Coré, Datán y Abiram Moiséspa contran shäriyanqan
16
Leví trïbupitami juk runa Coré† jutiyuq karqan. Paymi Coat casta Izharpa tsurin karqan. Rubén trïbupitanami Datán, Abiram y On kayarqan. Datán y Abiramqa Eliabpa tsurinkunami karqan. Onnami Peletpa tsurin karqan. 2 Paykunami ishkay pachak pitsqa chunka (250) runakunawan Moiséspa contran shäriyarqan. Llapanpis yätsikuq y reqishqa runakunami kayarqan. 3 Paykunami qorikaykur Moisésta y Aarónta niyarqan: “¡Alläpanami qamkunaqa manakaqman churaykäyämanki! Llapantsikmi Tayta Diospä santu kantsik. Llapantsiktami yanapaykämantsikpis. Tsaynö kaykaptinqa ¿imanirtä qamkunalla munayyuq kayanqaykita yarpaykäyanki?”4 Tsaynö niyaptinmi Moisés ima ruraytapis mana kamäpakur lätakaykurqan. 5 Nirkurmi Coréta y wakin runakunatapis nirqan: “Waray tutami Tayta Dios musyatsimäshun mayqantsikpis santu kanqantsikta.† Santu kaqmi paypa kaykan. Pay akranqan kaqkunallami payta sirviyänanpä ñöpanman yaykuyanqa. 6 Waray tuta shayämunki cada ünuyki inciensiu qoshnitsikuyänaykikunata apakurkur. 7 Tsaykunaman shanshata wiñarkurmi Tayta Diospa ñöpancho inciensiuwan qoshnitsiyanki. Tayta Dios akranqan kaqmi ñöpancho sirvinanpä santu kanqa. ¡Levitakuna, qamkunaqa alläpami Tayta Diosta rabyanaykätsiyanki!”
8 Tsaypitanami Coréta Moisés nirqan: “Levitakuna, shumaq wiyayämay. 9 Tayta Diosmi Israel mayikikunapita akrayäshushqayki payta sirvir llapan runakunapa trokin Sagrädu Tolducho ruraykunata rurayänaykipä. ¿Manaku tsaywan contentakuyanki? 10 Qamta y levita mayikikunatapis Tayta Diosmi churayäshushqayki ñöpancho sirviyänaykipä. ¿Kananqa sacerdöti kaytanaku munaykäyanki? 11 Tsaynö yarparku ¿Aarónpa contran shäriykäyanki? Aarónpa contran shärirqa Tayta Diospa contranmi shäriykäyanki”.
12 Tsaypitanami Moisés qayatsirqan Eliabpa tsurinkuna Datánta y Abiramta. Paykunanami niyarqan: “Manami aywayäshätsu. 13 Kutir Moisésta willayanki: ‘Egiptucho lichipis abëjapa mishkinpis yakunörä atska kaykaptin kay tsunyaq jirkacho wanuyänäpä pushayämar ¿allita ruranqaykitaku yarpaykanki? Tsaynöpis ¿mandamaqnïkuna kaytaku munaykanki? 14 Kananyaqpis manarämi chätsiyämashqaykirätsu yakunörä atska lichipis abëjapa mishkinpis kanqan nacionman. Manami chakratapis ni üva plantaraqtapis rikatsiyämashqaykirätsu. ¿Imayyaqtä tsaynölla engañayämanki? Tsaymi shamuytapis munayätsu’ ”.
15 Tsaynö niyanqanta willaptinmi Moisésqa pasaypa ajanar Tayta Diosta nirqan: “¡Taytay, paykuna inciensiuwan qoshnitsiyaptin ama chaskiytsu! Noqa manami ni juk ashnullantapis qechushqätsu ni imaypis paykunata wajupätsu”.
16 Nirkurnami Coréta Moisés nirqan: “Waray tuta mandayta munaq mayikikunawan Tayta Diospa ñöpanman shayämunki. Tsaychömi Aarónpis kaykanqa. 17 Cada ünuyki inciensiu qoshnitsikuyänaykita inciensiuntinta Tayta Diospa ñöpanman apayämunki. Tsaymi ishkay pachak pitsqa chunka (250) qoshnitsikuna kanqa. Tsaynöllami Aarónpis inciensiu qoshnitsikunanta apamunqa”.
18 Moisés ninqannöllami juknin jukninpis qoshnitsikunanman shanshata y inciensiuta wiñarkur Tinkuna Toldupa patiunman shayämurqan. Tsaychömi Moiséswan Aarónpis kaykäyarqan. 19 Moiséspa y Aarónpa contran shäriqkuna Coréwan tsaycho qorikashqa kaykäyaptinmi Tayta Diospa chipipiynin rikakämurqan. 20 Tsaypitanami Moiséstawan Aarónta Tayta Dios nirqan: 21 “¡Kanan hörami kay runakunata ushakätsishä! ¡Paykunapita juklla witikuyay!”
22 Tsaynö niptinmi Moiséswan Aarón llakikurnin patsaman lätakaykur niyarqan: “¡Tayta Dios! Qammi llapan runakunatapis kawayta qaranki. ¿Juk runalla jutsata ruranqanpitatsurä llapan runakunata ushakätsinki?”
23 Tsaynö niyaptinmi Tayta Dios nirqan: 24 “Israel runakunata niy Coré, Datán y Abiram täyanqan toldunkuna ñöpanpita jukläman witikuyänanpä”.
25 Tsaymi lätaraykäyanqanpita shärirkur Israel mayor runakunawan Moisés aywayarqan Datán y Abiram kaykäyanqan kaqman. 26 Tsayman chaykurmi runakunata Moisés nirqan: “Kay jutsa ruraq runakunapa toldunkuna ñöpanpita witikuyay. Paykunapa imantapis ama yatayaytsu. Yatarqa paykunapa jutsankunapitami qamkunapis wanuyanki”.
27 Tsaymi llapan runakuna witikuyarqan Corépa, Datánpa y Abirampa toldunkuna ñöpanpita. Abiramwan Datánqa toldunkunapa ñöpanchömi warminkunawan wamrankunawan kaykäyarqan. 28 Nirkurmi runakunata Moisés nirqan: “Kananmi tantiyayanki Tayta Dios kachamashqa kaptin imatapis pay nimanqallanta ruranqäta. 29 Kay runakuna wakin runakunanöpis alli wanuypa wanuyaptinmi musyayanki Tayta Dios mana kachamanqanta. 30 Tayta Dios patsata kichakaskatsir llapan imaykantintapis tsay runakunata kawaykaqta ultaskatsiptinmi itsanqa musyayanki Tayta Diospa contran shäriyanqanta”.
31 Moisés tsaynö nikaptinmi tsay runakuna ichiraykäyanqan kaqpa patsa kichakaskir 32 Coréta, Datánta, Abiramta, castankunata y imaykankunatapis ultaskirqan. 33 Tsaynö kawaykaqta ultaskirmi patsa wichqakaskirqan. Tsaynöpami llapan imaykankunawan Israel runakunapita ushakäyarqan. 34 Patsa kichakaptin qayaräyanqanta wiyarmi ñöpancho kaykaq Israel runakunapis qayararnin qeshpir niyarqan: “¡Noqantsiktapis patsa ultaskamashwantä!”
35 Tsaynöllami Tayta Diospa ñöpanpita nina lunyar shamurnin usharqan ishkay pachak pitsqa chunka (250) inciensiuwan qoshnitsiq runakunatapis.
36 (17.1) Tsaypitanami Moisésta Tayta Dios nirqan: 37 (17.2) “Tsay wanuq runakunapa qoshnitsikuyänanqa sagrädumi. Tsaynö kaykaptinqa Aarónpa tsurin Eleazarta kachay nina rupanqanpita jipinanpä y qoshnitsikunancho shanshata qoriskir campamentupita karuman jitananpä. 38 (17.3) Noqapa ñöpächo inciensiuwan qoshnitsiyanqanpitami cada qoshnitsikunan sagräduna kaykan. Tsaymi cada wanuq runapa qoshnitsikunanta llapshallaman tsulluskatsir altarman laqatsinki. Tsayta rikarmi Israel runakuna conträ shäriyanqatsu”.
39 (17.4) Tsaymi wanuq runakunapa inciensiu qoshnitsikunankunata sacerdöti Eleazar qorirqan. Qorinqankunata tsulluskatsirmi llapshallata altarman laqatsirqan. Tsaykunami broncipita rurashqa karqan. 40 (17.5) Altarman tsaynö laqatsirqan pï runapis tsayta rikar Tayta Diospa ñöpancho inciensiuta llutalla mana qoshnitsinanpämi. Tsaynöpami Aarónpita aywaraqkunalla Tayta Diospa ñöpancho qoshnitsiyänanpä kayarqan. Pipis llutalla qoshnitsirqa Coré y munayyuq kayta munaq mayinkuna wanuyanqannömi wanuyanqa. Coréta y yanapaqninkunata tsaynö päsarqan Moisésta Tayta Dios ninqannöllami.
41 (17.6) Tsaypita waraynin junaqmi Israel runakuna yapay Moiséstawan Aarónta qayapar niyarqan: “¡Qamkunami Tayta Dios akranqan runakunata wanuykätsiyanki!”
42 (17.7) Moiséspa y Aarónpa contran shäriyänanpä qorikarmi illaqpita rikaskiyarqan Tinkuna Tolduta pukutay tsapaskiqta y Tayta Diospa chipipiynin atsikyämuqta. 43 (17.8) Tsaymi Moiséswan Aarón Tinkuna Toldupa patiunman aywayarqan. 44 (17.9) Tsaychömi Moisésta Tayta Dios nirqan: 45 (17.10) “¡Tsay runakunapita witikuyay! ¡Paykunata juklla ushakätsishä!”
Tsaynö niptinmi Moiséswan Aarón pasaypa llakikurnin patsaman lätakaykuyarqan. 46 (17.11) Tsaymi Aarónta Moisés nirqan: “Tayta Dios pasaypa ajanarmi runakunata ushakaykätsin. Kananqa altarman juklla aywar inciensiu qoshnitsikunaykiman shanshatawan inciensiuta wiñay. Tsayta apakurkur runakuna kaykäyanqan kaqman aywar Tayta Diosta mañakuy paykunata perdonananpä”.
47 (17.12) Moisés ninqannöllami qoshnitsikunanta aptakurkur Aarónqa runakuna wanuykäyanqanman cörrilla aywarqan. Tsaychömi inciensiuwan qoshnitsir Tayta Diosta rugakurqan runakunata perdonananpä. 48 (17.13) Wanushqakunapa y kawaykaqkunapa chawpinman ichiykur Tayta Diosta rugakuptinmi pipis wanurqannatsu. 49 (17.14) Chunka chusku waranqa qanchis pachak (14,700) runakunami tsaycho wanuyarqan. Tsaynö kayarqan Coréwan wanuqkunata mana yupayllapami. 50 (17.15) Runakuna manana wanuyaptinnami Aarón kutirqan Tinkuna Toldupa patiuncho Moisés kaykanqan kaqman.