Sacrificiukunata imanö rurayänanpä tantiyatsinqan
15
Tsaypitanami Moisésta Tayta Dios nirqan: 2 “Israel runakunata niy: ‘Tayta Dios entregayäshunaykipä kaykaq nacionman chaykur 3 sacrificiukunata paypä rupatsiyanki mushkuyninta mayar kushikunanpä. Tsay sacrificiukunata rupatsiyanki rupatsina kaq sacrificiu kaptinpis, awniyanqaykita cumplirpis, voluntänikipita uywata apamurpis o fiestapä uywata apamurpis. Tsay sacrificiukunapä uywaykikunapita apayämunki torïtuta, üshata o cabrata karpis.4 “ ‘Sacrificiupä apayämunqaykiwan juntu apayämunki ishkay kïlu allinnin jarinata juk litru aceitiwan pichushqata.
5 “ ‘Tsaynölla cada carnishta apamur jananman juk litru vïnuta yapayanki aytsaman wiñayänaykipä.
6 “ ‘Cada carnëruta apamur jananman yapayanki chusku kïlu jarinata juk litru aceitiwan pichushqata. 7 Tsaynölla apayanki litru y mediu vïnuta aytsaman wiñayänaykipä. Tsaypa mushkuyninmi Tayta Diospa shonqunpänö kanqa.
8 “ ‘Rupatsina sacrificiupä, awniyanqaykita cumpliyänaykipä o alli päsakuy sacrificiupä karpis torïtuta Tayta Diospä apamur 9 jananman apayanki soqta kïlu jarinata ishkay litru aceitiwan pichushqata. 10 Tsaynölla apayanki ishkay litru vïnuta aytsaman wiñayänaykipä. Tsay sacrificiupa mushkuyninmi Tayta Diospa shonqunpänö kanqa.
11 “ ‘Tsaynöllami rurayanki töruta, carnëruta, carnishta o malta chïvuta apamurpis. 12 Ayka uywata apamurpis cada ünunpä tsaynölla apayämunki. 13 Llapan Israel runakunami sacrificiukunata tsaynö imaypis rurayanqa. Tsay sacrificiukunapa mushkuyninmi Tayta Diospa shonqunpänö kanqa.
14 “ ‘Jäpa runakunapis sacrificiukunapä apamurqa qamkunanölla rurayanqa. Tsaynölla rurayanqa qorpa karpis o patsancho tarpis. Tsay sacrificiukunata rupatsiyaptinmi mushkuynin Tayta Diospa shonqunpänö kanqa. 15 Israel runa o jäpa runa karpis ninqäta tsaynölla cumpliyätsun. Kay ninqäkunaqa imayyaqpis leymi qamkunapä y qamkunapita aywaraqkunapäpis kanqa. 16 Tsaynöllami kay ninqäkuna kaykan qamkunapä y jäpa runakunapäpis’ ”.
17 Mastami Moisésta Tayta Dios nirqan: 18 “Israel runakunata niy: ‘Tayta Dios pushaykämanqantsik nacionman chaykur 19 chakracho wayunqanta cosechar Tayta Diospä rakiyanki. 20 Punta poquq trïguta cosechar primiciata rakiyanqaykinölla punta poquq trïguta aqaskatsir masararpis rakiyanki. 21 Tsay ofrendata imaypis apayämunki.
22 “ ‘Tayta Dios ninqan mandamientukunata mana musyarnin mana cumplirqa 23 qamkuna y qamkunapita aywaraqkuna 24 juk torïtuta rupatsina sacrificiupä apayämunki. Rupatsina sacrificiuta rupatsiyaptinmi mushkuynin Tayta Diospa shonqunpänö kanqa. Tsaynölla apayämunki tsaki mikuy ofrendata y altarman wiñananpä vïnutapis. Tsaykunatawan juk chïvutapis apayämunki purificatsina sacrificiupä. Tsay sacrificiukunami kanqa qamkunacho runakuna mana musyayninpa jutsata rurayanqanpita. 25 Tsay apayämunqaykikunata Tayta Diospa ñöpancho sacerdöti rupatsiptinmi mana musyaypa jutsata ruranqaykipita perdonayäshunki. 26 Tsaynö perdonayäshunki Israel runakuna o Israel runakunacho taq jäpa runakuna kayaptikipis. Tsaynö kanqa qamkunacho llapan runakuna mana musyayninpa jutsata rurayanqanpitami.
27 “ ‘Qamkunacho juk runalla mana musyayninpa jutsata rurarqa purificatsina sacrificiupä juk watayuq cabrata apamunqa. 28 Tsayta sacerdöti rupatsiptinmi apamuq runata Tayta Dios perdonanqa.† 29 Kay ninqäkunami ley kanqa qamkunapä y qamkunacho taq jäpa runakunapäpis.
30 “ ‘Pipis musyaykar jutsata rurarqa Tayta Diostami ajanätsin. Tsay runataqa Israel runa kaptinpis o jäpa runa kaptinpis qamkunapita qarquyanki. 31 Tayta Dios ninqanta manakaqman churar mana cäsukunqanpita tsay runata qarquyanki’ ”.
Jamay junaqcho aruq runata wanutsiyanqan
32 Israel runakuna tsunyaq jirkacho kaykarmi Israel mayinta jamay junaqcho yantakuykaqta tariyarqan. 33 Tsaynö tariykurmi Moisés, Aarón y llapan runakuna qorikäyanqanman apayarqan. 34 Yantakuykaqta tariyanqanta willayaptinmi imanö castigayänanpäpis mana musyar prësu tsararäyarqan. 35 Tsaynö tsararaykäyaptinmi Moisésta Tayta Dios nirqan: “Tsay runata campamentupita jukläman apaykur llapan Israel runakuna saqmaypa wanutsiyätsun”.
36 Tsaymi Tayta Dios ninqannölla Israel runakuna jukläman apaykur saqmaypa wanutsiyarqan.
Latsapanpa kuchunman azul jïlukunata jirayänanpä tantiyatsinqan
37 Moiséstami Tayta Dios nirqan: 38 “Israel runakunata niy latsapankunapa kuchunman azul jïlupita shamshillnin rurayänanpä. Tsaynölla paykunapita aywaraqkuna latsapankuna kuchunman shamshillninta imaypis churayanqa. 39 Tsay shamshillta rikarmi yarpäyanki noqapa mandamientükunata cumpliyänaykipä kanqanta. Tsaynöpami jutsata rurayänaykipä shonquykikuna yarpaptinpis tantiyakur kachariyanki. 40 Tsay shamshillkunami kanqa ninqäkunata cäsukur noqa munanqänö santu kawayänaykipä. 41 Noqami Egiptupita jipimurqä Tayta Diosnikikuna kanäpä. Noqami Tayta Diosnikikuna kaykä”.