Arad runakunata Israel runakuna vinciyanqan
21
Neguevcho Arad markapa mandaqnin reymi cananeo runa karqan. Paymi Israel runakuna Atarim nänipa aywaykäyanqanta musyaskir soldädunkunawan atacaq aywayarqan.† Tsaycho pelyarmi juk ishkay Israel runakunata prësu tsariyarqan. 2 Tsaymi Israel runakuna Tayta Diosta mañakur niyarqan: “Arad runakunata vinciyänäpä yanapayämaptikiqa caseriunkunatapis chipyaqmi ushakätsiyäshä”.3 Israel runakuna mañakuyanqannölla Tayta Dios yanapaptinmi cananeo runakunata y markankunatapis chipyaq ushakätsiyarqan. Tsaynö ushakätsiyanqanpitami tsay partipa jutin Hormaa karqan.
Broncipita culebrata Moisés ruranqan
4 Hor jirkapita Israel runakuna aywakurmi Edom nacionman mana yaykuyänanpä Puka Lamarpa aywaq nänipa† tumayarqan. Tsaynö ñakar aywaykäyaptinmi pacienciankunapis ushakarqan. 5 Tsaymi Tayta Diospa y Moiséspa contran niyarqan: “Kay tsunyaq jirkacho wanuyänäpä ¿imapätä Egiptupita pushayämarqayki? Kaychöqa manami mikuypis ni yakupis kantsu. Qoyay qoyay tsay mikuyllata mikur pasaypanami ajayäyashqä”.
6 Tsaynö parlayaptinmi wanutsikuq culebrakunata Tayta Dios yuritsimurqan. Culebrakuna kaniyaptinmi atskaq wanuyarqan.† 7 Tsaymi Moisés kaqman aywaykur niyarqan: “Tayta Diospa contran y qampa contrayki parlar jutsata rurayanqäpita culebrakunata illakätsinanpä Tayta Diosta mañakuykullay”.
Tsaymi Moisés mañakuptin 8 Tayta Dios nirqan: “Juk culebrata broncipita ruray. Tsayta qerupa puntanman watarkur ichïtsinki. Pitapis culebrakuna kaniptinqa broncipita ruranqayki culebrata ras rikayätsun mana wanuyänanpä”.
9 Tsaynö niptinmi broncipita culebrata Moisés ruraskir qerupa puntanman watarkur ichïtsirqan. Culebra kaniptin broncipita rurashqa culebrata pipis ras rikarqa manami wanurqannatsu.†
Israel runakuna Moabman aywayanqan
10 Tsaypita Israel runakuna aywarmi Obotcho patsakuyarqan. 11 Obotpita päsarmi tsunyaq Ije-abarimcho patsakuyarqan. Tsay partiqa kaykan Moabpita rupay yarqamunanlächömi. 12 Tsaypita aywakurnami Zered raqra ñöpancho patsakuyarqan. 13 Tsaypita aywakurnami Arnón mayu tsimpancho patsakuyarqan. Arnón mayuqa tsunyaq jirkapa päsarmi amorreo runakunapa y moabita runakunapa lindërun kaykan. 14 Israel Runakunata Guërracho Tayta Dios Yanapanqan jutiyuq libruchömi qellqaraykan:
“Sufá particho kaykaq Vaheb markapami päsayarqä.
Raqrakunapa aywarmi Arnón mayupa tsimpayarqä.
15 Tsaypita juk raqraman aywarmi Ar partiyaq chäyarqä.
Tsay raqrami Moab nacionpa lindërunyaq chan”.
16 Arnón mayupita aywakurmi Beer pözuyaq chäyarqan. Tsay pözuchömi Moisésta Tayta Dios nirqan: “Israel runakunata qoriy yakuta upuyänanpä”.
17 Tsaycho yakuta tariskirmi Israel runakuna cantar niyarqan:
“¡Pukyucho yaku mana tsakiypa kaykullätsun!
¡Yaku pashtamunqanpita cantashun!
18 Mandaqkunami pözuta uchkuyarqan.
Respitashqa runakunami tukrunkunawan uchkuyarqan”.
Tsay tsunyaq jirkapita aywarmi Israel runakuna Matana partiman chäyarqan. 19 Matanapita aywarmi Nahalielman chäyarqan. Nahalielpita aywarnami Bamotman chäyarqan. 20 Bamotpita aywakurnami Moab nacioncho kaykaq tsunyaq pampaman chäyarqan. Tsaypitami Pisga niyanqan jirka rikakan.
Rey Sehónta Israel runakuna vinciyanqan
21 Tsay pampaman manarä charmi Israel runakuna willakuqta kachayarqan amorreo runakunapa mandaqnin rey Sehónta niyänanpä: 22 “Taytay, nacionnikipa päsakuykuyälläshä. Manami murushqa chakraykikuna ni üva chakraykikuna jananpapis päsayäshätsu. Manami pözuykikunapita yakutapis upuyäshätsu. Jatun nänillapami päsakuyäshä”.
23 Tsaynö rugakuyaptinpis rey Sehónqa manami munarqantsu Israel runakuna nacionninpa päsayänanta. Tsaymi llapan soldädunkunata qoriskir Israel runakunata atacayänanpä tsunyaq jirkaman aywayarqan. Jahazacho tinkurmi paykunata atacayarqan. 24 Tsaynö atacayaptinmi Israel runakuna vinciyarqan. Vinciskirmi markankunata y chakrankunata Arnón mayupita Jaboc mayuyaq qechuyarqan. Amonita runakunapa lindërun alli sigurashqa kaptinmi paykunapa lindërunyaqlla qechuyarqan.
25 Amorreo runakunapa markankunata qechuskirmi Hesbóncho y caseriunkunachöpis Israel runakuna täyarqan. 26 Hesbónqa amorreo runakunapa mandaqnin rey Sehón tanqan markami karqan. Israel runakuna Hesbón markata manarä qechuyaptinmi Sehónqa Moab nacionpa mandaqnin reywan guërrata rurayarqan. Tsay reyta vinciskirmi moabita runakunapa chakrankunata Arnón mayuyaq qechuyarqan. 27 Tsaypitami poesíata recitaqkunapis niyan:
“¡Hesbón markaman llapayki shayämuy!
Rey Sehónpa jatun markanta yapay shäritsiyay.
28 Sehónpa markan Hesbónpitami mantsariypä ninanörä soldädukuna yarquyarqan.
Paykunami Moabcho kaykaq Ar markayaq llapanta ushakätsiyarqan.
Arnón mayu ñöpancho kaykaq jallqakunayaqmi tsaynö ushakätsiyarqan.
29 ¡Allaw, moabita runakuna!
Quemos jutiyuq diostab adoraqkuna, ushakashqami kayanki.
Amorreo runakunapa mandaqnin rey Sehón shamuptinmi Quemos diosniki kachariykushurniki yanapayäshurqaykinatsu.
Tsaymi ollqu kaqkuna qeshpir aywakuyarqan.
Warmi kaqkunatapis prësu tsariskirmi apakuyarqan.†
30 Mandanqan markakunatami ushakätsiyarqä.
Tsaymi Hesbón markapita Dibón markayaq wanuyarqan.
Tsaynöllami Nofapita Medebayaq ushakätsiyarqä”.
Rey Ogta Israel runakuna vinciyanqan
31 Tsaynöpami Israel runakunaqa amorreo runakunapa markankunacho täyarqan. 32 Tsaypitanami runakunata Moisés kacharqan Jazer markata rikapakayämunanpä. Kutiskayämuptinnami Jazercho y ñöpan markakunacho taq amorreo runakunata qarquskir Israel runakuna tsaycho täyarqan. 33 Nirkurnami Israel runakuna Basán nacionman aywaq nänipana aywayarqan. Tsayta musyaskirmi Basán nacionpa mandaqnin rey Og soldädunkunawan Edreiman aywayarqan Israel runakunawan pelyayänanpä. 34 Tsaymi Moisésta Tayta Dios nirqan: “Tsay runakunata ama mantsaytsu. Noqami yanapashayki llapan soldäduntinta vincir nacionnintapis munaynikicho katsiyänaykipä. Hesbóncho taq amorreo runakunapa mandaqnin rey Sehónta vinciyanqaykinöllami paykunatapis vinciyanki”.
35 Tayta Dios ninqannöllami rey Ogta, tsurinkunata y llapan soldädunkunatapis Israel runakuna wanutsiyarqan. Tsaychöqa pitapis kawaykaqta mana dëjarmi llapan chakrankunawanpis quëdakuyarqan.