Tayta Diosllata kuyayänanpä ninqan
6
“Tayta Diosnintsikmi mandamashqa mandamientunkunata, estatütunkunata y leyninkunata qamkunata willanäpä. Chaskiyänaykipä kaq nacionman chaykur tsay mandamientukunata cäsukur kawayanki. 2 Tayta Diospita mantsapakur willanqä llapan estatütunkunata y mandamientukunata imaypis cumplirqa qamkunapis, tsurikikunapis willkaykikunapis atska watami kawayanki.3 “Israel runakuna, kay ninqä leykunata cumpliyänaykipä shumaq wiyayämay. Tsaynöpami unay castantsikkunata Tayta Dios awninqannö nacionnikicho alli kawar tsaytsikaman mirayanki. Tsaychöqa lichipis abëjapa mishkinpis yakunörämi atska kaykan.
4 “Israel runakuna, shumaq wiyakuyay. Tayta Diosnintsikqa jukllayllami.†
5 “Tayta Diosta kuyayanki llapan shonquykikunawan, llapan voluntänikikunawan y llapan kallpaykikunawan.†
6 “Kanan junaq willanqä leykunata shonquykikunacho imaypis yarparäyanki. 7 Mana qonqaypa wamraykikunata yachatsiyanki wayikikunachöpis, nänikunachöpis, punukurpis y shärikurpis. 8 Makikikunaman y urkuykikunaman watakurkur puritsiyanki. 9 Tsaynölla qellqayanki wayi punku marcunkunaman y marka yaykuna punkukunamanpis”.†
Tayta Diosta cäsukuyänanpä ninqan
10 “Unay castantsik Abrahamta,† Isaacta† y Jacobta† awninqan nacionmanmi Tayta Dios chätsiyäshunki. Tsay nacionchöqa mana shäritsiyanqayki jatusaq kuyayllapä markakunami kaykäyan. 11 Tsay markakunacho imatapis mana qoriykarmi wayi juntata imaykata tariyanki. Yaku pözukunatapis uchkushqallatanami tariyanki. Üvatapis olïvutapis plantashqallatanami tariyanki. Tsaykunata pacha junta mikur 12 paqtä Egiptucho wätay kaykäyanqaykipita jipiyämushuqniki Tayta Diosta qonqäyankiman.
13 “Tayta Diosllapitami mantsapakuyanki. Pay japallantami sirviyanki.† Jurarpis paypa jutillancho jurayanki. 14 Juklä markakunacho taq runakuna adorayanqan dioskunata ama adorayankitsu. 15 Noqantsikwan kaykaq Tayta Diosqa pay japallanta adorayänaykitami munan. Juk dioskunata adorayaptikiqa ajanarmi chipyaq ushakätsiyäshunki.
16 “Masahcho tentayanqaykinö† Tayta Diosnintsikta ama tentayankitsu.† 17 Tayta Diosnintsikpa mandamientunkunata, leyninkunata y estatütunkunata willapanqäta cumpliyanki. 18 Tayta Dios munanqannölla imaypis kawayanki. Tsaynöpami unay castantsikkunata Tayta Dios awninqan nacionman yaykur kushishqa kawayanki. 19 Tayta Dios awninqannöllami llapan contraykikunata qarqur ushakätsinqa.
20 “Waray warantin tsurikikuna ‘¿imapätä Tayta Diosnintsik kay leykunata, estatütukunata y mandamientukunata qomarqantsik?’ nir tapuyäshuptikiqa 21 tantiyatsiyanki: ‘Egiptucho Faraónpa wätaynin kanqantsikpitami Tayta Dios munayninwan jipimarqantsik. 22 Jipimänantsikpä Faraónta y castankunata Tayta Dios mantsakaypä castiganqantami rikarqantsik. 23 Jipimarnintsikmi pushamarqantsik unay castantsikta awninqan nacionta rikatsimänantsikpä. 24 Tsaymi Tayta Diosnintsik nimarqantsik paypita mantsapakur llapan estatütunkunata cäsukunantsikpä kanqanta. Tsaynöpami kananyaqpis qoyay qoyay alli kawanantsikpä yanapaykämantsik. 25 Tayta Diosnintsik munanqannö alli kawanantsikpä yachatsimanqantsiknölla llapan mandamientunkunata imaypis cumplishun’ ”.