Israel runakuna Tayta Diospa contran shäriyanqan
14
Tsaynö niyaptinmi Israel runakuna qayararnin tsay paqas warat waqayarqan. 2 Tsaymi Moisésta y Aarónta qayapar niyarqan: “¡Allimi kanman karqan Egiptullacho o kay tsunyaq jirkallacho wanukushqa! 3 ¿Imapätä kayman Tayta Dios pushamashqantsik? Guërracho wanutsimarnintsikmi warmintsikta y tsurintsikkunatapis contrantsikkuna apakuyanqa. ¡Tsaypa trokinqa mas allimi kanman karqan Egiptuman kutikushqa!”4 Tsaymi jukninpis jukninpis willanakur niyarqan: “Egiptuman pushamänantsikpä juktana mandamaqnintsikta churashun”.
5 Tsaynö niyaptinmi Moiséswan Aarónqa ima ruraytapis mana kamäpakur llapan runakunapa ñöpancho lätakaykuyarqan.
6 Nunpa tsurin Josué y Jefonipa tsurin Calebpis pasaypa llakikurmi latsapankunata rachiyarqan. (Paykunaqa Canaánman rikapakuq aywaqkunami kayarqan.) 7 Nirkurnami Israel runakunata niyarqan: “¡Rikapakayämunqä nacionqa alläpa allimi kaykan! 8 Kuyamarnintsikmi Tayta Dios tsay nacionman yaykatsimäshun. Tsaychöqa lichipis y abëjapa mishkinpis atskami kaykan. 9 Tayta Diospa contran ama shäriyaytsu† ni tsaycho taq runakunata ama mantsayaytsu. Paykunataqa chuspitanöllami llapirishun. Paykunata yanapananpä manami pipis kantsu. Tayta Dios noqantsikwan kaykaptinqa ama mantsarishuntsu”.
10 Tsaynö niyaptinmi runakuna saqmayta munayarqan. Tsay hörami llapan runakuna Tayta Diospa chipipiyninta Tinkuna Tolducho rikayarqan. 11 Tsaychömi Moisésta Tayta Dios nirqan: “¡Imayyaqrä Israel runakuna ajanätsiyämanqa! Milagrukunata ruranqäta rikaykarpis ¡imayyaqrä criyiyämanqatsu! 12 Kay runakunatami pestiwan ushakätsishä. Qampita aywaraqkunallami jatun nación kayanqanyaq mirayanqa”.
13 Moisésnami nirqan: “Taytay, kikikimi munaynikiwan Egiptupita Israel runakunata jipimushqayki. Paykunata ushakätsiptikiqa 14 Egipto runakunami Canaáncho taq runakunata willayanqa. Cananeo runakunapis musyayanmi noqakunawan kaykanqaykita. Tsaynöllami musyayan yuripaykamar parlapämanqaykita, ichiraykaq pukutaycho ñöpäkunata junaqpa aywanqaykita y ichiraykaq nina rupaykaqcho paqaspa aywanqaykitapis. 15 Israel mayïkunata llapanta ushakätsiptikiqa maytsaycho taq runakunami manakaqman churayäshurniki niyanqa: 16 ‘Tayta Dios awninqan nacionman tsay runakunata chätsiyta mana kamäpakurmi tsunyaq jirkallacho ushakätsishqa’.
17 “Tsaymi Tayta Dios, mañakü awninqaykinölla munaynikiwan yanapaykamänaykipä. Qammi nishqayki 18 mana ajanaq y kuyapäkuq kanqaykita. Tsaynöllami nishqayki mana cäsukuqkuna perdonta mañakushuptiki perdonanaykipä kanqanta. Tsaynöllami nishqayki jutsa ruraqkunata kikintapis, tsurintapis, willkantapis y shurukta willkantapis castiganaykipä kanqanta.† 19 Egiptupita kayyaq pushayämänaykipäpis pacienciayki kashqami. Kuyapäkuq kaykarqa jutsata rurayanqanpita kay runakunata perdonaykullay”.†
Israel runakunata Tayta Dios castiganqan
20 Tsaymi Tayta Dios nirqan: “Mañakamanqaykinöllami perdonashä. 21 Imayyaqpis kawaq Dios kar y entëru munduta munaynïcho tsarararmi nï: 22-23 Egiptucho y tsunyaq jirkacho milagrukunata ruranqäta rikaqkuna manami ni jukllayllapis chäyanqatsu unay castaykikunata awninqä nacionman. Paykunaqa kikinkuna munayanqanta ruratsimayta munarmi kutin kutin cäsukayämashqatsu. Manami mayqanpis tsaynö ajanätsimaqkuna tsay nacionman chäyanqatsu.† 24 Sirvimaqnï Calebmi itsanqa ninqäkunata cäsukaman. Tsaymi rikapakamunqan nacionman payta yaykatsishä. Paypita aywaraqkunapis tsaychömi täyanqa.† 25 Amalecita y cananeo runakuna täyanqan pampapaqa amana päsayaynatsu. Tsaypa trokinqa waray junaq tsunyaq jirkaman kutiyay Puka Lamarman aywaq nänipa”.
26 Tsaypitanami Moiséstawan Aarónta Tayta Dios nirqan: 27 “Wiyashqämi Israel runakuna conträ parlayanqanta. ¡Imayyaqrä kay runakunata awantashä! 28 Kay ninqäta paykunata willay: ‘Noqa Tayta Diosmi jurar nï: Yarpäyanqaykinöllami llapaykita ushakätsiyäshayki. 29 Conträ parlayanqanpitami ishkay chunka (20) watayuqpita janaman llapan censashqa kaqkuna kay tsunyaq jirkacho wanuyanqa.† 30 Jefonipa tsurin Calebwan y Nunpa tsurin Josuéllami awninqä nacionman yaykuyanqa. Tsaypita kaqqa manami mayqaykipis yaykuyankitsu. 31 Wamraykikunatami itsanqa chikiyäshuqniki runakuna apakuyänanpä kanqanta yarpäyaptikipis yaykatsishä. Manäniräyanqayki nacionchömi wamraykikuna täyanqa.
32 “ ‘Qamkunaqa kay tsunyaq jirkachömi wanur ushakäyanki. 33 Wanur ushakäyanqaykiyaqmi wamraykikuna chusku chunka (40) wata† uywankunawan tsunyaq jirkapa puriyanqa. Qamkuna mana wiyakuq kayanqaykipitami tsaynö ñakayanqa. 34 Chusku chunka junaq Canaánta rikapakayämunqaykinömi chusku chunka wata ñakar puriyanki. Tsaynöpami cada junaqpita juk wata tsunyaq jirkacho kayanki. Tsayrämi musyayanki imanö castigakuq kanqätapis. 35 Noqa Tayta Dios karmi ninqäta cumplishä. Tsaymi conträ shäriq y mana cäsukamaq runakunata castigaptï kay tsunyaq jirkallacho wanur ushakäyanqa’ ”.
36 Runakunata desvaluratsiyanqanpitami Moisés kachanqan chunka rikapakuqkunata 37 pesti qeshyawan Tayta Dios wanutsirqan. 38 Josuéwan Calebllami kawaykar quëdayarqan.
Amalecita y cananeo runakuna Israel runakunata vinciyanqan
39 Tayta Dios ninqanta Moisés willaptinmi Israel runakuna pasaypa llakikuyarqan. 40 Tsaymi tuta tutalla shärikuskir jallqakunaman aywayänanpä niyarqan: “Tayta Dios awnimanqantsik nacionman yaykuyta mana munar jutsayuqmi rikakuykantsik. Kanan tsayman juklla aywashun”.
41 Moisésnami nirqan: “¡Manakaqllapämi tsayman aywayta yarpaykäyanki! Tsunyaq jirkaman kutinantsikpä Tayta Dios nikämashqaqa ¿imanirtä cäsukuyta munayankitsu? 42 Awnimanqantsik nacionman ama aywayaytsu. Mana wiyakur aywayaptikiqa Tayta Dios manami yanapayäshunkitsu. Tsaymi chikishuqnikikuna vincir wanutsiyäshunki. 43 Amalecita y cananeo runakunaqa ushakätsiyäshunaykipämi shuyaykäyäshunki. Mana cäsukuq kayanqaykipita Tayta Dios manami tsapäyäshunkinatsu”.
44 Moisés tsaynö nikaptinmi Israel runakuna chölu tukur jallqakunaman aywayarqan. Tsaynö aywayarqan campamentucho Moisésta y Pactu Babulta jaqiskirmi. 45 Israel runakuna aywaykaptinmi jallqakunacho taq amalecita y cananeo runakuna yarqaskamur Israel runakunata atacayarqan. Vinciskirmi qatikachäyarqan Hormayaq.