3 “Tsaynölla tantiyatsir ninki: ‘Qoyay qoyay juk watayuq ishkay sänu carnishta Tayta Diospä rupatsiyanki. Carnishkunata rupatsiyanqaykiqa rupatsina sacrificiumi kanqa. 4 Jukaq carnishta patsa waraykaptin rupatsiyanki y jukaqtana patsa tsakaykaptin rupatsiyanki. 5 Tsaykunata rupatsir tsaki mikuytapis rupatsiyanki ishkay kïlu allinnin jarinaman juk litru olïvu aceitiwan pichuskir’ ”.

6 (Tsaynömi Sinaí jirkacho rupatsina sacrificiukunata qoyay qoyay rupatsiyarqan. Tsay rupatsiyanqanpa mushkuyninmi Tayta Diospa shonqunpänö karqan.)

7 “ ‘Cada carnishta rupatsinaykipä apamurmi juk litru vïnutapis apayämunki. Tsay vïnutami Tayta Diosta adorar Tinkuna Sagrädu Toldupa patiuncho kaykaq altarman wiñayanki. 8 Jukaq carnishtanami tutapa rupatsiyanqaykinölla tardipapis rupatsiyanki. Tsay jananmanmi tutapa wiñayanqaykinölla tsaki mikuyta y vïnutapis wiñayanki. Tsay rupatsiyanqaykipa mushkuyninmi Tayta Diospa shonqunpänö kanqa.

9 “ ‘Jamay junaqpis juk watayuq ishkay sänu carnishta altarcho rupatsiyanki. Tsaypa jananman chusku kïlu allinnin jarinata olïvu aceitiwan pichushqata rupatsiyanki. Tsayqa tsaki mikuy ofrendami kanqa. Tsaynölla rupaykätsinqayki jananman vïnutapis wiñayanki. 10 Jamay junaqcho tsaynö rupatsirpis y vïnuta jananman wiñaparpis ama qonqäyankitsu qoyay qoyay rupatsina sacrificiuta rupatsiyta.^†

11 “ ‘Cada killacho punta kaq junaq Tayta Diospä sacrificiuta rupatsiyanki ishkay sänu torïtuta, juk sänu carnëruta y juk watayuq qanchis sänu carnishkunata. 12 Cada torïtuta rupatsir soqta kïlu allinnin jarinata aceitiwan pichushqata jananman wiñayanki. Tsaynölla cada carnëruta rupatsir chusku kïlu allinnin jarinata aceitiwan pichushqata wiñayanki. 13 Cada carnishta rupatsir ishkay kïlu allinnin jarinata aceitiwan pichushqata wiñayanki. Tsay rupatsiyanqaykipa mushkuyninmi Tayta Diospa shonqunpänö kanqa. 14 Torïtuta rupatsir jananman wiñayanki ishkay litru vïnuta. Tsaynölla cada carnëruta rupatsir juk litru mediu vïnuta wiñayanki. Cada carnishta rupatsir juk litru vïnuta wiñayanki. Tsaynölla cada killa rupatsina sacrificiuta imaypis rupatsiyanki.

15 “ ‘Juk chïvutapis tsay junaq purificatsina sacrificiupä rupatsir jananman vïnuta wiñayanki. Tsaynölla qoyay qoyay rupatsina sacrificiutapis mana qonqaypa rupatsiyanki.

16 “ ‘Wata qallaykunan killa chunka chusku junaqcho Tayta Diosta adorar Pascua fiestata rurayanki.^† 17 Waraynin junaqpita qallaykur qanchis junaqyaq levadüraynaq tantata mikuyanki.^† 18 Tsay fiesta qallanqan junaq ima aruytapis ama aruyankitsu, tsaypa trokinqa Tayta Diosta adorayänaykipä qorikäyanki. 19 Tsaynölla Tayta Diosta adorar sacrificiuta rupatsiyanki ishkay sänu torïtuta, juk sänu carnëruta y juk watayuq qanchis sänu carnishkunata. 20 Tsay sacrificiu rupanqan jananman wiñayanki aceitiwan pichushqa allinin jarinata. Cada torïtuta rupatsir soqta kïlu jarinata wiñayanki. Tsaynölla cada carnëruta rupatsirpis chusku kïlu jarinata wiñayanki. 21 Cada carnishta rupatsir ishkay kïlu jarinata wiñayanki. 22 Tsaynölla purificatsina sacrificiupä juk chïvuta altarcho rupatsiyanki. Tsayqa kanqa jutsata rurayanqaykipita perdonashqa kayänaykipämi. 23 Tsaykunata rupatsirqa cada tuta rupatsina sacrificiutapis mana qonqaypa rupatsiyanki.

24 “ ‘Qoyay qoyaymi qanchis junaqyaq fiestata rurar tsaynö rupatsiyanki. Tsay rupatsiyanqaykipa mushkuyninmi Tayta Diospa shonqunpänö kanqa. Tsaynölla rupatsiyanqayki jananman vïnutapis wiñayanki. Tsaykunata rupatsirqa cada tuta rupatsina sacrificiutapis mana qonqaypa rupatsiyanki. 25 Qanchis kaq junaqchöqa ima aruychöpis ama aruyankitsu, sinöqa Tayta Diosta adorayänaykipä qorikäyanki.

26 “ ‘Punta cosëchata qorir Semäna fiestata^† rurayaptiki juk junaq kanqa cosëchaykikunapita primiciata Tayta Diospä apayämunaykipämi. Tsay junaqchöqa ima aruychöpis ama aruyankitsu, tsaypa trokinqa Tayta Diosta adorayänaykipä qorikäyanki. 27 Tsay junaq Tayta Diospä sacrificiuta rupatsiyanki ishkay torïtuta, juk carnëruta y juk watayuq qanchis carnishkunata. Tsay rupatsiyanqaykipa mushkuyninmi Tayta Diospa shonqunpänö kanqa. 28 Cada torïtuta rupatsir aceitiwan pichushqa soqta kïlu allinin jarinata wiñayanki. Tsaynölla carnëruta rupatsirpis aceitiwan pichushqa chusku kïlu allinin jarinata wiñayanki. 29 Cada carnishta rupatsir ishkay kïlu allinnin jarinata wiñayanki. 30 Tsaynölla purificatsina sacrificiupä juk chïvuta altarcho rupatsiyanki. Tsayqa jutsata rurayanqaykipita perdonashqa kayänaykipämi kanqa.

31 “ ‘Tsaki mikuy ofrendatawan vïnuta wiñarkur tsay sacrificiukunata rupatsirpis qoyay qoyay rupatsiyanqayki sacrificiutapis mana qonqaypa rupatsiyanki. Rupatsiyänaykipä kaq uywakunaqa llapanpis sänu kayätsun.