Baal-peor diosta Israel runakuna adorayanqan
25
Sitimcho taykarmi Israel runakuna moabita warmikunawan kakuyarqan. 2 Tsaynöpis tsay warmikunaqa Israel runakunata pushayarqan sacrificiukunata rurar diosninkunata adorayänanpämi. Tsaynö pushayaptinmi Israel runakunapis moabita runakunapa diosninkunata adorayarqan. Nirkurmi diosninkunapä churayanqan mikuykunatapis mikuyarqan. 3 Baal-peor diosta† tsaynö adorayaptinmi Tayta Dios pasaypa ajanarqan. 4 Tsaymi Moisésta nirqan: “Israel runakunapa mandaqninkunata prësu tsariskir llapan runakuna rikaykäyaptin ñöpächo wanutsiy. Tsaynöparämi ajanaynï qallqunqa”.5 Tsaymi Israel runakunapa juezninkunata Moisés nirqan: “Trïbuykikunapita mayqan runapis Baal-peor diosta adoraq aywaqtaqa juklla wanutsiyay”.
6 Tsaynö niptinmi llapan Israel runakuna Tinkuna Toldupa patiuncho waqayarqan. Tsay hörami Moisés y wakin runakunapis rikaykäyaptin juk Israel runa mana penqakuypa madianita warmita toldunman yaykatsirqan. 7 Tsayta rikarmi sacerdöti Aarónpa willkan y Eleazarpa tsurin Finees pasaypa ajanarqan. Tsaymi qorikäyanqanpita lanzanta aptakurkur 8 aywarqan madianita warmita yaykatsinqan qepanpa toldun rurinyaq. Yaykuskirmi ñitinakushqa kaykaqta pachanpa päsaqpä tuksiskirqan. Tsayrämi mantsaypä qeshyawan Israel runakuna wanuykäyanqanpita pärayarqan. 9 Tsay mantsariypä qeshyawanmi ishkay chunka chusku waranqa (24,000) runakuna wanuyarqan.
10 Nirkurmi Moisésta Tayta Dios nirqan: 11 “Sacerdöti Aarónpa willkan y Eleazarpa tsurin Fineesmi pasaypa ajanaynïta qallqütsishqa. Paypis noqanömi pasaypa rabyanan pipis jutsata ruraptin. Jutsayuqta wanutsinqanpitami Israel runakunata ushaypa wanutsishqätsu. 12 Kanan Fineesta willay paywan pactu ruranqäta. 13 Pactuta rurarmi kikinta y paypita aywaraqkunata imayyaqpis sacerdöti kayänanpä churä. Noqata respitamar tsay jutsayuq runata wanutsinqanpitami Israel runakunapa jutsankunata perdonashqä”.†
14 Wanutsinqan Israel runapa jutinmi karqan Zimri. Payqa Salupa tsurin y Simeón trïbupa mandaqninmi karqan. 15 Wanutsinqan madianita warmipa jutinnami karqan Cozbi. Paymi karqan Zurpa tsurin. Zurnami karqan madianita runakunapa juk mandaqnin.
16 Tsaypitanami Moisésta Tayta Dios nirqan: 17 “Yaykuskir llapan madianita runakunata wanutsiyay. 18 Paykunami Israel runakunata yachayllapa engañayashqa Baal-peor diosninta adorayänanpä. Tsaynöllami madianita runakunapa mandaqninpa tsurin Cozbi mana penqakuypa llapanpa ñöpancho Zimripa toldunman yaykushqa paywan kakunanpä. Tsay warmitami wanutsishqa Israel runakunata mantsariypä qeshyawan wanuykätsinqä höra”.