Warmikuna herenciata chaskiyänanpä tantiyatsinqan
27
Manasés trïbucho tsay ñañalla pitsqa warmikunapa jutinkunami karqan Maala, Noa, Hogla, Milca y Tirsa. Paykunaqa Zelofehadpa warmi tsurinkunami kayarqan. Zelofehadnami karqan Heferpa tsurin, Hefernami karqan Galaadpa tsurin, Galaadnami karqan Maquirpa tsurin, Maquirnami karqan Manaséspa tsurin, Manasésnami karqan Josépa tsurin. 2 Tsay pitsqan warmikunami Tinkuna Toldupa patiunman aywayarqan Moiséswan, sacerdöti Eleazarwan y wakin mandaqkunawanpis parlayänanpä. Chaykurmi niyarqan: 3 “Tsunyaq jirkachömi taytäkuna wanushqa. Tayta Diospa contran Coré shäriptin payqa manami jatikarqantsu tsay runakunawan wanunanpä, sinöqa qepatarämi kikinpa jutsanpita wanurqan. Taytäpaqa manami ollqu tsurin kashqatsu. 4 Tsaynö kaptinpis ollqu tsurin mana kanqallanpitaqa taytäkunapa jutin manami illakanmantsu. Mana illakänanpä taytäpa wawqinkunata chakrata rakipäyanqaykillacho noqakunatapis chakrata rakipaykayällämay”.5 Warmikuna tsaynö mañakuyaptinmi Moisésqa Tayta Diosta tapukurqan. 6 Tsaynö tapukuptinmi Tayta Dios nirqan: 7 “Zelofehadpa warmi tsurinkuna allitami yarpaykäyan. Zelofehadpa wawqinkunata rakipur ñöpankunallapa tsay warmikunatapis chakrata rakipunki. Tsaynöpami taytanpa trokin paykunana chakrata chaskiyanqa.† 8 Tsaynöpis Israel runakunata niy: ‘Pipis ollqu tsuriynaqlla wanuptinqa warmi tsurinpänami chakran kanqa. 9 Jukllayllapis tsurin mana kaptinmi itsanqa wawqinkunapäna tsay runapa chakran quëdanqa. 10 Wawqinkuna mana kaptinqa tiyunkunapänami chakran quëdanqa. 11 Taytanpa wawqinkuna mana kaptinqa mayqanpis legïtimu castanpämi chakran quëdanqa. Kay ninqäkunaqa leymi kanqa Israel runakuna imaypis cumpliyänanpä’ ”.
Moiséspa trokin kananpä Josuéta churanqan
12 Tsaypitanami Moisésta Tayta Dios nirqan: “Israel runakunata rikatsinäpä kaq nacionta rikanaykipä Abarim jirkakunaman witsämuy. 13 Tsaypita llapanta rikaskir wanukurmi wawqiki Aarónnö unay castaykikunawan tinkuq aywakunki. 14 Tsaynö wanunki Zin tsunyaq jirkacho Israel runakuna yakunar conträ parlayaptin mana cäsukamanqaykipitami. Qaqapita yakuta pashtatsimunqayki hörapis runakunata manami musyatsirqaykitsu santu kanqäta”.
(Tsaynö päsarqan Cades particho kaykaq Meriba pukyuchömi. Cadesqa Zin tsunyaq jirkachömi kaykan.)†
15 Tsaynö niptinmi Tayta Diosta Moisés nirqan: 16 “Tayta Dios, qammi pïmaytapis kawayta qaranki. Kananqa noqapa trokï juk mandaqta churaykullay 17 Israel runakuna maypa aywayaptinpis pushananpä, manatsayqa mitsiqniynaq üshanömi kayanqa”.†
18 Tsaynö niptinmi Tayta Dios nirqan: “Nunpa tsurin Josuémi† noqa munanqänö kawan. Qampa trokiki Israel runakunapa mandaqnin kananpä paypa umanman makikita churay. 19 Tsaypitana sacerdöti Eleazarman pushaykur llapan runakunapa ñöpancho mandaq kananpä churay. 20 Israel runakunata willay payta cäsukuyänanpä.† 21 Josué imatapis tapukamayta munarqa sacerdöti Eleazarmanmi aywanqa. Eleazarnami Josuépa jutincho Urim rumiwan† tapukamanqa. Imata rurananpäpis musyaykurmi Israel runakunata Josué mandanqa”.