Aarónwan María Moiséspa wasanta rimayanqan
12
Hazerotcho cusita warmiwan majatsakanqan jananmi Aarón y panin María Moiséspa wasanta rimar 2 niyarqan: “Manami Moisésllawantsu Tayta Dios parlashqa, sinöqa noqantsikwanpis parlashqami”.Tsaynö parlayanqantami Tayta Dios wiyarqan. 3 Paykuna tsaynö rimayaptinpis kay patsacho pïmaypitapis mas alli shonqu karmi Moisésqa imatapis parlakurqantsu.
4 Tsaymi Moisésta, Aarónta y Maríata Tayta Dios nirqan: “Tinkuna Tolduman kimsayki aywayay”.
Tsayman kimsan aywayaptinmi 5 ichiraykaq pukutay rurincho Tinkuna Toldu punkuman Tayta Dios urämurqan. Tsaypita Aarónta y Maríata qayaptin ñöpanman aywayaptinmi 6 Tayta Dios nirqan: “Ninqäta shumaq wiyayämay. Qamkunacho profëtakunata revelacioncho y suëñuyninkunachömi parlapä. 7 Wayïtaa alli rikaq sirvimaqnï Moiséstami itsanqa tsaynötsu parlapä. 8 Paytaqa mana tumatsiyllapami parlapä. Kikïtami rikaman. Tsaynö kaykaptinqa ¿imanirtä wasanta rimaykäyanki?”
9 Tsaynö niskirmi Tayta Dios alläpa rabyanashqa aywakurqan. 10 Tinkuna Sagrädu Toldupita pukutay aywaskiptinmi jinan höra Maríapa entëru cuerpun leprawan yuraq rikakuskirqan. Tsayta rikaykurmi 11 Moisésta rugakur Aarón nirqan: “Taytay, jutsata rurar wasayki rimayanqäpita ama castigaykayällämaytsu. 12 Mamanpa pachallancho wanushqa wamrapa qaran ismushqa kanqannömi Maríapa qaranpis kaykan. Taytay, alliyänanpä Tayta Diosta mañakuykullay”.
13 Tsaymi Tayta Diosta rugakur Moisés nirqan: “Tayta Dios, Maríata alliyaykatsillay”.
14 Tayta Diosnami nirqan: “Qaqllancho taytan toqapaptin ¿manaku qanchis junaqyaq penqakushqa kanman? Tsaynö kaptinqa campamentupita qanchis junaqyaq Maríata qarquy.† Tsaypitarämi kutimunqa”.