2 Ziporpa tsurin Balacmi moabita runakunapa mandaqnin rey karqan. Paymi amorreo runakunata Israel runakuna imanö ushakäyanqantapis rikarqan. 3 Tsaynöllami Israel runakuna tsaytsika kayanqanta rikar rey Balac y moabita runakuna pasaypa mantsariyarqan. 4 Tsaymi Madián nacioncho taq mayor runakunata nirqan: “Qewata pitsaypa pitsar wäka ushaqnörächi tsaytsika Israel runakunaqa ushakätsimäshun”.

Tsaymi Ziporpa tsurin Balac 5 Beorpa tsurin Balaamta^† qayatsirqan Israel runakunata maldicionananpä. Balaam taykarqan Éufrates mayu ñöpan Petor markachömi.^a Tsay markaqa kaykan amavita runakuna täyanqanchömi. Balaam kaqman manarä aywayaptinmi kachanqan runakunata yätsir Balac nirqan: “Egiptupita tsaytsika runakuna yarqamurmi täyanqä kaqman ishniypa chäyämushqa. 6 Rey Balac musyanshi pipis bendicionta chaskinanpä niptiki bendicionta chaskinanpä kanqanta y maldicionashqa kananpä niptiki maldicionashqa kananpä kanqanta. Tsaymi rugakulläshunki juklla aywar tsay runakunata maldicionaykunaykipä. Maldicionaptikiqa tsaytsika kayaptinpis vincirnin nacionnïpita qarquyäshämi”.

7 Tsaynö yätsiskiptinmi maldicionananpä qellayta apakurkur Moab y Madián mayor runakuna Balaam kaqman aywayarqan. Chaykurmi Balac ninqannölla llapanta willayarqan. 8 Willayaptinmi Balaam nirqan: “Kanan paqas kayllacho quëdakuyay. Waraynami willayäshayki Tayta Dios imata nimanqantapis”.

Tsaymi Moab mayor runakuna tsayllacho quëdakuyarqan. 9 Tsay paqasmi Tayta Dios yuripaykur Balaamta tapurqan: “Wayikicho ¿pikunatä patsaraykäyan?”

10 Balaamnami nirqan: “Moab nacionpa mandaqnin rey Balac kachamunqan runakunami patsaraykäyan. Paykunami niyämashqa 11 atska runakuna Egiptupita shamur entëru nacionninman juntaqpä chäyanqanta. Tsay runakunata vincir nacionninpita qarquyänanpämi Balac munan maldicionanäta”.

12 Balaamtami Tayta Dios nirqan: “Ama tsay runakunawan aywaytsu ni nacionninman chaq runakunata ama maldicionaytsu. Paykunamanqa noqami bendicionnïta churashqä”.

13 Tutalla shärikuskirnami Balaamqa Balac kachanqan runakunata nirqan: “Markaykikunaman kutikuyay. Tayta Dios manami munantsu qamkunawan aywanäta”.

14 Tsaynami Moab mayor runakuna Balac kaqman kutiykur niyarqan: “Balaamqa manami munantsu noqakunawan shamuyta”.

15 Tsaymi wakin kaqpitapis mas respitashqa y mas atskaq mayor runakunatana Balac kacharqan. 16 Paykunami Balaamman chaykur niyarqan: “Ziporpa tsurin Balacmi rugakushunki aywanaykipä. 17 Aywaptikiqa alli pägashurnikishi imata munanqaykitapis kamaripäshunki. Jukllashi aywaykulläshun tsay runakunata maldicionaykunaykipä”.

18 Balac kachanqan runakunatami Balaam nirqan: “Palaciun juntata qorita y qellayta Balac entregamaptinpis Tayta Diosnï mana munanqantaqa manami imatapis parlashätsu. 19 Imanö kaptinpis kanan paqas kaycho quëdakuyay. Mä imatashi Tayta Dios nimanqa”.

20 Tsay paqasnami Balaamta yuripaykur Tayta Dios nirqan: “Pushayäshunaykipä tsay runakuna shayämushqa kaptinqa paykunawan ayway. Itsanqa noqa ninqalläta ruranki”.

21 Tsaymi Balaamqa tutalla shärikuskir ashnunta sillakurkur Moab mayor runakunawan aywarqan. 22 Ishkay wätayninkunata pushakurkur ashnun muntashqa Balaam aywaykaptinmi Tayta Dios ajanar angelninta kachamurqan nänicho tsapänanpä. 23 Tayta Diospa angelnin espädan aptashqa nänicho ichiraykaqta rikaykurmi Balaampa ashnun jukläpa yaqarqan. Tsaynö ashnun yaqaptinmi nänipa kutinanpä garutirqan.

24 Tsay aywaykanqan nänimi üva chakra chawpinpa päsarqan. Näni ishkanläpa pirqashqa kaptinmi kichkicho Tayta Diospa angelnin yapay ichiskirqan. 25 Angelta rikaykurmi ashnuqa pirqa kuchucho Balaampa chankanta tinkuskatsirqan. Tsaymi ajanarnin ashnunta yapay garutirqan.

26 Tsaypita Tayta Diospa angelnin puntaskir kichki nänicho ichiskiptinmi maypa päsaytapis kamäpakurqantsu. 27 Angelta rikaykur ashnu jitakaskiptinmi Balaam pasaypa ajanarnin garutirqan. 28 Tsaymi Tayta Dios parlatsiptin ashnuqa Balaamta nirqan: “Qamtaqa ¿imanashqätä? Kananwanqa kimsa kutinami garutimanki”.

29 Balaamnami nirqan: “Qamqa burlakaykämankimi. Cuchillü kaptinqa maynami wanuratsïman karqan”.

30 Ashnunami nirqan: “Noqaqa muntashqa purinayki ashnuykimi kaykä. Manami malamäñatsu kä”.

Tsaynö niptinmi Balaam tantiyakur nirqan: “Awmi, rasun kaqtami nimanki”.

31 Tsaypitanami angelta Balaam rikananpä Tayta Dios kamakätsirqan. Pullan nänicho espädan aptashqa ichiraykaqta rikaykurmi Balaam mantsarirnin patsaman lätakaykurqan. 32 Tayta Diospa angelninnami nirqan: “¿Imanirtä kimsa kuti ashnuykita garutishqayki? Noqami kay nänicho tsapashqä llutan yarpaywan aywaptiki. 33 Ashnuykiqa rikamarmi jukläpa yaqar, ichikuykushqa y jitakakuykushqa. Tsaynö mana ruraptinqa qamta wanutsiptï ashnullaykinami kawaykanman karqan”.

34 Balaamnami nirqan: “Taytay, perdonaykallämay. Manami musyashqätsu tsapaykämanqaykita. Aywanäta mana munaptikiqa kayllapitachi kutikushä”.

35 Tsaymi Tayta Diospa angelnin nirqan: “Tsay runakunawan ayway. Itsanqa noqa ninqallätami imatapis ninki”.

Tsaypitanami Balac kachamunqan runakunawan Balaam aywarqan.

36 Balaam aywanqanta musyaskirmi Balac taripaq aywarqan Arnón mayu kuchuncho juk markayaq. Tsay markaqa Moab nacionpa lindërunchömi kaykan. 37 Balaamwan tinkuskirmi Balac nirqan: “Qayatsimuptï ¿imanirtä shamuyta munashqaykitsu? ¿Mana päganäpä kanqantaku yarpashqayki?”

38 Balaamnami nirqan: “Kaychönami kaykä. Itsanqa kikïpa yarpaynïpita manami imatapis parlashätsu, tsaypa trokinqa Tayta Dios tantiyatsimanqallantami nishä”.

39 Tsaypitanami Balaamqa Balacwan aywarqan Quiriat-huzotman. 40 Tsaychömi wäkakunata, üshakunata y cabrakunata pishtaskatsir sacrificiuta Balac rurarqan. Tsay aytsatami Balaamta y paywan kaykaq mayor runakunatapis qararqan.

41 Tsaypita waraynin tutanami Balaamta Balac pusharqan Bamot-baal jirkaman. Tsay jirkapitami Israel runakunapa campamentunkuna rikakarqan.