Israel runakunata Egipto runakuna qatipäyanqan
14
Tsaypitanami Moisésta Tayta Dios nirqan: 2 “Israel runakunata niy Pi-Hahirotläpa tikrayänanpä. Tsayqa kaykan Migdolpita lamarman aywanachömi. Lamar kuchunman chaykur Baal-zefónpa tsimpancho patsakur toldunkunata ichïtsiyätsun. 3 Tsaycho kaykäyanqaykita musyarmi Faraón yarpanqa tsunyaq jirkacho pantakashqa puriykäyanqaykita. 4 Noqami Faraónpa shonqunta chukruyätsishä qepaykikunata qatipäyäshunaykipä. Tsaynö qatipaykäyäshuptikimi munaynïwan soldädunkunata ushakätsishä. Tsaynöpami Egipto runakuna musyayanqa munayyuq Tayta Dios kanqäta”.Tsaynö niptinmi Israel runakunaqa yätsinqannölla rurayarqan.
5 Israel runakuna qeshpir aywakuyanqantami Faraónta willayarqan. Tsaymi Faraónqa mandashiqninkunawan yarpachakur niyarqan: “¿Imapätä Israel runakuna aywakuyänanpä nishqantsik? Kananqa ¿pirä arupämäshun?”
6-7 Tsaynö nirmi soqta pachak (600) allinnin kaq carrëtankunata y wakin kaq carrëtakunatapis kamariskatsir soldädunkunawan qepanta aywayarqan. Cada carrëtachömi juk capitanpis aywarqan. 8 Tsaynö qatipäyänanpämi Faraónpa shonqunta Tayta Dios chukruyätsirqan. Tsaymi Israel runakuna yarquyänanpä Egipto runakunata mantsariypä castïgukunawan Tayta Dios castigaykaptinpis mana tantiyakuypa qatipäyarqan.
9 Egipto runakuna soldädunkunawan, carrëtankunawan y cawallunkunawan qatiparmi Israel runakuna patsaräyanqan kaqman taripaykäyarqanna. Israel runakunaqa Pi-hahirotpa ñöpan Baal-Zefónpa tsimpan lamar kuchunchömi patsaraykäyarqan. 10 Soldädunkunawan Faraón chaykaqta rikaykurmi Israel runakuna pasaypa mantsakar salvananpä Tayta Diosta mañakuyarqan. 11 Tsaymi Moisésta niyarqan: “¿Manatsurä Egiptucho panteonkuna kan tsaycho wanur pampakuyänäpä? ¿Imapätä jipiyämarqayki kay tsunyaq jirkacho ushakäyänäpä? 12 Kaynö kananpä kanqanta mayarmi Egiptullachörä kaykar niyarqä: ‘Jina Egipto runakunata arupar täkuyäshä. Tsunyaq jirkacho wanuyänäpa trokinqa mas allimi kanman Egipto runakunapa wätaynin kayaptï’ ”.
13 Tsaynö niyaptinmi Moisés nirqan: “Mantsariyänaykipa trokinqa kallpata tsariyay. Kananmi rikayanki Tayta Dios imanö salvamanqantsikta. Kananpitaqa mananami imaypis Egipto runakunata rikayankinatsu. 14 Ama llakikuyaytsu. Tayta Diosmi janantsik shärinqa”.
Israel runakuna Puka Lamarpa päsayanqan
15 Tsaypitanami Moisésta Tayta Dios nirqan: “¿Imanirtä mañakamällar kaykanki? Israel runakunata ras aywayänanpä niy. 16 Tsaynöpis tukruykita lamar jananpa toqiy ishkayman yaku rakikänanpä. Tsaymi Israel runakuna lamar rakikashqa chawpinpa tsakipana päsayanqa. 17 Egipto runakuna qatipäyäshunaykipämi shonqunkunata chukruyätsishä. Kananmi Faraónta, soldädunkunata, carrëtankunata y cawallunkunatapis ushakätsishä munayyuq kanqäta pïmaypis musyananpä. 18 Carrëtantinta cawalluntinta Faraónta ushakätsiptïmi Egipto runakunapis musyayanqa munayyuq Tayta Dios kanqäta”.
19 Tsaymi Tayta Diospa angelninwan ichiraykaq pukutaypis Israel runakunapa puntanta aywaykanqanpita qepankunaman churakaskirqan. 20 Tsaynö qepankunaman churakaskirmi Israel runakunata Egipto runakuna mana taripäyänanpä tsaparqan. Egipto runakuna aywayanqan kaqpa pukutay pasaypa tsakaptinmi rikayta mana kamäpakur warat aywarpis Israel runakunata taripäyarqantsu. Israel runakuna aywayanqan kaqpami itsanqa pukutay atsikyaparqan.
21 Moisésnami makinta lamar jananpa joqarirqan. Tsaymi rupay yarqamunanläpita Tayta Dios pasaypa wayratsimur tsay paqas lamarta ishkayman rakirqan.† Tsaymi yaku rakikanqan kaq tsakina karqan. 22 Ishkanlächo murällanörä yaku ichiraptinmi chawpinpa Israel runakuna tsakillapana päsayarqan.†
23 Israel runakunata qatiparmi Egipto runakunaqa Faraónpa cawallunkunawan carrëtankunawan lamar pullanyaq yaykuyarqan. 24 Patsa manarä waraptinmi pukutaypita y nina ichiraykaqpita Tayta Dios pantakätsiptin Egipto soldädukuna ima ruraytapis kamäpakuyarqantsu. 25 Carrëtankunapa ruëdankunatapis Tayta Dios jipikätsiptinmi aywaytapis kamäpakuyarqannatsu. Tsaymi Egipto runakuna kikinkunapura niyarqan: “Israel runakunapita qeshpir aywakushun. Tayta Diosmi paykunapa janankuna shärir contrantsik kaykan”.
26 Tsaynami Moisésta Tayta Dios nirqan: “Makikita lamar jananpa joqariy llapan yaku takukar Egipto runakunata carrëtantinta y cawalluntinta ultakurkunanpä”.
27 Niptinmi lamar jananpa makinta Moisés joqarirqan. Tsaymi patsa waraykaptinna kanqanman yaku kutir Egipto runakuna qeshpiykaqta ultaskirqan. Tsaynöpami lamar chawpincho Egipto runakunata Tayta Dios ushakätsirqan. 28 Kanqanman yaku kutirmi Faraónpa carrëtankunata, cawallunkunata y soldädunkunatapis tsapaskirqan. Tsaymi Israel runakunata qatipar yaykuqkuna ni jukllayllapis qeshpiyarqantsu.
29 Israel runakunami itsanqa ishkanlächo yaku murällanö kaptin tsakillapana tsimpayarqan. 30 Tsay junaqmi Egipto runakunapa munayninpita Israel runakunata jipimur Tayta Dios salvarqan. Tsaynö salvaptinmi Egipto runakunapa ayankunata Israel runakuna rikayarqan lamar kuchuncho jitaraykaqta. 31 Egipto runakunata munayninwan Tayta Dios ushakätsinqanta rikaykurmi Israel runakuna mantsarir payman y sirviqnin Moisésman yärakuyarqan.