Aarónpa tukrun sheqllimunqan
17
(16) Tsaypitanami Moisésta Tayta Dios nirqan: 2 (17) “Cada trïbu Israel runakunapa mandaqninkuna tukrunkunata apayämunanpä niy. Llapan apayämuptinmi chunka ishkay tukrukuna kanqa. Cada tukruman jutinkunata qellqanki. 3 (18) Leví trïbupa tukrunmanqa Aarónpa jutinta qellqanki. Cada trïbupa mandaqninpami juk tukru kanqa. 4 (19) Tsay tukrukunata churanki Tinkuna Toldu rurincho kaykaq Pactu Babul ñöpanman. Tsaychömi qamwan imaypis tinkuntsik. 5 (20) Akranqä runapa tukrun sheqllimunqanta rikarmi qamta y Aarónta akranqäta tantiyar wasaykikunata rimayanqanatsu”.6 (21) Tayta Dios ninqannölla Israel runakunata Moisés willaptinmi cada trïbupa mandaqnin tukrunkunata Moisésta entregayarqan. Aarónpa tukrunpis paykunapa tukrunkunawan kaptinmi chunka ishkay tukrukuna karqan. 7 (22) Tsay tukrukunatami Moisés churarqan Pactu Toldu rurinman Tayta Diospa ñöpancho kananpä. 8 (23) Tsaypita waraynin junaq Pactu Tolduman aywarmi Moisés tarirqan Leví trïbu Aarónpa tukrun sheqlliraykaqta,† upakshuraykaqta, waytaraykaqta y almendraspis poquraykaqta. 9 (24) Tsaymi Tayta Diospa ñöpanpita llapan tukrukunata Moisés jipimurqan mayqanpa tukrun tuktunqanta Israel runakuna rikayänanpä. Nirkurnami tukrunkunata cada mandaqkuna qorikuyarqan.
10 (25) Moiséstanami Tayta Dios nirqan: “Aarónpa tukrunta kutitsiy Pactu Babul ñöpanman. Tsayman churanki mana wiyakuq Israel runakuna tantiyakur conträ mana parlayänanpä. Tsaynöpami wanuyanqanatsu”.