Sacerdötikunata levitakuna yanapananpä ninqan
18
Tsaypitanami Aarónta Tayta Dios nirqan: “Qamwan tsurikikuna y Leví trïbu mayikikuna Sagrädu Tolducho imatapis llutanta rurarqa jutsayuqmi rikakuyanki. Sacerdöti rurananpä kaqkunata imatapis llutanta rurarmi itsanqa qamwan tsurikikunalla jutsayuq rikakuyanki.2 “Qamta y tsurikikunata yanapayäshunaykipä Leví trïbu mayikikunata willanki. Paykunami Pactu Tolducho sirviyaptiki ima ruraykunachöpis yanapayäshunki. 3 Ninqaykita rurarmi tsay tolduta täpayanqa. Itsanqa sagrädu kaqkunaman ama witiyätsuntsu ni patiucho kaykaq altarpa ñöpanmanpis ama yaykuyätsuntsu. Yaykur o witirqa paykunapis qamkunapis wanuyankimi. 4 Levitakunallami Tinkuna Tolducho ima ruraykunachöpis yanapayäshunki. Qamkuna rurayänaykipä kaqkunamanqa jäpa runakuna ama witiyämutsuntsu.
5 “Qamkunallami altarcho y tolducho rurayänaykipä kaqkunata rurayanki. Kay ninqäkunata cäsukuyaptikiqa Israel runakunata manami castigashänatsu. 6 Israel runakunapitami Leví trïbu mayikikunata akrashqä Tinkuna Tolducho ruraykunata yanapayäshunaykipä. 7 Qamta y tsurikikunata sirvimaq sacerdöti kayänaykipä churashqa kaptïmi qamkunalla altarcho y Lugar Santïsimucho rurayänaykipä kaqkunata rurayanki. Jäpa runa kaykar pipis tsayman yaykuq kaqmi itsanqa wanunqa”.
Sacerdötikunapa derëchun ima kanqanpis
8 Tsaypitanami Aarónta Tayta Dios nirqan: “Israel runakuna noqapä apayämunqanta qammi rikanki. Tsay apayämunqan sagrädu kaqkunatami qamtawan tsurikikunata entregashqä. Kay ninqäkunaqa imayyaqpis leymi qamkunapä y qamkunapita aywaraqkunapä kanqa. 9 Israel runakuna sacrificiupä apamur altarcho mana rupatsiyanqankunaqa qamkunapämi kanqa, tsaki mikuy ofrenda, purificatsina sacrificiu y consagratsina sacrificiu karpis. Llapanpis tsay sagrädu kaqkuna qampä y tsurikikunapämi kanqa. 10 Ollqu kaqkunallami tsay sagrädu kaqkunata sagrädu sitiucho mikuyanki.
11 “Tsaynöllami ñöpächo joqarkur wakman kayman kuyutsinqayki ofrendakuna qampä, ollqu tsurikikunapä y warmi tsurikikunapä kanqa. Tsay ofrendakunataqa püru kaqkunallami mikuyanqa. Kay ninqäkunaqa imayyaqpis leymi kanqa qamkunapä y qamkunapita aywaraqkunapä.
12 “Tsaynöllami punta poquqta cosechayanqanpita allinnin kaq aceitita, vïnuta y trïguta noqapä primicia apayämunqankuna qampä kanqa. 13 Llapan cosëchankunapita punta poquqkunata noqapä apayämunqankunapis qampämi kanqa. Tsaykunataqa püru kaq castaykikunallami mikuyanqa. 14 Israel runakuna imatapis noqapä apayämunqanqa† llapanpis qampämi kanqa.
15 “Israel runakunapa mayor ollqu wamrankuna y malta uywankunapa punta yuriq orqu wawankunapis noqapä apayämunqanqa qampämi kanqa. Tsaynö kaptinpis mayor wamranta y impüru uywakunapa punta yuriq wawanta entregayäshunaykipa trokinmi qellayta apayämunqa. 16 Yurinqanpita juk killayuq kaykaptinmi apayämunqa pitsqa siclo qellayta. Tsay qellaykunatami pësanqa Tinkunantsik Sagrädu Tolducho kaykaq pësakunawan. Tsay pësakunawan pësaptinmi juk siclo kanqa chunka juk grämu.
17 “Wäkapa, üshapa y cabrapa punta yuriq wawanpa chaninta apayämunanpa trokinmi kikin uywata apayämunqa. Tsaykuna noqapä kaptinmi pishtaskir altar jananman yawarninta jichanki y wirantapis altar janancho rupatsinki. Tsay rupatsinqaykipa mushkuyninmi noqapa shonqüpänö kanqa. 18 Tsay uywakunapa aytsanpis qampämi kanqa. Ñöpächo joqarkur wakman kayman kuyutsinqayki uywapa derëcha kaq chankanwan pëchunpis qampämi kanqa. 19 Israel runakuna noqapä llapan apayämunqanmi qampä, ollqu tsurikikunapä y warmi tsurikikunapä kanqa. Kay ninqäkunaqa imayyaqpis leymi kanqa qampä y qampita aywaraqkunapä. Qampä y qampita aywaraqkunapä imayyaqpis tsaynö kananpämi awniykä”.
Levitakunapa derëchun ima kanqanpis
20 Tsaypitanami Aarónta Tayta Dios nirqan: “Israel runakuna chaskiyänanpä kaykaq nacionman chaykur chakrankunata chaskiyaptinpis qam y tsurikikunaqa manami chaskiyankitsu. Chakrata chaskiyänaykipa trokinqa noqami qamkunapa herenciaykikuna kashä. 21 Leví trïbu mayikikunapämi Israel runakuna apayämunqan diezmukuna kanqa. Tsay diezmukunami paykunapä kanqa Tinkuna Tolducho sirviyämanqanpita.†
22 “Leví trïbupita mana kaykar Tinkuna Tolduman pipis witirqa wanunqami. 23 Tsaymi levitakunalla Tinkuna Tolducho rurayänanpä kaqkunata rurayanqa. Tsaycho imatapis llutanta rurarqa jutsayuqmi rikakuyanqa. Tsay ninqäkunaqa imayyaqpis leymi kanqa qamkunapä y qamkunapita aywaraqkunapä.
“Israel nacioncho levitakunapa chakrankuna manami kanqatsu. 24 Tsaynö kanqatsu Israel runakuna noqapä apayämunqan diezmukuna paykunapä kaptinmi”.
25 Moiséstami Tayta Dios nirqan: 26 “Levitakunata niy: ‘Israel mayikikuna apayämunqan diezmuqa qamkunapa herenciaykikunami kanqa. Apayämunqan diezmupita qamkunapis diezmuta rakiskir Tayta Diospä apayämunki. 27 Tsay diezmutami Tayta Dios chaskinqa Israel mayikikuna trïgunpita o vïnunpita diezmuta apayämuptin chaskinqannölla. 28 Tsaymi Israel mayikikuna apayämunqan diezmuta chaskir qamkunapis tsaypita diezmuta Tayta Diospä apamur sacerdöti Aarónta entregayanki. 29 Imata chaskirpis allinnin kaqta imaypis Tayta Diospä apayämunki’.
30 “Levitakunata mastapis niy: ‘Allinnin kaqta apayämuptikimi Israel mayikikuna trïgunpita o vïnunpita diezmuta apayämuptin chaskinqannölla Tayta Dios chaskinqa. 31 Sobraq kaqtaqa llapan castaykikunawan maychöpis mikuyanki. Tsayqa Tinkuna Tolducho ruraypä kaqkunata rurayanqaykipitami päguykikuna kanqa. 32 Allinnin kaqta Tayta Diospä apamurqa sobraq kaqta mikurpis manami jutsayuqtsu kayanki. Israel mayikikuna apayämunqan diezmukunata llapanta tsarikurkurmi itsanqa sagrädutanötsu rikaykäyanki. Tsaynö rurarqa Tayta Diospa castïgunwanmi wanuyanki’ ”.