Tsunyaq jirkapa Israel runakuna atska wata puriyanqan
2
“Tsaypitanami Tayta Dios nimanqannö Puka Lamarman aywaq nänipa† tsunyaq jirkaman aywarqantsik. Seir jallqakuna kinranmi atska wata purirqantsik. 2 Tsaymi Tayta Dios nimarqan: 3 ‘Alläpa unaynami kay jallqakunapa puriykäyanki. Kananqa norti kaqläpana aywayay. 4 Tsaynöpis Israel mayikikunata ninki: “Seir jallqakunapita yarqunantsikpä Jacobpa wawqin Esaúpita aywaraq runakuna täyanqanpanami päsashun.† Paykuna pasaypa mantsamashqapis alcäbulla kashun. 5 Esaúpita aywaraqkunapä Seir jallqakunata rikatsishqa kaykaptïqa paykunawan ama pelyayaytsu. Paykunapa nacionnincho kaykaq chakrantaqa manami ni wallkallatapis rikatsiyäshaykitsu. 6 Paykunapa mikuynintapis qellaynikiwanmi rantiyanki. Yakuta upuyänaykipäpis pägayankimi” ’.7 “Llapan ruranqantsikchömi Tayta Dios bendisamashqantsik. Tsaymi chusku chunka (40) watantin tsunyaq jirkapa purishqapis imapis pishïmashqantsiktsu. 8 Tsaymi Jacobpa wawqin Esaúpita aywaraqkuna taykäyanqan Seir jallqakunapa päsarqantsiktsu. Tsaypa päsar Arabá pampapa aywaq nänipa päsanantsikpa trokinqa Moab tsunyaqman aywaq nänipanami aywarqantsik. (Arabá pampaqa Elat y Ezión-geber markakunapitami qallan.) 9 Moabpa päsashqami Tayta Dios nimarqan: ‘Lotpita† aywaraq moabita runakunata achäquita ama ashipaytsu ni paykunawan ama pelyaytsu. Paykunatami Ar partikunata rikatsishqä. Tsaymi ni takshallatapis paykunapa nacionnintaqa rikatsishaykitsu’ ”.
10 (Moabita runakuna nacionninkunaman manarä chäyaptin emita runakunami tsay partikunacho täyarqan. Paykunapa markankunaqa atskami karqan. Anacpita aywaraq runakunanömi paykunaqa jatusaq kayarqan. 11 Tsay runakunata refaíta jutiwan wakin runakuna reqiyaptinpis moabita runakunami emita jutiwan reqiyarqan. 12 Tsaynöllami unayqa Seir particho horeo runakuna täyarqan. Esaúpita aywaraqkunami paykunata ushakaskatsir tsaycho taykäyan. Tsaynöllami Israel runakunapis Tayta Dios rikatsinqan nacionpita cananeo runakunata qarquyarqan.)
13 “Tsaypitanami Tayta Dios nimarqan: ‘Kaypita aywakur Zered mayuta tsimpayay’. Tsaymi Zered mayuta tsimparqantsik. 14 Cades-barneapita yarqamunqantsik junaqpitami Zered mayuta tsimpamunqantsik junaqyaq kimsa chunka puwaq (38) wata karqan. Tsayyaqmi guërraman aywayänanpä censayanqan runakuna Tayta Dios ninqannö llapanpis tsunyaq jirkacho ushakäyarqan.† 15 Tayta Diosmi paykunata castigarnin llapanta ushakätsirqan.
16 “Llapan wanur ushakäyaptinmi 17 Tayta Dios nimarqan: 18 ‘Moab nacionpa lindërunpa päsar kanan Ar markaläman aywayay. 19 Amonita runakunaman char ama wajupäyaytsu ni paykunawan ama pelyayaytsu. Lotpita† aywaraqkuna kaptinmi amonita runakunata tsay partikunata rikatsishqä. Tsaymi paykuna täyanqan naciontaqa qamkunata rikatsiyäshaykitsu’ ”.
20 (Unayqa tsay nacioncho refaíta runakunami täyarqan. Paykunatami amonita runakuna niyarqan zomzomeo runakuna kayanqanta. 21 Refaíta runakunapa markankunaqa atskami karqan. Tsaynöllami Anacpita aywaraq runakunanö jatusaq kayarqan. Tsaynö kaptinpis amonita runakunatami Tayta Dios yanaparqan tsay runakunata ushakätsir tsaycho täyänanpä. 22 Tsaynöllami Esaúpita aywaraqkunatapis Tayta Dios yanaparqan Seircho taq horeo runakunata ushakaskatsir tsaycho täyänanpä. 23 Caftorpitaa shamuq runakunami Gaza ñöpankunapa taksha markakunacho taq aveo runakunata ushakaskatsir tsaycho täyarqan.)
24 “Tsaymi Tayta Dios nimarqan: ‘Arnón mayuta juklla tsimpayay. Noqami qamkunapa munaynikikunaman churashä amorreo runakunapa mandaqnin rey Sehónta y nacionnintapis. Payqa Hesbón markachömi tan. Paywan guërrata rurar nacionninman yaykuyay. 25 Kananpitami maytsaychöpis mantsayäshunaykipä llapan runakunapa shonqunkunaman pasaypa mantsariyta churashä. Tsaymi qamkunapä parlaqta wiyar pasaypa mantsarirnin tsuktsukyäyanqa’.
Rey Sehónta vinciyanqan
26 “Cademot tsunyaq jirkapitami willakuqkunata Hesbón markacho taq rey Sehónman kacharqä alli shimillankunapa rugar niyänanpä: 27 ‘Taytay, nacionnikipa päsaq nänillapa päsakuykuyälläshä. Maypapis mana yaqarmi jatun nänillapa päsakuyäshä. 28 Mikuynikita mikuyanqäpita y yakuykita upuyanqäpitapis pägayäshaykimi. Tsaymi rugakü nacionnikipa päsakuyänäpä. 29 Seircho taq Esaúpita aywaraq runakuna y Archo taq moabita runakunapis päsatsiyämashqami. Taytay, tsaynölla qampis päsayänäpä kachaykayällämay. Tayta Diosnï awniyämanqan herenciataqa Jordán mayu wak tsimpanchörämi chaskiyäshä’.
30 “Tsaynö nir rugakushqapis rey Sehón nacionninpa päsamunantsikta manami munarqantsu. Tsaynö mana munananpäqa Tayta Diosmi shonqunta chukruyätsirqan. Tsaymi soldädunkunawan atacamashqa Tayta Dios yanapamarqantsik vincirkur kananyaqpis munaynintsikcho tsararänantsikpä.
31 “Tsaymi Tayta Dios nimarqan: ‘Kananpitaqa Sehónta nacionnintintami qamta entregä. Nacionninman yaykuykur herenciaykikuna kananpä qechuyay’.
32 “Nacionninpa päsamunantsikta mana munarmi Sehónqa soldädunkunawan shamurqan Jahazacho noqantsikwan pelyananpä. 33 Tsaynö kaptinpis Sehónta, tsurinkunata y soldädunkunatapis makintsikmanmi Tayta Diosnintsik churamurqan llapanta ushakätsinantsikpä. 34 Tsaymi llapan markankunaman yaykur runatapis, warmitapis y wamrakunatapis llapanta ushakätsirqantsik. Kawaykaqtaqa manami jukllayllatapis jaqirqantsiktsu. 35 Uywankunatapis imaykankunatapis väliq kaqllatami apakamurqantsik. 36 Arnón mayu ñöpancho kaykaq Aroer markapita y mas uraqnincho kaykaq markapita qallaykur Galaad partiyaq manami mayqan markacho taqkunapis ichipämarqantsiktsu. Tayta Diosnintsik munayninwan yanapamashqami llapanta ushakätsirqantsik. 37 Amonita runakuna täyanqanmanmi itsanqa yaykurqantsiktsu. Tsaymi Jaboc mayuta tsimparqantsiktsu y jallqakunacho kaq markakunamanpis yaykurqantsiktsu. Maymanpis mana yaykunantsikpä Tayta Diosnintsik nimashqaqa manami yaykurqantsiktsu.