2 Tsaycho yaku mana kaptinmi Israel runakuna Moiséspa y Aarónpa contran shärir 3 niyarqan: “¡Kaynö ñakayänäpa trokinqa allimi kanman karqan wakin Israel runakunata Tayta Dios castigaptin wanuyanqallancho noqakunapis wanuyaptï! 4 Tayta Dios kuyanqan runakuna kaykäyaptïqa ¿imapätä kay tsunyaq jirkaman pushayämashqayki? ¿Uywantin ushakäyänätaku munaykäyanki? 5 ¿Imapätä Egiptupita kay mana yachakaypä jirkaman pushayämashqayki? Kaycho murukuyänäpä mana alli kaptinmi hïguspis, üvapis ni granädapis kantsu. ¡Manami yakupis upuyänäpä kantsu!”

6 Tsaynö niyaptinmi Moiséswan Aarón Tinkuna Toldupa patiunman aywaykur pasaypa llakikurnin patsaman lätakaykuyarqan. Tsay höra chipipiynin rikakämuptinmi 7 Moisésta Tayta Dios nirqan: 8 “Tukruykita aptarkur wawqiki Aarónwan llapan runakunata qoriskir paykunapa rikanancho taqay qaqata parlapay yaku yarqamunanpä. Tsaymi qaqapita yaku yarqamunqa paykunapis uywankunapis upuyänanpä”.

9 Tsaymi Tayta Dios ninqannölla babul ñöpancho kaykaq tukrunta Moisés aptarkurqan. 10 Nirkurnami wawqin Aarónwan qaqa ñöpanman llapan runakunata qoriykur nirqan: “Mana wiyakuq runakuna, ¿manatsurä kay qaqapita yakuta upuyänaykipä jipiyämüman?”

11 Tsaynö nir aptaraykanqan tukrunwan ishkay kuti qaqata takaykuptinmi atska yaku yarqamurqan. Tsaytami runakunapis uywakunapis upuyarqan.

12 Tsaypitanami Aarónta y Moisésta Tayta Dios nirqan: “Noqaman mana yärakurmi santu kanqäta Israel runakunata tantiyatsiyashqaykitsu. Tsaymi kay runakunata awninqä nacionman yaykatsiyankitsu”.

13 Tsaycho Tayta Diospa contran Israel runakuna parlayanqanpitami yaku pashtamunqan sitiupa jutin Meriba.^a Tsaychömi Tayta Dios musyatsirqan santu kanqanta.

14 Cades particho Israel runakuna taykäyaptinmi willakuqkunata Moisés kacharqan Edom nacionpa mandaqnin reyta niyänanpä: “Castayki Israel runakunami kayä. Qamqa musyankimi pasaypa ñakayanqäta. 15 Unay castäkuna Egiptuman aywayanqanpita patsami tsaycho täyashqä. Paykunata ñakatsiyanqannöllami Egipto runakuna noqakunatapis ñakatsiyämashqa. 16 Tsaynö ñakar Tayta Diosta mañakuyaptïmi angelninta kachamushqa Egiptupita jipiyämänanpä. Tsaynöpami nacionnikipa lindërun cercan Cadeschöna kaykäyä. 17 Taytay, nacionnikipa päsaq nänillapa päsakuykuyälläshä. Chakraykikuna jananpa ni üva plantaykikuna jananpa manami päsayäshätsu. Tsaynöpis pözuykicho yakuykitapis manami upuyäshätsu. Maypapis mana yaqayllapami jatun nänillapa päsakuyäshä”.

18 Tsaynö niyaptinmi Edom nacionpa mandaqnin rey nirqan: “Nacionnïpa manami päsayankitsu. Yaykayämuptikiqa soldädükunawanmi atacayäshayki”.

19 Israel runakunanami yapay niyarqan: “Jatun nänillapami päsakuyäshä. Noqakunapis uywäkunapis yakuykita upurqa pägayäshaykimi. Nacionnikipa päsaq nänillapa päsakuykuyälläshä”.

20 Tsaynö niyaptinnami Edom nacionpa mandaqnin rey nirqan: “¡Manami päsayankitsu!”

Tsaynö mana munarmi kamarikuskir tsaytsika soldädunkunawan Israel runakunata atacayänanpä aywarqan. 21 Edom nacionpa mandaqnin rey päsayänanta mana munayaptinmi Israel runakuna juk nänipana aywakuyarqan.^†

22 Israel runakuna Cadespita aywakurmi Hor jirkaläman chäyarqan. 23 Hor jirkapis Edom nacionpa lindërun cercanchömi karqan. Tsayman chaykuyaptinmi Moiséstawan Aarónta Tayta Dios nirqan: 24 “Aarónqa wanukunqanami. Meriba pukyu pashtaqcho ninqäta mana cäsukayämanqaykipitami Israel runakunata rikatsinäpä kaq nacionman yaykunqanatsu. 25 Aarónta y tsurin Eleazarta Hor jirkaman pushay. 26 Tsaychömi sacerdöti kanqan latsapanta Aarónta jipiskatsir tsurin Eleazarta jatitsinki. Aarón tsaycho wanurmi unay castankunawan tinkuq aywakunqa”.

27 Tayta Dios ninqannöllami llapan Israel runakuna rikaykäyaptin Aaróntawan Eleazarta pushakurkur Hor jirkaman Moisés witsarqan. 28 Tsaychönami mandaq sacerdöti kay latsapanta Aarónta jipiskatsir tsurin Eleazartana jatitsirqan.^† Tsay jirkacho Aarón wanuskiptinmi^† Moiséswan Eleazarllana kutiyämurqan. 29 Aarón wanunqanta musyaykurmi Israel runakuna juk killa lütuyarqan.