3 Tsay witsanmi Israel runakuna Jericó tsimpan y Jordán mayu kaqlä Moab pampacho kaykäyarqan. Censananpä Tayta Dios niptinmi Israel mayinkunata Moiséswan Eleazar niyarqan: 4 “Tayta Dios ninqannölla ishkay chunka (20) watayuqpita janaman llapayki censakuyay”.

Egiptupita yarqamuq Israel runakunapa castankuna mayqan kayanqanpis kaychömi qellqaraykan:

5 Israelpa mayor tsurin Rubénpita aywaraqkunami kayarqan Enoc casta runakuna, Falú casta runakuna, 6 Hezrón casta runakuna y Carmi casta runakuna. 7 Rubénpita aywaraqkunata censayaptinmi chusku chunka kimsa waranqa qanchis pachak kimsa chunka (43,730) runakuna kayarqan.

8 Falúpa tsurinmi karqan Eliab. 9 Eliabpa tsurinkunami kayarqan Nemuel, Datán y Abiram. Datánwan Abiramqa mayor runakunami kayarqan. Paykunami Coréwan takukaykur Moiséspa, Aarónpa y Tayta Diospa contran shäriyarqan. 10 Tsaynö contran shäriyaptinmi patsa kichakar Datánta, Abiramta y Coréta ultaskirqan. Tsaynöllami ishkay pachak pitsqa chunka (250) qatiraqninkunatapis nina rupar usharqan. Tsay runakunaqa wanuyarqan wakin Israel runakunapis tantiyakuyänanpämi. 11 Corépa tsurinkunami itsanqa kawaykar quëdarqan.

12 Simeónpita aywaraqkunami kayarqan Nemuel casta runakuna, Jamín casta runakuna, Jaquín casta runakuna, 13 Zera casta runakuna y Saúl casta runakuna. 14 Simeónpita aywaraqkunata censayaptinmi ishkay chunka ishkay waranqa ishkay pachak (22,200) runakuna kayarqan.

15 Gadpita aywaraqkunami kayarqan Zefón casta runakuna, Hagui casta runakuna, Suni casta runakuna, 16 Ozni casta runakuna, Eri casta runakuna, 17 Arod casta runakuna y Areli casta runakuna. 18 Gadpita aywaraqkunata censayaptinmi chusku chunka waranqa pitsqa pachak (40,500) runakuna kayarqan.

19 Judápa tsurinkuna Er y Onán tsuriynaqlla Canaáncho wanuyashqa kaptinmi castankuna karqantsu. 20 Tsaymi Judápita aywaraqkuna kayarqan Sela casta runakuna, Fares casta runakuna y Zera casta runakuna. 21 Farespita aywaraqkunami kayarqan Hezrón casta runakuna y Hamul casta runakuna. 22 Judápita aywaraqkunata censayaptinmi qanchis chunka soqta waranqa pitsqa pachak (76,500) runakuna kayarqan.

23 Isacarpita aywaraqkunami kayarqan Tola casta runakuna Fúa casta runakuna, 24 Jasub casta runakuna y Simrón casta runakuna. 25 Isacarpita aywaraqkunata censayaptinmi soqta chunka chusku waranqa kimsa pachak (64,300) runakuna kayarqan.

26 Zabulónpita aywaraqkunami kayarqan Sered casta runakuna, Elón casta runakuna y Jahleel casta runakuna. 27 Zabulónpita aywaraqkunata censayaptinmi soqta chunka waranqa pitsqa pachak (60,500) runakuna kayarqan.

28 Josépita aywaraqkunami kayarqan Manasés trïbu runakuna y Efraín trïbu runakuna. 29 Manaséspita aywaraqkunami kayarqan Maquir casta runakuna y Galaad casta runakuna. Galaadqa Maquirpa tsurinmi karqan. 30 Galaadpita aywaraqkunami kayarqan Jezer casta runakuna, Helec casta runakuna, 31 Asriel casta runakuna, Siquem casta runakuna, 32 Semida casta runakuna y Hefer casta runakuna. 33 Heferpa tsurin Zelofehadpaqa manami ollqu tsurinkuna karqantsu, sinöqa warmillami tsurinkuna kayarqan. Tsay warmi tsurinkunapa jutinkunami kayarqan Maala, Noa, Hogla, Milca y Tirsa. 34 Manaséspita aywaraqkunata censayaptinmi pitsqa chunka ishkay waranqa qanchis pachak (52,700) runakuna kayarqan.

35 Efraínpita aywaraqkunami kayarqan Sutela casta runakuna, Bequer casta runakuna y Tahán casta runakuna. 36 Sutelapita aywaraqkunami kayarqan Erán casta runakuna. 37 Efraínpita aywaraqkunata censayaptinmi kimsa chunka ishkay waranqa pitsqa pachak (32,500) runakuna kayarqan. Tsaynömi Josépita aywaraqkuna castanpa castanpa karqan.

38 Benjamínpita aywaraqkunami kayarqan Bela casta runakuna, Asbel casta runakuna, Ahiram casta runakuna, 39 Sufam casta runakuna y Hufam casta runakuna. 40 Belapa tsurinkunami kayarqan Ardwan Naamán. Paykunapitami mirayarqan Ard casta runakuna y Naamán casta runakuna. 41 Benjamínpita aywaraq runakunata censayaptinmi chusku chunka pitsqa waranqa soqta pachak (45,600) runakuna kayarqan.

42 Danpita aywaraqkunami kayarqan Súham casta runakuna. 43 Súhampita aywaraq runakunata censayaptinmi soqta chunka chusku waranqa chusku pachak (64,400) runakuna kayarqan.

44 Aserpita aywaraqkunami kayarqan Imna casta runakuna, Isúi casta runakuna y Bería casta runakuna. 45 Beríapita aywaraqkunami kayarqan Heber casta runakuna y Malquiel casta runakuna. 46 Aserpa warmi tsurinpa jutinmi karqan Sera. 47 Aserpita aywaraq runakunata censayaptinmi pitsqa chunka kimsa waranqa chusku pachak (53,400) runakuna kayarqan.

48 Neftalípita aywaraqkunami kayarqan Jahzeel casta runakuna, Guni casta runakuna, 49 Jezer casta runakuna y Silem casta runakuna. 50 Neftalípita aywaraq runakunata censayaptinmi chusku chunka pitsqa waranqa chusku pachak (45,400) runakuna kayarqan.

51 Censayta ushaskir yupayaptinmi Israel runakuna soqta pachak juk waranqa qanchis pachak kimsa chunka (601,730) runakuna kayarqan.

52 Tsaypitanami Moisésta Tayta Dios nirqan: 53 “Censaskir cada trïbucho ayka runapis kayanqanman tupu chakrata rakipunki herenciankuna kananpä. 54 Atskaq kayaptinqa jatun chakrata rakipunki. Wallkaqlla kayaptinqa takshallata rakipunki. Censayta ushaskir ayka runapis kayanqanman tupu cada trïbuta rakipunki. 55 Cada trïbupä chakrata sortiyaypa rakipunki. Cada trïbumi chakrata chaskinqa taytan mayqan trïbupis kanqancho. 56 Tsaynö sortiyaypa rakipunki atskaq o wallkaqlla kayaptinpis”.^†

57 Levitakunata censarqa Gersón casta runakunata, Coat casta runakunata Merari casta runakunatami censayarqan. 58 Tsaynöllami tsay castakunacho kayarqan Libni casta runakuna, Hebrón casta runakuna, Mahli casta runakuna, Musi casta runakuna y Coré casta runakuna.

Coatpa tsurinmi karqan Amram. 59 Amrampa warminmi karqan Jocabed. Jocabedpis Leví trïbumi karqan. Payqa Egiptuchömi yurirqan. Amrampa y Jocabedpa wamrankunami kayarqan Aarón, Moisés y María. 60 Aarónpa tsurinkunami kayarqan Nadab, Abiú, Eleazar y Itamar.^† 61 Nadabwan Abiúqa Tayta Diospa ñöpancho llutalla inciensiuwan qoshnitsiyanqanpitami wanuyarqan.^†

62 Levitakuna chakrata mana chaskiyänanpä nishqa kaptinmi Israel mayinkunata censaskirrä paykunata censayarqan. Tsaymi levitakunaqa juk killayuqpita janaman censayaptin ishkay chunka kimsa waranqa (23,000) runakuna kayarqan.

63 Jericó tsimpan y Jordán mayu ñöpan Moab pampacho kaykarmi Israel mayinkunata Moiséswan sacerdöti Eleazar censayarqan. 64 Moiséswan Aarón Sinaí tsunyaq jirkacho Israel runakunata unay censayanqan witsan Moab pampacho censakuq runakuna manami mayqanpis censashqarätsu kayarqan.^a 65 Sinaí jirkacho censayanqan runakunaqa llapanpis Tayta Dios ninqannöllami tsunyaq jirkacho wanuyarqan. Tsaymi mayqanpis karqantsu qepa kaq censupäqa. Jefonipa tsurin Caleb y Nunpa tsurin Josuéllami kawaykar quëdayarqan.^†