Israel runakunata Balaam bendisanqan
23
Tsaychömi Balaam nirqan: “Qanchis altarta ruraskatsir qanchis torïtuta y qanchis carnëruta pishtashqallata apatsimuy”.2 Balaam ninqanta Balac ruraskatsiptinmi cada altarcho juk torïtuta y juk carnëruta rupatsiyarqan.
3 Nirkurnami Balaamqa Balacta nirqan: “Kayllacho shuyaykämay. Noqalla aywashä Tayta Dios imata nimanqantapis musyamunäpä. Kutiykamurnami imata nimanqantapis willashayki”. Tsaynö niskirmi Balaamqa tsunyaq jirkaman aywarqan.
4 Tsay jirkacho Tayta Dios yuripaptinmi Balaam nirqan: “Qanchis altarta ruraykurmi cada ünuncho juk torïtuta y juk carnëruta qampä rupatsishqä”.
5 Tsaynö niptinmi Balaamta Tayta Dios tantiyatsirqan Balac kaqman kutiykur imata willananpäpis. Nirkurmi nirqan: “Balac kaqman kutiykur ninqäkunata willanki”.
6 Tsaymi kutiykur Balacta tarirqan sacrificiuta rupaykätsinqanpa ñöpancho ichiraykaqta. Tsaychömi Moab nacionpa mandaqninkunapis kaykäyarqan. 7 Tsaymi Balaam nirqan:
“Moabpa mandaqnin rey Balacmi Arampita qayatsimashqa.
Rupay yarqamunanläpitami pushatsimashqa.
Kachamunqan runakunami niyämashqa:
‘Shamur Jacobpita aywaraq runakunata maldicionaykullay.
Israel runakuna ushakäyänanpä willakuykullay’.
8 Tsaynö niyämaptinpis Tayta Dios mana munaykaptinqa ¿imanöparä maldicionäman?
Tayta Dios mana nikaptinqa ¿imanöparä ushakäyänanpä willaküman?
9 Kay jirkapitami Israel runakunata rikaykä.
Kaypitami imanö kayanqantapis tantiyaykä.
Paykunaqa wakin nación runakunapita rakikashqami taykäyan.
Paykunawanqa manami tallukäyantsu.
10 Paykunaqa imayka aqushanömi tsaytsikaq kaykäyan.
¿Pirächi yupaytapis atipanman?
Ayka kanqantapis ¿pirächi musyanman?
Tayta Dios munanqannö kawaq runakuna kushishqa wanuyanqannömi noqapis wanuyta munä.
Paykunanö noqapis wanuküman”.
11 Tsaynö niptinmi Balaamta Balac nirqan: “¿Imatatä nikanki? Qamtaqa qayatsimushqä conträkunata maldicionanaykipämi. Tsaynö nikaptïpis qamqa bendisaykankimi”.
12 Tsaymi Balaam nirqan: “Noqaqa Tayta Dios tantiyatsimanqallantami parlaykä”.
Israel runakunata Balaam yapay bendisanqan
13 Balacnami nirqan: “Jukläman aku aywashun. Tsaypitami Israel runakunapa campamentunta wakillantapis rikanki. Tsay rikanqallaykitapis maldicionapaykallämay”.
14 Tsaymi Balaamta Balac pusharqan Pisga niyanqan jirkacho kaykaq Zofim pampaman. Tsaychömi qanchis altarta pirqaskir cada altarcho sacrificiupä rupatsirqan juk torïtuta y juk carnëruta. 15 Tsaychömi Balacta Balaam nirqan: “Kayllacho shuyaykämay. Noqaqa aywashä Tayta Dios imata yarpanqantapis musyamunäpä”.
16 Aywaptinmi Tayta Dios yuripaykur imata parlananpä kanqantapis tantiyatsirqan. Nirkurmi nirqan: “Balacman kutiykur tantiyatsinqalläta willanki”.
17 Tsaymi kutiykur Balacta tarirqan sacrificiuta rupaykätsinqanpa ñöpancho Moab nacionpa mandaqninkunawan ichiraykaqta. Tsaymi Balac tapurqan: “Tayta Dios ¿imatatä nishushqayki?”
18 Tsaymi Balaam willar nirqan:
“Ziporpa tsurin Balac, ninqäta shumaq wiyamay.
19 Tayta Dios manami runatsu llullakunanpä.
Pay awniskir manami jukta yarpannatsu.
Awninqantaqa cumplinmi.
20 Tayta Diosmi nimashqa bendisanäpä.
Tayta Dios bendisaykaptinqa ¿imanöparä maldicionäman?
21 Jacobpita aywaraqkunataqa Tayta Dios manami maldicionayta munantsu.
Payqa manami munantsu Israel runakunata desgracia päsananta.
Tayta Diosmi Israel runakunata yanapaykan.
Paymi mandaqnin rey kaykan.
22 Tayta Diosmi paykunata Egiptupita jipimurqan.
Payqa poqushqa törunöpis kallpasapami kaykan.
23 Jacobpita aywaraq runakunata contran maldicionaptinpis manami imapis päsanqatsu.
Israel runakunata brujyatsiptinpis manami chanqatsu.
Kananpitaqa Israel runakunatami niyanqa:
‘¡Tayta Dios yanapashurnikimi atska milagrukunata ruran!’
24 Israel runakunaqa leonnö mantsaypämi kaykäyan.
León imatapis tsariykur yawarninta upurrä jamanqannömi Israel runakunapis contrankunata vinciskirrä jamayan”.
25 Tsaynö niptinmi Balaamta Balac nirqan: “¡Tsay runakunata maldicionayta mana kamäpakurqa Tayta Diospa bendicionnintapis ama qoytsu!”
26 Tsaymi Balaam nirqan: “¿Manaku qamta nirqä Tayta Dios tantiyatsimanqallanta ninäpä kanqanta?”
Israel runakunata Balaam kimsa kutina bendisanqan
27 Tsaypitanami rey Balac nirqan: “Tsaynö kaptinqa jukläman aywaykulläshun. Tsaypita maldicionaptikiqa capazchi Dios ajananqatsu”.
28 Tsaynö nirmi Balaamta Peor jirkaman pusharqan. Tsaypitaqa entëru tsunyaq jirkami rikakan. 29 Tsaychömi Balacta Balaam yapay nirqan: “Kaycho qanchis altarta ruraskatsir qanchis torïtuta y qanchis carnëruta apamuy”.
30 Tsaynö niptinmi Balacqa llapanta rurarqan. Nirkurnami cada altarcho juk torïtuta juk carnëruta rupatsirqan.