Cornëtakunata Tukayänan fiestacho sacrificiukunata rupatsiyänanpä tantiyatsinqan
29
“ ‘Qanchis killa qallaykunan junaqcho Tayta Diosta adorayänaykipä qorikäyanki. Tsay junaq ima aruytapis jaqiriykur qorikäyänaykipä cornëtakunata tukatsiyanki. 2 Tsay fiestacho Tayta Diospä rupatsina sacrificiuta rupatsiyanki juk sänu torïtuta, juk sänu carnëruta y juk watayuq qanchis sänu carnishkunata. Rupatsiyanqaykipa mushkuyninmi Tayta Diospa shonqunpänö kanqa. 3 Torïtuta rupatsir aceitiwan pichushqa soqta kïlu allinin jarinata jananman wiñayanki. Tsaynölla carnëruta rupatsir aceitiwan pichushqa chusku kïlu allinin jarinata wiñayanki. 4 Cada carnishta rupatsir ishkay kïlu allinin jarinata wiñayanki. 5 Tsaynölla purificatsina sacrificiupä juk chïvuta altarcho rupatsiyanki. Tsayqa jutsata rurayanqaykipita perdonashqa kayänaykipämi kanqa.6 “ ‘Tsaki mikuy ofrendatawan vïnuta wiñarkur tsay sacrificiukunata rupatsirpis Tayta Dios ninqannö qoyay qoyay rupatsiyanqayki sacrificiuta y cada killa rupatsiyanqayki sacrificiutapis mana qonqaypa rupatsiyanki. Rupatsiyänaykipä kaq uywakunaqa llapanpis sänu kayätsun. Rupatsiyanqaykipa mushkuyninmi Tayta Diospa shonqunpänö kanqa.
Purificashqa kananpä kaq junaqcho sacrificiukunata rupatsiyänanpä tantiyatsinqan
7 “ ‘Qanchis killa chunka junaqcho ima aruytapis ama aruyankitsu, tsaypa trokinqa Tayta Diosta adorayänaykipä qorikaykur ayunayanki.† 8 Tsay junaq Tayta Diospä rupatsina sacrificiuta rupatsiyanki juk sänu torïtuta, juk sänu carnëruta y juk watayuq qanchis sänu carnishkunata. Rupatsiyanqaykipa mushkuyninmi Tayta Diospa shonqunpänö kanqa. 9 Torïtuta rupatsir soqta kïlu allinnin jarinata aceitiwan pichushqata jananman wiñayanki. Tsaynölla carnëruta rupatsirpis chusku kïlu jarinata wiñapäyanki. 10 Cada carnishta rupatsir ishkay kïlu allinin jarinata wiñapäyanki. 11 Tsaynölla purificatsina sacrificiupä juk chïvuta altarcho rupatsiyanki. Tsayqa jutsata rurayanqaykipita perdonashqa kayänaykipämi kanqa. Tsaynölla jukaq purificatsina sacrificiuta y qoyay qoyay rupatsiyanqayki rupatsina sacrificiutapis mana qonqaypa rupatsiyanki. Tsaynölla tsaki mikuy ofrendata y vïnutapis wiñapäyanki.
Ramäda fiestacho sacrificiukunata rupatsiyänanpä tantiyatsinqan
12 “ ‘Qanchis killacho chunka pitsqa junaqcho ima aruytapis ama aruyankitsu, tsaypa trokinqa Tayta Diosta adorayänaykipä qorikäyanki. Tayta Diosta adorar qanchis junaqyaq fiestata rurayanki. 13 Fiesta qallaykunan junaqcho rupatsina sacrificiuta rupatsiyanki chunka kimsa sänu torïtukunata, ishkay sänu carnërukunata y juk watayuq chunka chusku sänu carnishkunata. Rupatsiyanqaykipa mushkuyninmi Tayta Diospa shonqunpänö kanqa. 14 Cada torïtuta rupatsir aceitiwan pichushqa soqta kïlu allinin jarinata wiñapäyanki. Tsaynölla cada carnëruta rupatsir aceitiwan pichushqa chusku kïlu allinin jarinata wiñapäyanki. 15 Cada carnishta rupatsir ishkay kïlu allinin jarinata wiñapäyanki. 16 Tsaynölla purificatsina sacrificiupä juk chïvuta altarcho rupatsiyanki. Tsayqa jutsata rurayanqaykipita perdonashqa kayänaykipämi kanqa. Tsaykunata rupatsirqa qoyay qoyay rupatsiyanqaykinölla rupatsina sacrificiuta y tsaki mikuy ofrendata rupatsiyanki. Tsay jananman vïnutapis mana qonqaypa wiñapäyanki.
17 “ ‘Ishkay kaq junaqcho rupatsina sacrificiuta rupatsiyanki chunka ishkay sänu torïtukunata, ishkay sänu carnërukunata y juk watayuq chunka chusku sänu carnishkunata. 18 Cada torïtuta, carnëruta y carnishta rupatsir ley ninqannölla tsaki mikuy ofrendakunatapis vïnutapis wiñapäyanki. 19 Tsaynölla purificatsina sacrificiupä juk chïvuta altarcho rupatsiyanki. Tsayqa jutsata rurayanqaykipita perdonashqa kayänaykipämi kanqa. Tsaykunata rupatsirqa qoyay qoyay rupatsiyanqaykinölla rupatsina sacrificiuta y tsaki mikuyta rupatsiyanki. Tsay jananman vïnutapis mana qonqaypa wiñapäyanki.
20 “ ‘Kimsa kaq junaqcho rupatsina sacrificiuta rupatsiyanki chunka juk sänu torïtukunata, ishkay sänu carnërukunata y juk watayuq chunka chusku sänu carnishkunata. 21 Cada torïtuta, carnëruta y carnishta rupatsir ley ninqannölla tsaki mikuy ofrendakunatapis vïnutapis wiñapäyanki. 22 Tsaynölla purificatsina sacrificiupä juk chïvuta altarcho rupatsiyanki. Tsayqa jutsata rurayanqaykipita perdonashqa kayänaykipämi kanqa. Tsaykunata rupatsirqa qoyay qoyay rupatsiyanqaykinölla rupatsina sacrificiuta y tsaki mikuyta rupatsiyanki. Tsay jananman vïnutapis mana qonqaypa wiñapäyanki.
23 “ ‘Chusku kaq junaqcho rupatsina sacrificiuta rupatsiyanki chunka sänu torïtukunata, ishkay sänu carnërukunata y juk watayuq chunka chusku sänu carnishkunata. 24 Cada torïtuta, carnërutawan carnishta rupatsir ley ninqannölla tsaki mikuy ofrendakunatapis vïnutapis wiñapäyanki. 25 Tsaynölla purificatsina sacrificiupä juk chïvuta altarcho rupatsiyanki. Tsayqa jutsata rurayanqaykipita perdonashqa kayänaykipämi kanqa. Tsaykunata rupatsirqa qoyay qoyay rupatsiyanqaykinölla rupatsina sacrificiuta y tsaki mikuyta rupatsiyanki. Tsay jananman vïnutapis mana qonqaypa wiñapäyanki.
26 “ ‘Pitsqa kaq junaqcho rupatsina sacrificiuta rupatsiyanki isqun sänu torïtukunata, ishkay sänu carnërukunata y juk watayuq chunka chusku sänu carnishkunata. 27 Cada torïtuta, carnëruta y carnishta rupatsir ley ninqannölla tsaki mikuy ofrendakunata y vïnuta wiñapäyanki. 28 Tsaynölla purificatsina sacrificiupä juk chïvuta altarcho rupatsiyanki. Tsayqa jutsata rurayanqaykipita perdonashqa kayänaykipämi kanqa. Tsaykunata rupatsirqa qoyay qoyay rupatsiyanqaykinölla rupatsina sacrificiuta y tsaki mikuyta rupatsiyanki. Tsay jananman vïnutapis mana qonqaypa wiñapäyanki.
29 “ ‘Soqta kaq junaqcho rupatsina sacrificiuta rupatsiyanki puwaq sänu torïtukunata, ishkay sänu carnërukunata y juk watayuq chunka chusku sänu carnishkunata. 30 Cada torïtuta, carnëruta y carnishta rupatsir ley ninqannölla tsaki mikuy ofrendakunata y vïnutapis wiñapäyanki. 31 Tsaynölla purificatsina sacrificiupä juk chïvuta altarcho rupatsiyanki. Tsayqa jutsata rurayanqaykipita perdonashqa kayänaykipämi kanqa. Tsaykunata rupatsirqa qoyay qoyay rupatsiyanqaykinölla rupatsina sacrificiuta y tsaki mikuyta rupatsiyanki. Tsay jananman vïnutapis mana qonqaypa wiñapäyanki.
32 “ ‘Qanchis kaq junaqcho rupatsina sacrificiuta rupatsiyanki qanchis sänu torïtukunata, ishkay sänu carnërukunata y juk watayuq chunka chusku sänu carnishkunata. 33 Cada torïtuta, carnëruta y carnishta rupatsir ley ninqannölla tsaki mikuy ofrendakunata y vïnuta wiñapäyanki. 34 Tsaynölla purificatsina sacrificiupä juk chïvuta altarcho rupatsiyanki. Tsayqa jutsata rurayanqaykipita perdonashqa kayänaykipämi kanqa. Tsaykunata rupatsirqa qoyay qoyay rupatsiyanqaykinölla rupatsina sacrificiuta y tsaki mikuyta rupatsiyanki. Tsay jananman vïnutapis mana qonqaypa wiñapäyanki.
35 “ ‘Puwaq kaq junaqcho† sagrädu kaptin qorikäyanki. Tsay junaq ima aruychöpis ama aruyankitsu. 36 Rupatsina sacrificiuta rupatsiyanki juk sänu torïtuta, juk sänu carnëruta y juk watayuq qanchis sänu carnishkunata. Rupatsiyanqaykipa mushkuyninmi Tayta Diospa shonqunpänö kanqa. 37 Torïtuta, carnëruta y carnishkunata rupatsirqa ley ninqannölla tsaki mikuy ofrendakunata y vïnuta wiñapäyanki. 38 Tsaynölla purificatsina sacrificiupä juk chïvuta altarcho rupatsiyanki. Tsayqa jutsata rurayanqaykipita perdonashqa kayänaykipämi kanqa. Tsaykunata rupatsirqa qoyay qoyay rupatsiyanqaykinölla rupatsina sacrificiuta y tsaki mikuyta rupatsiyanki. Tsay jananman vïnutapis mana qonqaypa wiñapäyanki.
39 “ ‘Cada wata fiestakunacho tsaykunata Tayta Diospä rupatsiyanki. Tsay rupatsiyanqaykikuna apartimi kanqa awniyanqaykita cumplir sacrificiuta rupatsiyanqaykipita, voluntällaykipita churar sacrificiuta rupatsiyanqaykipita, rupatsina sacrificiuta rupatsiyanqaykipita, tsaki mikuy ofrendata rupatsiyanqaykipita, vïnuta altarman wiñapäyanqaykipita y alli päsakuy sacrificiuta rupatsiyanqaykipitapis’ ”.
40 (30.1) Tayta Dios ninqantaqa llapantami Israel mayinkunata Moisés willarqan.