Sacerdötikunapa latsapankunata ruratsinanpä ninqan
28
“Israel runakunapita wawqiki Aarónta y tsurinkuna Nadabta, Abiúta, Eleazarta y Itamarta sirvimaq sacerdötikuna kayänanpä churanki. 2 Wawqiki Aarón respitädu sacerdöti kar jatikunanpä kuyayllapä sagrädu latsapankunata ruratsinki. 3 Latsapankunata ruratsinaykipä yachaynin qaranqä runakunata tantiyatsinki imanö rurayänanpäpis. Tsay latsapakunata jatikurkurmi sirvimaq sacerdöti kananpä consagrädu kanqa. 4 Wawqiki Aarón y tsurinkuna jatikuyänanpä ruratsinki pectoralta, efodta, sotänata, bordashqa tünicata, görrata y wachukutapis. Paykunami tsay sagrädu latsapata jatikuyanqa akranqä sacerdötikuna kar sirviyämänanpä. 5 Tsay latsapakunata awayanqa qori jïlupita, azul, granäti y puka millwa jïlukunapita y llanulla putskashqa lïnu jïlupitapis.Efodta ruratsinanpä tantiyatsinqan
6 “Efodta awatsinki qori jïlupita†, azul, granäti y puka millwa jïlukunapita y llanulla putskashqa lïnu jïlupitapis. Tsayta awayanqa awayta shumaq yachaqkuna. 7 Tsaynölla efodpa ishkan kuchuncho tirantikuna kanqa umruncho warkaränanpä. 8 Efodpa wachukuntapis awatsinki qori jïlupita, azul, granäti y puka millwa jïlukunapita y llanulla putskashqa lïnu jïlupita. Tsay wachukuqa efodwan jukllayllanömi kanqa.
9 “Tsaynölla ishkay ónice rumikunaman Israelpa tsurinkunapa jutinkunata qellqatsinki. 10 Tsaynö qellqatsinki mayorpita qallaykur hasta qepayaq. Juknin kaq rumiman soqta jutikunata qellqatsinki y jukaq rumimanpis soqta jutikunata qellqatsinki. 11 Tsay jutikunata rumipita sëlluta ruraqnö alhäja ruraq runawan qellqatsinki. Tsay rumikuna mana yarqukänanpä tsararaqninkunata qoripita ruraykatsir siguratsinki. 12 Tsay ishkay rumikunata efodpa tirantinkunaman churatsinki sacerdötipa umruncho kananpä. Tsaynöpami ñöpäman Aarón yaykamur umruncho apamunqa Israelpa tsurinkunapa jutinkunata imaypis mana qonqäyänanpä. 13 Tsay rumikunapa tsararaqninkunata qoripita ruratsinki. 14 Rumikuna kaykanqan kuchunpa churatsinki pilltashqa ishkay qori cordonta.
Pectoralta ruratsinanpä tantiyatsinqan
15 “Pëchunman churakunan pectoralta ruratsinki imata yarpanqätapis sacerdöti musyananpä.a Tsaytapis ruratsinki efodta ruratsinqaykinölla. Tsaymi kanqa qori jïlupita, azul, granäti y puka millwa jïlukunapita y llanulla putskashqa lïnu jïlupitapis. 16 Ruraskatsir doblanki bolsanö cuadrädu kananpä. Largunpis anchunpis ishkay chunka ishkay (22) centïmetru kanqa. 17 Tsayman churatsinki chusku fïla kuyayllapä rumikunata. Punta kaq fïlaman churatsinki sárdica rumita, topacio rumita y carbunclo rumita. 18 Ishkay kaq fïlaman churatsinki esmeralda rumita, zafiro rumita y diamanti rumita. 19 Kimsa kaq fïlaman churatsinki jacinto rumita, ágata rumita y amatista rumita. 20 Chusku kaq fïlamanna churatsinki berilo rumita, ónice rumita y jaspe rumitapis. Tsay rumikuna mana yarqukänanpä qoripita tsararaqninkunata ruraykatsir siguratsinki. 21 Tsay rumikunami chunka ishkay kanqa. Chunka ishkay kanqa Israelpa tsurinkuna chunka ishkay kayanqannömi. Cada rumiman juk trïbupa jutinta qellqatsinki rumipita rurashqa sëllunö kananpä.
22 “Pectoralpä cordonkunata qori jïlupita pilltatsinki. 23 Nirkur ishkay taksha argöllakunata qoripita ruratsinki. Tsay argöllakunata churatsinki pectoralpa jana kaq ishkan esquïnanman. 24 Tsay argöllakunaman qoripita pilltashqa cordonta ullkatsinki. 25 Cordonpa ishkan puntankunatana siguratsinki umruncho kaq tsararaqninkunaman. Tsayqa pëchunchömi wataranqa.
26 “Tsaynölla ishkay taksha argöllakunata qoripita ruratsinki pectoralpa ura kaq kuchunkunaman churananpä. Tsay argöllakunami pectoral rurincho kar efod janancho kanqa. 27 Tsaynölla ishkay taksha argöllakunata qoripita ruratsinki efodpa wachukun janaläninman churananpä. Tsaykunami efodpa tirantinkunacho kar pectoralpa costüranman tinkuranqa. 28 Nirkurmi pectoralpa y efodpa argöllankunata azul cordonwan watanki efodpita mana yarqunanpä.
29 “Lugar Santuman pectoralnin jatishqa Aarón yaykurmi Israelpa tsurinkunapa jutinkunata pëchuncho apanqa. Pectoralnin jatishqa ñöpächo kaptinmi paykunata y paykunapita aywaraqkunata imaypis yarparäshä. 30 Tsay pectoralman wiñapanki Urimta y Tumimta† pëchuncho Aarón apananpä. Tsaynöpami Lugar Santuman yaykur noqapa ñöpächo imaypis tsararanqa allipä kaqta y mana allipä kaqtapis Israel runakunata tantiyatsinäpä.
Mandaq sacerdötipa wakin latsapankunata ruratsinanpä ninqan
31 “Efodpa rurinman jatikunanpä azul jïlupita sotänata awatsinki. 32 Uman yaykunanpä tsay sotänata kunkayuqta ruratsinki. Sotänapa kunkan mana rachinanpä rebëtita jiratsinki. Tsay rebëti qara casäcapa kuchunnö jirashqa kanqa. 33 Sotänapa ura kuchunpa granädatanö adornuta bordatsinki azul, granäti y puka millwa jïlukunawan. Tsaynölla tsay kuchunpa qoripita rurashqa campanillakunata churatsinki. 34 Tsaynöpami juk qori campanilla, juk granäda, juk qori campanilla, juk granäda sotäna kuchuncho tumaypa kanqa. 35 Tsay sotänan jatishqami Lugar Santuman imaypis Aarón yaykunqa. Tsaymi sirvimänanpä yaykuptinpis y yarqamuptinpis campanillan wiyakämunqa. Sotänan jatishqa yaykurqa manami wanunqatsu.
36 “Tsaynöpis qoripita vinchata ruratsinki. Tsayman qellqatsinki ‘Tayta Diospa karmi santu’ nir qellqaränanpä. Tsayta qellqatsinki rumipita rurashqa sëllunö kananpä. 37 Tsay ruratsinqayki vinchata Aarónpa görranman azul cordonwan watapanki. 38 Tsay vinchata Aarón imaypis urkuncho jatiranqa. Tsaynöpami Israel runakuna sagrädu sacrificiukunata apayämuptin munanqänö mana kaptinpis perdonashä. Israel runakunapa trokin Aarónnami jutsayuq kanqa.
39 “Aarónpä tünicatapis lïnu jïluwan awaskatsir shumaq bordatsinki. Görrantapis lïnu jïlupita awatsinki.b Wachukuntapis shumaq bordatsinki.
40 “Aarónpa tsurinkunapäpis tünicankunata, wachukunkunata y görrankunata shumaq kuyayllapäta ruratsinki. 41 Tsaykunata rurarkatsir wawqiki Aarónta y tsurinkunata jatitsinki. Umankunaman sagrädu aceitita wiñapanki sirvimaq sacerdötikuna kayänanpä.
42 “Tsaynölla penqayninta tsapananpä tseqllapita qonquryaq lïnupita calzoncïllunta ruratsinki. 43 Tsay calzoncïllutaqa Aarón y tsurinkunami jatikuyanqa Tinkunantsik Tolduman yaykuyänanpä. Tsaynin jatishqami Lugar Santucho kaq altarchöpis sirviyämanqa. Calzoncïllun jatishqa mana yaykurqa jutsayuq karmi wanuyanqa. Tsay ninqäkunaqa imayyaqpis leymi kanqa Aarónpä, tsurinkunapä y paypita aywaraqkunapäpis.