi. Tsayman chäyarqan Egiptupita yarquyanqanpita juk killa y chunka pitsqa junaqtami. 2 Tsay tsunyaq jirkachömi Israel runakuna Moiséspa y Aarónpa contran shärir 3 niyarqan: “Egiptullachöna Tayta Dios wanutsimashqa allimi kanman karqan. Tsaychöqa pacha juntami mikurqantsik. Aytsapis mankantsikkunacho manami pishirqantsu. Qamkunaqa mallaqaypita wanutsiyämänaykipämi kay tsunyaq jirkaman pushayämashqayki”.4 Tsaynö niyaptinmi Moisésta Tayta Dios nirqan: “Ciëlupitami imayka tamyatanö mikuyta mashtamushä.† Tsay junaq mikuyänanpä tinkulla runakuna qoyay qoyay tsayta qoriyätsun. Ninqänö qoriyaptinmi musyashä cäsukayämanqanta. Ninqäpita masta qoriyaptinmi itsanqa musyashä mana cäsukayämanqanta. 5 Soqta kaq junaqchöqa ishkay junaq mikuyänanpä tupulla qoriyätsun”.
6 Tsaymi Moiséswan Aarón Israel runakunata niyarqan: “Kanan tardimi musyayanki Egiptupita kikin Tayta Dios jipiyämushunqaykita. 7 Tsaynöpis waray tutami Tayta Dios munayyuq kanqanta rikayanki. Payqa musyanmi contran parlaykäyanqaykita. ¡Noqakunapa conträ parlayänaykipäqa pitä kayä!”
8 Mastami Moisés nirqan: “¿Imanirtä conträ parlaykäyanki? Qamkunaqa manami noqakunapatsu conträ parlaykäyanki, sinöqa Tayta Diospa contranmi. Paymi wiyashqa contran shäriyanqaykita. Tsaynö kaptinpis kanan tardimi aytsata mikunantsikpä kamaripämäshun. Waray tutanami mikuyta kamaripämäshun”.
9 Tsaypitanami Aarónta Moisés nirqan: “Tayta Diosmi wiyashqa Israel runakuna contran parlayanqanta. Kanan Israel runakunata willay Tayta Diospa ñöpanman qorikäyänanpä”.
10 Israel runakunata Aarón parlapaykaptinmi tsunyaq jirkalächo Tayta Diospa chipipiyninta pukutaycho rikayarqan.
11 Moiséstami Tayta Dios nirqan: 12 “Israel runakuna conträ parlayanqantami wiyashqä. Kanan paykunata willar niy: ‘Tardipami aytsata mikuyanki. Tutapanami mikuyta pacha junta mikuyanki. Tsaynöpami musyayanki Tayta Diosnikikuna kanqäta’ ”.
13 Tsay tardimi atska codornizkuna Israel runakunapa campamentun kanqanman juntäyarqan. Patsa waraskiptinnami campamentu ñöpankunapapis yuraqayparä shullya warämurqan.† 14 Shullya tsakiskiptinnami rashtanörä patsa yuraqararqan. 15 Tsayta rikar Israel runakuna ima kanqantapis mana musyarmi jukninpis jukninpis niyarqan: “¿Imarä kayqa?”†
Tsaymi Moisés nirqan: “Kayqa Tayta Dios kamaripämanqantsik mikuymi. 16 Tayta Diosmi nishqa: ‘Cada junaq mikuyta ushayänaykipä tinkulla qoriyanki. Aykaqpis tolduykicho kayanqaykillaman cada ünuykipä ishkay mati juntatanö qoriyanki’ ”.
17 Tsay ninqannöllami Israel runakuna qoriyarqan. Wallkaqlla karqa wallkallatami qoriyaq. Atskaq karqa atskatami qoriyaq. 18 Matiwan tupuyllapami qoriyarqan. Atskata qoriyaptinpis manami ujurqantsu. Wallkallata qoriyaptinpis manami pishirqantsu.† Cada ünunmi tsay junaq mikuyänanpä tinkulla qoriyarqan.
19 Tsaymi Moisés nirqan: “Mayqaykipis waray junaqpäqa mikuyta ama churayankitsu”.
20 Tsaynö nikaptinpis wakinqa mana cäsukurmi waraynin junaqpä mikuyta churakuyarqan. Tsay churayanqan mikuy waraynin junaq rikaykuyänanpäqa pasaypa kururmi asyarqan. Tsaymi mikuy churakuqkunata Moisés pasaypa ollqutuparqan.
21 Tsaypitaqa mikuyta ushayänanpä tinkullanami cada tuta jukninpis jukninpis qoriyaq. Mana qoriyanqan kaqtaqa achaymi tsulluratsiq. 22 Soqta kaq junaqchömi itsanqa ishkay junaq mikuyänanpä qoriyarqan. Tsaymi cada ünun qoriyarqan chusku mati juntata. Tsaynö qoriyaptinmi mayor runakuna Moisésta willaq aywayarqan. 23 Tsaymi Moisés nirqan: “Tsaynö qoriyänanpämi Tayta Dios nishqa. Waray junaqqa Tayta Diosta adoranantsikpämi jamay junaq.† Tsaymi waray kusinakuyänaykipä kaqtaqa tardillapana kusinakuyanki y timputsiyänaykipä kaqtapis kananllana timputsiyanki. Sobraq kaqtaqa churayanki waray junaq mikuyänaykipä”.
24 Moisés ninqannöllami kusinakuskir waränin junaq mikuyänanpä churayarqan. Waränin junaq rikaykuyänanpäqa tsay churayanqan mikuy manami kurushqatsu ni asyashqatsu karqan.
25 Tsaypitanami Moisés nirqan: “Kanan junaqqa Tayta Diosta adoranantsikpä jamay junaqmi. Tsaymi qäyan churayanqayki mikuyllatana mikuyanki. Mikuy qoriq yarqurpis manami imatapis tariyankitsu. 26 Soqta junaqllami qoriyänaykipä mikuy kanqa. Qanchis kaq junaqchöqa jamay junaq kaptin manami imatapis tariyankitsu”.
27 Tsaynö nikaptinpis wakin runakunaqa jamay junaq mikuy qoriq yarqur manami imatapis tariyarqantsu. 28 Tsaymi Moisésta Tayta Dios nirqan: “¿Imayyaqtä mandamientükunata y leynïkunata cäsukuyankitsu? 29 Ama qonqäyaytsu jamay junaqcho jamayänaykipä ninqäta. Jamay junaqpäwanmi soqta kaq junaqcho mikuyta kamaripaykä. Tsaymi qanchis junaqchöqa maypapis mana yarquypa jamapäyänayki”.
30 Tsaynö niptinmi qanchis kaq junaqcho llapan runakuna jamayarqan.
31 Israel runakuna qoriyanqan mikuyqa culantrupa murunnömi karqan. Tsay mikuyqa yuraqmi karqan. Tsayqa mishkirqan abëjapa mishkinwan rurashqa tantanömi. Tsaytami Israel runakuna maná niyarqan.† 32 Nirkurnami Israel runakunata Moisés nirqan: “Tayta Diosmi nin: ‘Qamkunapita aywaraqkuna rikayänanpä ishkay matitanö manáta churayay. Tsaynöpami paykuna reqiyanqa Egiptupita jipimur tsunyaq jirkacho kamaripanqä mikuyta’ ”.
33 Nirkurnami Aarónta Moisés nirqan: “Ishkay mati manáta juk canastaman wiñarkur Tayta Diospa ñöpanman churay.† Tsaychömi churaranqa Israel runakunapita aywaraqkuna reqiyänanpä”.
34 Tsaymi Moisésta Tayta Dios ninqannölla canastaman manáta wiñarkur Pactu Babul ñöpanman Aarón churarqan. 35 Canaánpa lindërunman chäyanqanyaqmi chusku chunka (40) watantin Israel runakuna manáta mikuyarqan.†
36 Ishkay mati manáta canastaman wiñanqanqa ishkay kïlunömi karqan. Tsay tuputami gomer niyaq.