Punta yuriqkuna wanuyänanpä kanqanta tantiyatsinqan
11
Tsaymi Moisésta Tayta Dios nirqan: “Yapayrämi Faraónta y Egipto runakunata castigashä. Tsaynö castigaptïmi kaypita aywakuyänaykipä kikin qarquyäshunki. 2 Kananqa Israel runakunata ollqutapis warmitapis ninki Egipto runakunata qellaypita y qoripita rurashqa alhäjakunata cada ünun mañakuyänanpä”.3 Tayta Diosmi Egipto runakunapa yarpayninman churarqan Israel runakunata alli rikayänanpä. Tsaynöllami Faraónpa mandashiqninkunawan wakin Egipto runakunapis Moisés imaykapäpis munayyuq kanqanta yarpäyarqan.
4 Tsaymi Faraónta Moisés nirqan: “Tayta Diosmi nishqa: ‘Pullan paqasmi päsashä entëru Egiptupa. 5 Tsaypa päsaptïmi llapan Egipto runakunapa mayor kaq tsurinkuna wanuyanqa. Faraónpa mayor tsurinpita qallaykurmi maraycho aqakuq wätay warmipa mayor wawanpis wanunqa. Tsaynöllami llapan malta uywakunapa punta yuriq orqu wawankunapis wanur ushakanqa. 6 Tsaynö wanuyaptinmi Egiptucho runakuna pasaypa llakikur waqayanqa. Tsaynöqa Egiptucho imaypis manami waqayarqantsu y yapayqa manami waqayanqanatsu’ ”.
7 “Egipto runakuna tsaynö waqayaptinpis Israel runakuna täyanqanchöqa manami allqullapis aullanqatsu. Israel runakuna kaqcho runapis ni uywapis mana wanuyaptinmi musyayanki Israel runakunata Tayta Dios kuyanqanta. 8 Tsayrämi mandar yanapashuqnikikunapis ñöpäman qonqurikuykur niyämanqa: ‘Israel runakunata kaypita pushakurkur aywakuy’. Tsaynö mana niyämaptinqa manarämi yarquyäshätsu”.
Tsaynö niskirmi Faraónpa ñöpanpita pasaypa rabyanashqa Moisés aywakurqan.
9 Tsaypitanami Moisésta Tayta Dios nirqan: “Qamkuna imata niyaptikipis Faraónqa manami cäsuyäshunkitsu. Tsaymi kay Egiptucho mantsariypä castïgukunawan castigashä”.
10 Faraónpa ñöpancho Moiséswan Aarón mantsariypä kaqkunata rurayaptinpis Tayta Diosmi Faraónpa shonqunta chukruyätsirqan. Tsaymi Faraónqa Israel runakuna Egiptupita yarquyänanta munarqantsu.