4 “Aarónta y tsurinkunata Tinkunantsik Toldupa patiunman pushaykamur bäñatsinki. 5 Nirkur Aarónta jatitsinki tünicata, sotänata, efodta y pectoralta. Tsaykunata jatiskatsir efodpa wachukunwan tseqllanman watanki. 6 Tsaynölla umanman görrata jatiskatsir sagrädu vinchata^† jananman churanki. 7 Tsaynö jatirkatsir noqata sirvimaq sacerdöti kananpä Aarónpa umanman sagrädu aceitita wiñapanki. 8 Tsaynölla Aarónpa tsurinkunata qayaykur tünicata jatitsinki. 9 Aarónta wachakätsinqaykinölla paykunatapis wachakätsir görrata jatitsinki. Tsaynöpami noqata sirvimaq sacerdöti kayänanpä churanki. Paykuna y paykunapita aywaraqkunami imayyaqpis sirvimaq sacerdötikuna kayanqa.

10 “Tsaypitana Tinkunantsik Toldupa patiunman torïtuta apamunki. Tsaychömi Aarónwan tsurinkuna torïtupa umanman makinkunata churayanqa. 11 Tsaypita Tinkunantsik Toldupa patiuncho tsay torïtuta ñöpächo pishtanki. 12 Yawarninman dëduykita töparkatsir altarpa waqrankunata llushinki. Sobraq kaq yawartana altar chakinman jichanki. 13 Pacha wiranta, ñatincho kaykaq wiranta y ishkan rurunta wirantinta altarcho rupatsinki. 14 Aytsanta, qaranta y panzantaqa campamentupita jukläman apaykur rupatsinki. Torïtuta altarcho rupatsinqaykimi purificatsina sacrificiu kanqa.

15 “Tsaypitanami jukaq carnërupa umanman Aarónwan tsurinkuna makinkunata churayanqa. 16 Tsayta pishtaskir yawarninwan altarpa chuskun lädunkunata tsaqtsupanki. 17 Aytsanta cuartizaskir aqishnintawan chakinkunata mayllanki. Tsaypitana altarman umantinta llapanta churaskir 18 rupatsinki. Tsay rupatsinqayki mushkümuptinmi noqa Tayta Dios kushikushä.^†

19 “Jukaq carnërupa umanmanpis Aarónwan tsurinkuna makinkunata churaskiyaptin 20 tsay carnëruta pishtanki. Yawarninta qoriskir Aarónpa y tsurinkunapa derëcha kaq rinrinpa puntanta ichikllata llushinki. Tsaynölla yawarwan llushinki derëcha kaq makinpa y chakinpa maman dëdunkunatapis. Sobraq kaq yawartana altarpa chuskun lädunkunaman tsaqtsupanki. 21 Altarta tsaqtsupanqayki yawarta qoriskir sobraq kaq aceitiwan Aarónta y latsapankunatapis tsaqtsupanki. Tsaynölla tsurinkunata y latsapankunatapis tsaqtsupanki. Tsaynöpami Aarónwan tsurinkuna noqata sirvimaqnï sacerdöti kananpä consagrädu kayanqa. Latsapankunapis listunami kanqa jatikurkur sirviyämänanpä.

22 “Tsaypitana pishtanqayki carnërupa chupa wiranta, pacha wiranta, ñatincho wiranta, ishkan rurunta wirantinta y derëcha kaq chankantapis jipinki. Tsaynö jipinki Aarón y tsurinkuna sacerdöti kayänanpä pishtanqayki carnëru kaptinmi. 23 Noqapa ñöpächo kaykaq canastapita jipinki juk jatun tantata, aceitiwan masarashqa juk tantata y juk llapsha tantatapis. Llapanpis tsay tantakunaqa levadüraynaqmi kayanqa. 24 Tsay llapanta Aarónta y tsurinkunata aptatsinki noqapa ñöpäman joqarkur wakman kayman kuyutsiyänanpä. 25 Tsaynö ruraskiptin tsay tantakunata qorinki. Tsaypita jukaq carnëruta rupatsina sacrificiupä rupatsinqaykinölla tsaykunatapis altarcho rupatsinki. Tsay rupatsinqaykipa mushkuyninmi noqapa shonqüpänö kanqa. 26 Aarónta sirvimaq sacerdöti kayman churar pishtanqayki carnërupa pëchuntapis noqapa ñöpäman joqarirkur wakman kayman kuyutsinki. Tsay aytsaqa qampämi kanqa.

27 “Tsay kuyutsinqayki pëchunta y derëcha kaq chankantaqa rakinki 28 Aarónpä y paypita aywaraqkunapä. Cada vez alli päsakuy sacrificiu noqapä kaptin tsaykunata Israel runakunapita imaypis chaskiyanqa. Tsay ninqäkunaqa imayyaqpis leymi qamkunapä kanqa.

29 “Aarón wanuptinmi sagrädu latsapankuna paypita aywaraqkuna jatikuyänanpä kanqa. Tsay latsapakunatami jatikuyanqa sagrädu aceitita wiñapar sacerdöti kananpä churanqan höra. 30 Tinkunantsik Tolduman yaykunanpä mayqanpis Aarón castapita sacerdöti kananpä churaptin qanchis junaq tsay latsapata jatirätsun.

31 “Pishtanqan carnërupa wakin aytsanta kusinanki sagrädu lugarcho.^a 32 Tinkunantsik Toldupa patiunchömi tsay aytsata y canastacho sobraq tantata Aarónwan tsurinkuna mikuyanqa. 33 Sacerdöti kananpä churanqanpita purificatsina sacrificiu kaptinmi tsay aytsawan tantakuna paykuna mikuyänanpä kanqa. Tsay mikuykuna sagrädu kaptinmi llutallaqa pipis mikunqatsu. 34 Tantatawan aytsata tsay junaq mana ushaptinqa sobraq kaqta rupatsinki. Tsaytaqa sagrädu kaptin manami pipis mikunqatsu.

35 “Aarónta y tsurinkunata sacerdöti kayänanpä churarqa ninqänölla llapan tsaykunata ruranki. Sacerdöti churayqa qanchis junaqyaqmi düranqa. 36 Aarónwan tsurinkuna purificashqa kayänanpä qanchis junaqyaq qoyay qoyay juk torïtuta pishtaskir rupatsinki. Tsaynöllami tsay rupatsinqaykikunaqa altar purificashqa kananpä kanqa. Tsaypita altar jananman aceitita wiñapanki sagrädu kananpä. 37 Qanchis junaqyaqmi sacrificiuta qoyay qoyay rupatsinki. Tsaynöpami altar sagräduna kaptin tsayman töpaq kaqqa imapis sagrädu kanqa.

38 “Mana qonqaypa qoyay qoyay juk watayuq ishkay carnishta pishtaskir altarcho rupatsiyanki. 39 Jukaq carnishta patsa waraykaptin rupatsiyanki y jukaqtana patsa tsakaykaptin. 40 Punta kaq carnishpa aytsanta altarcho rupatsirnin ishkay kïlu allinnin jarinata juk litru olïvu aceitiwan pichuskir rupatsiyanki. Tsay jananman wiñapäyanki juk litru vïnuta. 41 Tutapa rupatsiyanqaykinölla tardipapis jukaq carnishta pichunqayki jarinatawan altarcho rupatsiyanki. Tsay rupatsinqayki mushkümuptinmi noqa Tayta Dios kushikushä.

42 “Tsaynö rupatsiyanqaykiqa noqapä rupatsina sacrificiumi kanqa. Tsaytaqa qamkuna y qamkunapita aywaraqkunapis Tinkunantsik Toldupa patiunman apaykur imaypis ñöpächo rupatsiyanki. Tsaychömi imaypis tinkushun parlanantsikpä. 43 Tsaychömi Israel mayikikunawanpis tinkushä. Kikï tsaycho kaptïmi tsay patiu sagrädu kanqa.

44 “Tinkunantsik Toldupis y patiucho kaq altarpis sagrädumi kanqa. Aaróntawan tsurinkunatapis noqami churashä sacerdöti kar sirviyämänanpä. 45 Israel runakuna kayanqancho tarmi paykunapa Diosnin kashä. 46 Tsaynöpami Tayta Diosninkuna kanqäta musyayanqa. Noqami Egiptupita jipimushqä paykunawan kanäpä. Noqaqa paykunapa Tayta Diosninkunami kaykä.