Impüru kayanqanpita purificakuyänanpä ninqan
19
Tsaypitanami Moiséstawan Aarónta Tayta Dios nirqan: 2 “Israel mayikikunapämi kay ley kaykan: Manarä yügushqa sänu puka wäkata Israel runakuna apayämutsun. 3 Tsayta chaskiskir sacerdöti Eleazar campamentupita jukläman apaykatsir rikaraykar pishtatsinqa. 4 Tsay wäkapa yawarninman dëdunta jatiykurmi sacerdöti Eleazar Tinkuna Toldu kaqmanpa qanchis kuti tsaqtsunqa. 5 Nirkurmi Eleazar rikaykaptin patsallancho tsay wäkapa qaranta, aytsanta, yawarninta y panzantapis rupatsinqa. 6 Tsay rupatsinqanmanmi cedru qeruta, juk llimlla hisöputa y puka tëlata sacerdöti Eleazar jitaykunqa.7 “Tsaypitanami sacerdötiqa bäñakuskir y taqshakuskir campamentuman kutinqa. Tsaynö rurarpis patsa tsakanqanyaqmi impüru kanqa. 8 Tsaynöllami wäkata pishtaskir rupatsiq runapis taqshakuskir bäñakunqa. Paypis patsa tsakanqanyaqmi impüru kanqa.
9 “Tsaypitanami püru kaykaq juk runana wäka rupanqan uchpata qoriskir limpiu partiman apaykur churanqa. Tsay uchpatami Israel runakuna yakuman wiñayanqa purificakuna yaku kananpä.† Tsay yakumi purificatsina sacrificiu kanqa. 10 Uchpa qoriqpis latsapanta taqshakurmi patsa tsakanqanyaq impüru kanqa. Tsay ninqäkunaqa imayyaqpis leymi qamkunapä y qamkunacho taq jäpa runakunapäpis kanqa.
11 “ ‘Pipis ayata yataq kaqmi qanchis junaqyaq impüru kanqa. 12 Yatanqanpita kimsa junaqcho y qanchis junaqchöpis purificatsina yakuwan purificakunqa. Kimsa junaqcho ni qanchis junaqchöpis mana purificakurqa manami pürutsu kanqa. 13 Pipis ayata yataykur mana purificakurqa Tayta Diospa Sagrädu Tolduntami impüruyätsinqa. Purificatsina yakuwan mana tsaqtsushqa karqa impürullami kanqa. Tsay runataqa Israel runakunapita qarquyanki.
14 “ ‘Pipis toldun rurincho wanuptinqa tolducho kaykaqpis y tolduman yaykuqpis qanchis junaqyaqmi impüru kanqa. 15 Mana alli tsapashqa mankakunapis impürumi kanqa. 16 Tsaynöllami tanqanpita juklächo espädawan runa wanutsinqan ayata yatarpis, kikillan wanushqata yatarpis, runapa tullunta yatarpis o aya pamparanqanta yatarpis qanchis junaqyaq impüru kanqa.
17 “ ‘Tsay runa purificakunanpämi puka wäkata rupatsinqanpa uchpanta mankaman wiñarkur chuya yakuta wiñanqa. 18 Nirkurnami püru kaykaq runa tsay yakuman hisöpu llimllata jatiykur tsaqtsupanqa impüru runa tanqan tolduta, toldu rurincho llapan imaykankunata y llapan tsaycho taqkunatapis. Tsaynöllami tsaqtsupanqa impüru runatapis tulluta yatashqa kaptin, runa wanutsinqan ayata yatashqa kaptin, kikillan wanushqa runapa ayanta yatashqa kaptin o aya pamparanqanta yatashqa kaptinpis. 19 Impüru kaykaq runatami tsaynö tsaqtsupanqa kimsa junaqcho y qanchis junaqchöpis. Qanchis junaqchönami impüru runa taqshakuskir bäñakunqa. Patsa tsakaskiptinnami püruna kanqa.
20 “ ‘Pipis impüru kanqanpita mana purificakurqa Sagrädu Toldutami impüruyätsinqa. Purificatsina yakuwan mana tsaqtsupashqa karqa impürullami kanqa. Tsay runataqa Israel runakunapita qarquyanki.
21 “ ‘Kay ninqäkunaqa imayyaqpis leymi qamkunapä kanqa. Purificatsina yakuwan tsaqtsupaq kaqmi latsapanta taqshakunqa. Purificatsina yakuta yataq kaqpis patsa tsakanqanyaqmi impüru kanqa. 22 Impüru runa imata yatanqanpis impürumi kanqa. Impüru runata yataq runapis patsa tsakanqanyaqmi impüru kanqa’ ”.