3 Tsaymi llapan runakunata Moisés nirqan: “Egiptupita kanan junaq munayninwan Tayta Dios jipimanqantsikta ama qonqäyankitsu. Kanan junaqmi wätay kaykanqantsikpita jipiykämantsik. Cada watapis kay junaqta yarpar levadürayuq tantata ama mikuyankitsu. 4 Abib killachömi yarquykantsik. 5 Tsaymi unay castantsikkunata Tayta Dios awninqan nacionman chaykur Abib killacho fiestata cada wata rurayanki. Tsaychöqa lichipis abëjapa mishkinpis yakunörämi atska kaykan. Tsaychömi taykäyan cananeo runakuna, heteo runakuna, amorreo runakuna, heveo runakuna y jebuseo runakuna. Paykuna taykäyanqan naciontami Tayta Dios qarayäshunki.

6 “Tsay fiestata rurar qanchis junaq levadüraynaq tantallata mikuyanki. Qanchis kaq junaqchöqa tutapita tardiyaq Tayta Diosta adorayanki. 7 Tsay qanchis junaqkuna levadüraynaq tantata mikuyanki. Qamkuna täyanqaykichöqa tsay junaqkuna ama katsuntsu levadürapis ni levadürayuq tantapis.

8 “Tsay junaq tsurikikunata willar niyanki: ‘Kay fiestataqa ruraykantsik Egiptupita Tayta Dios jipimanqantsikta yarparmi. 9 Runakunapa rikrancho o urkuncho señal kanqannömi tsay fiestapis señal kanqa Tayta Dios entregamanqantsik leykunata imaypis mana qonqaypa parlanantsikpä. Tsaynö kanqa Egiptupita Tayta Dios munayninwan jipimanqantsikpitami. 10 Tsaymi wata wata mana qonqaypa Tayta Dios nimanqantsik junaqcho tsay fiestata rurantsik’.

11 “Cananeo runakuna täyanqan nacionta rikatsiyäshunaykipämi unay castantsikkunatapis qamkunatapis Tayta Dios awniyäshushqayki. Tsayman chaykatsir Tayta Dios rikatsiyäshuptikimi 12 mayor ollqu tsurikikuna Tayta Diospä kanqa. Tsaynöllami uywaykikunapa punta yuriq orqu wawankunapis Tayta Diospä kanqa.^† 13 Ashnupa punta yuriq orqu wawanpa trokin carnishta o chïvuta karpis sacrificiupä apayanki. Trokin mana aparqa ashnu mallwapa kunkanta pakiriyanki. Mayor tsurikikunapa trokin ofrendata^† apayanki.

14 “Waray warantin tsurikikuna ‘¿imanirtä kay fiestata rurantsik?’ nir tapuyäshuptiki niyanki: ‘Egiptucho wätay kayanqäpitami munayninwan Tayta Dios jipiyämarqan. 15 Faraónpa shonqun chukru kaptinmi yarqayämunäta munarqantsu. Tsaymi llapan Egipto runakunapa mayor ollqu tsurinkunata Tayta Dios wanutsirqan. Tsaynöllami llapan malta uywankunapa punta yuriq orqu wawankunatapis wanutsirqan. Tsaymi uywapa punta wawan orqu yuriptinqa sacrificiupä rupatsintsik. Mayor ollqu tsurintsik yuriptinqa trokintami ofrendata Tayta Diospä apantsik. 16 Tayta Dios munayninwan Egiptupita jipimanqantsikta imaypis yarparänantsikpämi runakunapa rikrancho o urkuncho señal kanqannö kay fiestapis señal kaykan’ ”.

17 Tayta Dios musyarqanmi filisteo runakuna atacayaptin Israel runakuna mantsarir Egiptuman kutikuyänanpä kanqanta. Tsaymi Israel runakunata Egiptupita Faraón kachariptin filisteo runakunapa nacionninman aywaq nänipaqa, cerca kaptinpis, Tayta Dios pusharqantsu. 18 Tsaypa trokinmi tsunyaq jirkapa tumatsirqan Puka Lamarman aywaq nänipa. Egiptupita Israel runakuna yarqamur tröpa tröpa soldädukunanörämi aywayämurqan.

19 Egiptupita Israel runakunawan yarqamurmi Moisésqa Josépa tullunkunata apamurqan. Manarä wanurmi Israel runakunata José rugakur nirqan: “Canaánman kutiyänaykipämi Tayta Dios shamur yanapayäshunki. Tsaynö yanapayäshuptiki kaypita aywakur tullükunatapis apakurkuyällanki^†”.

Tsaynö nirmi Tayta Diospa jutincho juratsirqan.

20 Sucotpita aywakurmi Israel runakuna Etamman chäyarqan. Tsaypitaqa tsunyaq jirkanami qallaykun. 21 Israel runakunata junaqpa pusharmi ichiraykaq pukutaycho Tayta Dios aywarqan. Tsaynöllami paqaspapis atsikyapänanpä ichiraykaq ninacho aywarqan. Tsaynöpami paqaspapis junaqpapis Israel runakuna aywayarqan. 22 Junaqpaqa ichiraykaq pukutaymi paykunapa puntankunapa imaypis aywaq. Paqaspanami ichiraykaq nina imaypis atsikyapaq.^†