6 “Tsay akrayanqan uywata tsararäyätsun kay killa chunka chusku junaqyaq. Tsay tardina llapan Israel runakuna uywata pishtayätsun. 7 Pishtaskir wayikunapa numbralninkunata y marcunkunata uywapa yawarninwan llushiyätsun. 8 Tsaynölla tsay paqas kankashqa aytsata mikuyätsun iwjiq jachantinta^a y levadüraynaq tantantinta. 9 Chawata ni caldushqatapis ama mikuyätsuntsu. Tsaypa trokinqa kankayllapa mikuyätsun aytsanta, umanta, chakinta, pachanta, shonqunta, ñatinninta y rurunnintapis. 10 Waränin tutapäqa imatapis ama katuyätsuntsu. Katushqa karqa llapanta rupatsiyätsun. 11 Latsapankunatapis llanqinkunatapis jatishqallana tukruntapis aptashqallana tsay kankashqa aytsata ras mikuyätsun. Tsay Pascua fiestataqa^† noqapa jutïcho rurayätsun.

12 “Tsay paqasmi entëru nacionpa päsar llapan Egipto runakunapa mayor kaq tsurinkunata y uywankunapa punta yuriq orqu wawankunatapis wanutsishä. Tsaynö wanutsirmi Egipto runakuna adorayanqan diosninkunata manakaqman churashä. Noqaqa Tayta Diosmi kaykä. 13 Wayi punkuykicho yawar llushiraykaqta rikarqa päsakushämi. Tsaymi Egipto runakunata wanutsirpis Israel runakunataqa ni jukllayllatapis wanutsishätsu.

14 “Tsay junaqtaqa cada wata mana qonqaypa noqa Tayta Diosta adoramar jatun fiestata rurayanki. Tsay ninqäkunaqa imayyaqpis leymi qamkunapä y qamkunapita aywaraqkunapäpis kanqa.

15 “Fiesta qallaykunqan junaqpita qanchis junaqyaq levadüraynaq tantata mikuyanki. Punta kaq junaqcho wayikipita llapan levadürata jitariyanki. Tsay semäna levadürayuq tantata mikuq kaqtaqa Israel runakunapita qarquyanki. 16 Punta kaq junaq y qanchis kaq junaq adorayämänaykipä qorikäyanki. Tsay junaqkunaqa ima aruytapis ama aruyankitsu. Itsanqa mikuyta mikuyänaykipä kusinakuyanki.

17 “Levadüraynaq Tanta Mikuna fiestata^† rurar Egiptupita jipinqäta imaypis yarpäyanki. Tsay fiestata imayyaqpis cada wata rurayanki qamkunapis y qamkunapita aywaraqkunapis. 18 Punta kaq killa chunka chusku junaq tardipita qallaykur levadüraynaq tantata mikuyanki ishkay chunka juk (21) junaq tardiyaq. 19 Tsay qanchis junaqyaqqa wayikikunacho levadüra ama katsuntsu. Tsay junaqkuna levadürayuq tantata mikuq kaqtaqa Israel runakunapita qarquyanki Israel mayiki kaptinpis o jäpa runa kaptinpis. 20 Tsay junaqkuna levadürayuqtaqa ama imatapis mikuyankitsu. Maycho tarpis levadüraynaq tantallata mikuyanki”.

21 Tsaynami Moisésqa Israel mayor runakunata qayaykatsir nirqan: “Pascua mikuyta mikuyänanpä carnishta o chïvuta karpis cada wayicho pishtayätsun. 22 Pishtayanqayki uywapa yawarninta juk matiman qoriyanki. Tsay yawarman hisöpu jachata tullpurkur punkuykikunapa numbralninta y marcunkunata llushiyanki. Tsay paqas patsa manarä waraptinqa wayikikunapita ama yarquyankitsu. 23 Egipto runakunapa mayor tsurinkunata wanutsinanpä Tayta Dios päsar wayi punkukunatarämi rikapakunqa. Punkupa numbralnincho y marcuncho yawar llushiraykaqta rikarqa päsakunqami. Payqa manami munanqatsu wanutsikuq ángel tsay wayiman yaykunanta.

24 “Pascua fiestata rurayänaykipä ninqätaqa imaypis mana qonqaypa rurayanki. Qamkunapita aywaraqkunapis tsaynölla imayyaqpis rurayätsun. 25 Tayta Dios awniyäshunqayki nacionman yaykurpis mana qonqaypa Pascua fiestata rurayanki. 26 Tsurikikuna ‘¿imanirtä kay fiestata rurantsik?’ niyäshuptiki 27 tantiyatsir niyanki: ‘Cada watami uywata pishtar Pascua fiestata rurantsik Israel mayintsikkunapa wayinpa Tayta Dios Egiptucho päsanqanta yarpänantsikpä. Tsaypa päsar Egipto runakunapa tsurinkunata wanutsirpis Israel mayintsikkunapa tsurinkunataqa manami wanutsirqantsu. Tayta Dios tsaynö salvanqanpitami payta adorar Pascua fiestata rurantsik’ ”.

Moisés tsaynö niptinmi llapan Israel runakuna qonqurikuykur Tayta Diosta adorayarqan. 28 Tsaymi Moiséstawan Aarónta Tayta Dios ninqannölla llapanta rurayarqan.

29 Tsay tsakay pullan paqasmi Tayta Dios wanutsirqan Egipto runakunapa llapan mayor tsurinkunata.^† Tsaynö wanutsirqan Faraónpa mayor ollqu tsurinpita qallaykur hasta carcelcho wichqaraykaq runapa mayor ollqu tsurinyaq. Tsaynöllami wanutsirqan llapan uywakunapa punta yuriq orqu wawankunatapis. 30 Cada wayicho mayor tsurinkuna wanuyaptinmi Faraónpis, mandashiqninkunapis y llapan Egipto runakunapis tsay paqas pasaypa waqayarqan.

31 Tsaymi tsay paqas Moiséstawan Aarónta qayaykatsir Faraón nirqan: “Qamkunapis Israel mayikikunapis kay nacionpita juklla aywakuyay. Mañakayämanqaykinö Tayta Diosta adoraq aywayay. 32 Munayanqaykinö üshaykikunata, cabraykikunata y wäkaykikunata qatikurkur ras aywayay. Tayta Diosta adorarnin noqapäpis mañakuykuyällanki”.

33 Egipto runakuna llapanpis wanuyänanpä kanqanta mantsarirmi Israel runakunata juklla aywakuyänanpä niyarqan. 34 Tsaymi Israel runakunaqa artësantinta levadüraynaq mäsata jakunkunawan piturkullarna aparikurkur aywakuyarqan. 35 Moisés ninqannöllami Egipto runakunata imaykatapis mañakuyarqan qoripita y qellaypita kaqkunata. Tsaynöllami mañakuyarqan latsapakunatapis. 36 Tsaynö mañakuyaptinmi Egipto runakunapa yarpayninman Tayta Dios churarqan imatapis mañakuyanqan kaqta qaraykuyänanpä. Tsaynöpami Egipto runakunapata imaykantapis alli kaqtaqa apakuyarqan.^†

37 Ramesés partipita aywakurmi Sucotläpa Israel runakuna aywayarqan. Egiptupita yarquq runakunaqa kayarqan soqta pachak waranqanömi (600,000), warmikunatawan wamrakunata mana yupayllapa. 38 Paykunawanmi mana Israel kaq runakunapis atskaq aywayarqan. Tsaypita yarqurmi qatiyarqan üshakunata, cabrakunata y tsaytsika wäkakunatapis. 39 Egipto runakuna nacionninpita qarquyaptinmi Israel runakuna mirkapanta rurayänanpäpis tiempu karqantsu. Tsaymi jamapäyanqallancho apayanqan levadüraynaq mäsapita tantata rurayarqan.

40 Israel runakunaqa chusku pachak kimsa chunka (430) watami Egiptucho täyarqan.^† 41 Tsay watakuna cumplinqan junaqmi Tayta Dios kuyanqan runakuna trïbunpa trïbunpa Egiptupita yarqakayämurqan. 42 Tsay paqasmi Israel runakuna Egiptupita yarqayämunanpä Tayta Dios yanaparqan. Cada watami tsay yarquyanqan junaq cumpliptin llapan Israel runakuna Tayta Diosta waraypa adorayanqa. Israel runakunapita aywaraq kaqkunaqa imaypis tsaynö rurayanqa.

43 Tsaypitanami Moiséstawan Aarónta Tayta Dios nirqan: “Kaynömi Pascua fiestata rurayanki. Pascuapä pishtayanqayki uywapa aytsantaqa jäpa runa ama mikunqatsu. 44 Wätaynikikunapä rantiyanqayki runakunami itsanqa penqayninta señalakushqa kar mikuyanqa. 45 Tsay uywapa aytsantaqa jäpa ni arupakuqpis ama mikutsuntsu. 46 Tsay aytsataqa wayillaykikunacho mikuyanki. Wayipita juklämanqa ama jipiyankitsu ni tulluntapis ama pakiyankitsu.^† 47 Llapan Israel runakuna tsaynölla rurayätsun.

48 “Mayqanpis jäpa runakuna qamkuna kaqcho tarnin Pascua fiestacho mikuyta munarqa wayincho llapan ollqu kaqkuna señalakuyätsun. Señalakurqa paykunapis Israel runanöna karmi Pascuacho mikuyanqa. Manarä señalakurqa pipis tsay uywapa aytsanta ama mikutsuntsu. 49 Qamkunacho taq jäpa runakuna señalakuyanqannölla tsay nacioncho yuriqkunapis señalakuyätsun Pascua mikuyta mikuyänanpä”.^†

50 Tsaymi Israel runakuna llapanta rurayarqan Moiséstawan Aarónta Tayta Dios ninqannölla. 51 Tsay junaqllami Egiptupita Israel runakunata tröpanpa tröpanpa Tayta Dios jipimurqan.