24
Israel runakunata Tayta Dios bendisanqanta tantiyarmi Tayta Diosta tapukuq Balaam aywarqannatsu. Tsaypita tsunyaq jirkapa tikraskir 2 rikachakunqanchömi rikarqan Israel runakuna trïbunpa trïbunpa campamentunkunacho kaykaqta. Tayta Diospa Espïritun parlatsiptinmi 3 willakur nirqan:“Beorpa tsurin Balaammi kaykä.
Imanö kananpä kaqta Tayta Dios tantiyatsimaptinmi willakuykä.
4 Tayta Diosmi noqata parlapäman.
Llapanpä munayyuq Tayta Diosmi imatapis musyatsiman.
Paymi imatapis revelaman.
5 ¡Jacobpita aywaraq runakuna, kuyayllapämi tolduykikuna kaykan!
¡Israel runakuna, campamentuykiqa shumaqmi kaykan!
6 Palmëra jachakuna fïlayllanpa ichiraykaqnömi Israel runakuna kaykäyan.
Mayu kuchuncho huertata Tayta Dios plantanqannömi kaykäyan.
Tsaynöllami yaku kuchuncho jatusaq cedru jachakuna kaykaqnö kaykäyan.
7 Israel runakuna upuyänanpä y chakrankunata qarpayänanpä yaku manami pishinqatsu.
Paykunapa mandaqnin reyqa Agagpitapis mas munayyuqmi kanqa.
Munayyuq kanqan maytsaychömi musyakanqa.
8 Tayta Diosmi Israel runakunata Egiptupita jipimurqan.
Paymi poqushqa törunöpis kallpasapa kaykan.
Israel runakunaqa contran nacionkunata llapantami ushakätsiyanqa.
Tullunkunatapis pakiyanqami.
Flëchankunawanmi wanutsiyanqa.
9 Israel nacionqa imayka león cäzaqnömi kaykan.†
Paykunataqa pïmaymi mantsayan.
Israel runakuna, qamkunata bendisayäshuqnikitaqa Tayta Diospis bendisanqami.
Maldicionashuqnikitami itsanqa maldicionanqa”.†
10 Balaam tsaynö parlaqta wiyaykurmi Balacqa pasaypa ajar makintapis jitayparä nirqan: “Qamtaqa qayatsimushqä conträkunata maldicionanaykipämi. Tsaynö nikaptïpis kananwanqa kimsa kutinami paykunata bendisashqayki. 11 ¡Manarä imapis kanqanyaq wayikipa kutikuy! Qamta alli päganäpä kaykaptïpis Tayta Diosmi munashqatsu päguta chaskinaykita”.
12 Balaamnami nirqan: “Manarä shamurmi kachamunqayki runakunata nirqä: 13 ‘Palaciun juntata qorita y qellayta Balac entregamaptinpis Tayta Dios mana munanqantaqa manami imatapis parlashätsu’. Tsaynöllami nirqä Tayta Dios tantiyatsimanqallanta willanäpä kanqanta. 14 Markämannami kutikushä. Imanö kaptinpis manarä kutikur willashayki nacionnikita Israel runakuna imata rurananpä kanqantapis”.
Balaam masta willakunqan
15 Tsaymi Balaam willakur nirqan:
“Beorpa tsurin Balaammi kaykä.
Imanö kananpä kaqta Tayta Dios tantiyatsimaptinmi willakuykä.
16 Tayta Diosmi noqata parlapäman.
Poderyuq Tayta Diosmi imatapis tantiyatsiman.
Paymi imatapis musyatsiman.
Paymi imatapis revelaman.
17 Shamuq watakunacho imapis päsananpä kaqtami rikaykä.
Karucho kaykämuqtami rikaykä.
Jacobpita aywaraq runakunapitami juk qoyllur yurinqa.a
Israel nacionchömi munayyuq rey kanqa.
Moabita runakunatami ushakätsinqa.
Setpita aywaraqkunatapis ushakätsinqami.
18 Paymi Edom nacionta vincinqa.
Seir runakunatamib contran shäriyaptin munaynincho katsinqa.
Tsaynö vinciptinmi Israel runakuna pasaypa mantsariypä kayanqa.
19 Jacobpita aywaraqkunapitami munayyuq runa yurimunqa.
Ar markacho quëdaqkunatapis chipyaqmi ushakätsinqa”.
20 Tsaynö niskirmi amalecita runakuna täyanqanläpa rikaskir Balaam willakur nirqan:
“Amalecita runakunaqa kay patsacho pasaypa munayyuqmi kaykäyan.
Tsaynö karpis chipyaq ushakätsishqami kayanqa”.
21 Ceneo runakuna täyanqanläpapis rikaskirmi Balaam willakur nirqan:
“Markaykikunaqa mana ushakätsishqa kananpänömi kaykäyan.
Qaqa chawpincho qeshunömi kaykäyan.
22 Tsaynö kaykaptinpis Asiria soldädukuna shamur prësu tsariyäshuptikimi ushakäyanki”.
23 Tsaypita mastami Balaam nirqan:
“¡Kayrächi kayllaqa! Tayta Dios tsaynö mantsariypä ruraptin ¿pirä kawanqa?
24 Quitim islapitac büquikunawan shayämurmi Asiriacho markakunata raqällatana jaqiyanqa.
Heber runakunatapis chipyaqmi ushakätsiyanqa”.
25 Tsaypitanami Balaam kutikurqan wayinman. Tsaynöllami Balacpis aywakurqan.