Chunka mandamientukuna
5
Tsaypitanami Israel runakunata qayaykatsir Moisés nirqan: “Israel runakuna, kay willanqä estatütukunata y mandamientukunata shumaq wiyayay. Willanqänö kawayänaykipä mana qonqaypa shumaq yachakuyay.2 “Tayta Diosnintsikmi Horeb jirkacho noqantsikwan pactuta rurarqan. 3 Manami unay castantsikkunawantsu tsay pactuta rurarqan, tsaypa trokinqa noqantsikwanmi. 4 Horeb jirkacho nina lunyaykaqpitami kikin Tayta Dios parlapämarqantsik. 5 Tsay nina lunyaykaq jirkaman witsayta mantsayaptikimi noqallana witsarqä Tayta Dioswan parlamunäpä. Kutiykamurmi imata nimanqantapis qamkunata willarqä. Tsay jirkachömi nimarqan:
6 “ ‘Noqami Tayta Diosniki kaykä. Egiptucho wätay kanqaykipitami jipimushqä.
7 “ ‘Ama juk dioskunamanqa yärakunkitsu.
8 “ ‘Ama ima ïdulutapis rurankitsu ciëlucho kaykaq niraqta, kay patsacho kaykaq niraqta ni lamar rurincho kaykaq niraqtapis. 9 Tsaykunamanqa ama qonqurikunkitsu ni adorankitsu.† Noqallami [munayyuq] Tayta Diosniki kaykä. Noqallata adoramänaykitami munä. Mana cäsukamar ïdulukunata adoraqkunataqa castigashä kikinta, tsurinta, willkanta y shurukta willkanta. 10 Noqata kuyamar mandamientükunata cumpliqkunatami itsanqa kuyaparnin juk waranqa (1,000) generación kayanqanyaq yanapashä.†
11 “ ‘Ama llutallaqa Tayta Diosnikipa jutinta joqarinkitsu.† Jutinta llutalla joqariq kaqtaqa castiganqami.
12 “ ‘Tayta Diosniki nishunqaykinölla ama qonqankitsu jamay junaq sagrädu kanqanta.† 13 Semänacho soqta junaq arur llapan ruranaykipä kaqkunata ruranki. 14 Qanchis kaq junaqchöqa Tayta Diosnikita adorar ama arunkitsu.† Tsaynölla ama arutsinkitsu ollqutapis warmitapis tsurikikunata, ollqutapis warmitapis wätaynikikunata, töruykikunata, ashnuykikunata ni ima uywaykikunatapis ni nacionnikicho jäpa runakunatapis. Tsaynöpami ollqupis warmipis wätaynikikuna qamkunawan iwal jamayanqa. 15 Yarpay Egiptucho wätay kanqaykita. Tsaynö kaykaqtami Tayta Diosniki munayninwan jipimushurqayki. Tsaynö jipimushurnikimi nirqan jamay junaqcho adorar jamanaykipä.
16 “ ‘Tayta Diosniki nishunqaykinölla mamaykita y taytaykita respitanki.† Tsaynöpami rikatsishunaykipä kaq nacioncho atska wata alli kawanki.†
17 “ ‘Ama runa mayikita wanutsinkitsu.†
18 “ ‘Ama majaykita qanratankitsu.†
19 “ ‘Ama suwakunkitsu.†
20 “ ‘Ama manakaqkunata pitapis tumpankitsu.†
21 “ ‘Ama runa mayikipa warminta munapankitsu.† Tsaynöpis wayinta, chakranta, warmi wätayninta, ollqu wätayninta, törunta, ashnunta, ni imaykankunatapis duëñu tukunaykipä ama yarpayllapis yarpankitsu’ ”.
Israel runakuna mantsarir Moisésta rugakuyanqan
22 “Jirka chakincho qorikashqa kaykäyaptiki y jirkacho kaykaptïmi tsay mandamientunkunata Tayta Dios lunyaykaq nina chawpinpita y yanaraykaq pukutaypita jinchi nimurqan. Tsaypitaqa tsay junaq manami mas imatapis parlamurqannatsu. Nirkurmi ishkay läja rumiman qellqaykur entregamarqan.
23 “Yanaraykaq tsakaypita parlamunqanta wiyar y jirkacho nina rupaykaqta rikarmi cada trïbupa mandaqninkunawan mayor runakunapis shamur 24 niyämarqan: ‘Tayta Diosnintsikmi nina lunyaykaqpita parlamur pasaypa munayyuq kanqanta musyatsimashqantsik. Tsaynö parlamuptinpis manami wanurqantsiktsu. 25 Tsaynö kaptinpis mantsariyämi. Tsayläya lunyaykaq ninaqa noqakunatapis ruparchi ushayämanqa. Tayta Diosnintsik parlamunqanta yapay wiyarqa wanuyäshächi. 26 Kanan wiyanqantsiknö nina lunyaykaqpita imayyaqpis kawaq Tayta Dios parlamuqta wiyarqa manami pipis kawanmantsu.† 27 Tayta Diosnintsik imata ninqantapis wiyanaykipä mejor kikillayki ayway. Pay nishunqaykita willayämaptiki llapanta cäsukurmi cumpliyäshä’.†
28 “Tsaynö niyämanqaykita wiyarmi Tayta Dios nimarqan: ‘Kay runakuna niyäshunqaykita wiyashqämi. Ninqäkunata cäsukur cumpliyänanpä yarpäyanqanqa allimi kaykan. 29 Allimi kanman kanan yarpäyanqannölla imayyaqpis noqapita mantsapakur mandamientükunata qoyay qoyay cumpliyaptin. Tsaynö cumplirqa kikinkunapis tsurinkunapis kushishqami kawayanqa. 30 Kay jirkapita kutir paykunata willay toldunkunaman kutikuyänanpä. 31 Qamqa kayman yapay kutimuy llapan mandamientükunata, estatütükunata y leynïkunata willanäpä. Tsaykunatami yachatsinki rikatsinäpä kaykaq nacionman chaykur cäsukuyänanpä’ ”.