3 Tsaymi Tayta Dios ninqannö rikapakayämunanpä Parán tsunyaq jirkapita runakunata Moisés kacharqan. Llapanpis tsay runakuna mandaqmi kayarqan. 4 Tsay aywaq runakunami kayarqan Rubén trïbupita Zacurpa tsurin Samúa, 5 Simeón trïbupita Horípa tsurin Safat, 6 Judá trïbupita Jefonipa tsurin Caleb, 7 Isacar trïbupita Josépa tsurin Igal, 8 Efraín trïbupita Nunpa tsurin Oseas, 9 Benjamín trïbupita Rafúpa tsurin Palti, 10 Zabulón trïbupita Sodipa tsurin Gadiel, 11 Josépa tsurin Manasés trïbupita Susipa tsurin Gadi, 12 Dan trïbupita Gemalipa tsurin Amiel, 13 Aser trïbupita Micaelpa tsurin Setur, 14 Neftalí trïbupita Vapsipa tsurin Nahbi y 15 Gad trïbupita Maquipa tsurin Geuel.

16 Paykunatami Canaánman rikapakamuq Moisés kacharqan. Nunpa tsurin Oseaspa jutintanami Moisés trukatsirqan Josué^a jutin kananpä.

17 Canaánta rikapakayämunanpä kacharmi Moisés nirqan: “Neguevpa päsar jallqakunacho markakunaman aywayanki. 18 Tsay markakunata imanö kanqantapis rikapakamur musyapakayämunki runakuna jinchi o kallpaynaq kayanqanta, atskaq o wallkaqlla kayanqanta. 19 Tsaynöpis rikapakayämunki wayinkuna toldulla o pirqa kanqanta y markankuna murallashqa o murallanni kanqanta. Tsaynöpis rikapakayämunki chakrankuna imanö kanqanta. 20 Rikapakayämunki alli chakra o qachpa chakra kanqanta, munti o muntiynaq kanqanta. Tsay nacionman yaykuyta ama mantsariyankitsu. Tsay chakrakunacho ima wayunqantapis apayämunki”.

(Tsay witsanmi punta poquq üva pallay tiempuna karqan.)

21 Moisés tsaynö kachaptinmi entëru Canaánta rikapakayämurqan Zin niyanqan tsunyaq jirkapita hasta Hamatman yaykuna Rehob markayaq. 22 Neguevpa päsarmi Hebrón markaman chäyarqan. Tsaychömi taykäyarqan Anacpita aywaraqkuna. Paykunami kayarqan Ahimán runakuna, Sesai runakuna y Talmai runakuna. Hebrón markata shäritsiyanqanpita qanchis watatarämi Egiptucho Zoán markata sharkatsiyarqan.

23 Tsaypita Escol pampaman rikapakuq chaykurmi llimllantinta juk sarta üvata mutuskir qeruwan wantuypa apayarqan. Tsaynöllami hïgustawan granädatapis apayarqan. 24 Juk sarta üvata pallayanqanpitami tsay pampata jutitsiyarqan Escol^b jutin kananpä.

25 Chusku chunka (40) junaq rikapakuskirmi 26 Parán tsunyaq jirkacho Cadesman kutiyarqan. Tsaychömi kaykäyarqan Moisés, Aarón y llapan Israel runakunapis. Chaykurmi willayarqan imata rikayanqanta y wiyayanqantapis. Tsaynöllami tsaypita imata apayämunqankunata rikatsiyarqan. 27 Moiséstanami niyarqan: “Rikapakuq kachayämanqayki chakrakunamanmi aywayashqä. Tsaychöqa rasunpaypami lichipis y abëjapa mishkinpis atska kaykan. Kay frütakunatami tsaypita apayämushqä. 28 Itsanqa tsaycho taq runakuna atskaqmi kayan. Markankunapis jatusaq y jinchi murallashqami. Tsaynöllami Anacpita aywaraq jatusaq runakunapis kaykäyan. 29 Tsaynöllami Neguevcho amalecita runakuna taykäyan. Jallqacho kaykaq markakunachöqa heteo runakuna, jebuseo runakuna y amorreo runakunami taykäyan. Cananeo runakunanami lamar kuchun pampakunacho y Jordán mayu ñöpan pampakunacho taykäyan”.

30 Tsaynö willayaptinmi Moiséspa contran runakuna parlayarqan. Tsaymi runakunata upällatsir Caleb nirqan: “¡Tsaynö kayaptinpis tsay markakunata y chakrakunata qechunantsikpä aywashun! ¡Noqantsikqa paykunata vincishunmi!”

31 Tsaynö niptinpis rikapakuq mayinkunami niyarqan: “Tsay runakunataqa ¿imapätä wajupäshunpis? ¡Paykunaqa noqantsikpita mas atskaqmi kayan!”

32 Israel mayinkunata mantsaritsirmi niyarqan: “Rikapakayämunqä markakunacho pasaypa wanutsinakuyllami kaykan. Tsaynöpis tsay markakunacho taq runakuna jatusaqmi kayan. 33 Anacpita^† aywaraq jatusaq runakunatapis rikayashqämi. Yarpaynïkunapitaqa paykunapa ñöpancho chukllushnöllami kayashqä. Paykunapis chukllushtanöllami rikayämashqa”.