3 (4) “Taytanpa munayllanchörä kaykar jipash imatapis Tayta Diosta awnirqa 4 (5) taytan awninantarämi shuyanqa. Taytan imatapis mana parlakuptinmi itsanqa awninqanta tsay jipash cumplinqa. 5 (6) Awninqanta musyaykur taytan mana munaptinqa manami awninqanta cumplinqatsu. Taytan mana munaptinqa Tayta Dios manami obliganqatsu cumplinanpä.

6 (7) “Jipash kikillanrä kaykar shumaq mana yarpachakuypa imatapis Tayta Diosta awnirkur runawan majatsakarqa 7 (8) runan awninantarämi shuyanqa. Awninqanta musyaykur runan imatapis mana parlakuptinqa awninqantami cumplinqa. 8 (9) Awninqanta musyaykur runan mana munaptinqa manami awninqanta cumplinqatsu. Runan mana munaptinqa Tayta Dios manami obliganqatsu cumplinanpä.

9 (10) “Viüda kar o runanpita rakikashqa karmi itsanqa imatapis awninqanta cumplinqa.

10 (11) “Runayuq kaykar warmi imatapis Tayta Diosta awnirqa 11 (12) runan awninantarämi shuyanqa. Awninqanta musyaykur runan imatapis mana parlakuptinqa awninqantami tsay warmi cumplinqa. 12 (13) Awninqanta musyaykur runan mana munaptinqa manami awninqanta cumplinqatsu. Runan mana munaptinqa Tayta Dios manami obliganqatsu cumplinanpä.

13 (14) “Tsaymi warmi imatapis awniptin ayunananpä niptin runanrä ninqa cumplinanpä o mana cumplinanpä kanqantapis. 14 (15) Awninqanta musyaykur warminta imatapis mana nir juk ishkay junaq upällalla kakurqa warmin awnikunqantami awniykan. 15 (16) Tsaypitarä mana munarqa runannami jutsayuq kanqa warmin awninqanta mana cumplinqanpita”.

16 (17) Tsaynömi Moisésta Tayta Dios tantiyatsirqan runayuq warmi imanö kawananpä y taytanpa munayllanchörä kaykar jipash imanö kawananpäpis.