Tsaytsika chukllushkuna yuriyanqan
10
Tsaypitanami Moisésta Tayta Dios nirqan: “Faraón kaqman ayway. Alläpa mantsariypä castïgukunawan castiganäpämi paypata y mandashiqninkunapatapis shonqunkunata chukruyätsishqä. 2 Munayyuq Tayta Dios kanqäta musyarnami Egiptucho mantsakaypä castiganqäta wamraykikunata y willkaykikunatapis willayanki”.3 Tsaynö niptinmi Moiséswan Aarón Faraón kaqman aywaykur niyarqan: “Hebreo runakunapaa Tayta Diosninmi nin: ‘¿Imayyaqtä cäsukamayta munankitsu? ¡Kuyanqä runakunata adoramaq aywayänanpä kachariy! 4 Kachariyta mana munaptikiqa waray junaqmi nacionnikiman atska chukllushkunata yuritsimushä. 5 Tsaykunami ishniyparä patsapis mana rikakanqanyaq juntayämunqa. Runtu tamyapita qeshpiq kaqtapis chipyaqmi ushanqa. Tsaynöllami llapan jachakunatapis mikur ushayanqa. 6 Tsaykunami juntayanqa palaciuykimanpis, mandar yanapashuqnikikunapa wayinkunamanpis y llapan Egiptucho taq runakunapa wayinkunamanpis. Tsaytanöqa taytaykipis ni awiluykikunapis imaypis manami rikayashqatsu’ ”.
Tsaynö niskirmi Faraónpa palaciunpita Moisés aywakurqan.
7 Tsaymi mandashiqninkuna Faraónta niyarqan: “Taytay, ¿imayyaqnatä tsay runa mana allita ruramäshun? Jina Tayta Diosninkunata adoraq aywayänanpä kachaykuy. ¿Manaku tantiyanki Egiptucho imaykapis chipyaqna ushakanqanta?”
8 Tsaynö niyaptinmi Moisésta y Aarónta Faraónqa yapay qayaykatsir nirqan: “Kananqa Tayta Diosnikikunata adorayänaykipä aywayay. Itsanqa pï pï aywayänanpä kanqantapis willayämay”.
9 Moisésnami nirqan: “Noqakunaqa Tayta Diosta adorarmi jatun fiestata rurayäshä. Tsaymi llapäkuna aywayäshä ollqu wamräkunata, warmi wamräkunata y awilükunatapis pushakurkur. Tsaynöllami üshäkunata, cabräkunata y wäkäkunata chipyaq qatikurkur aywayäshä”.
10 Faraónnami nirqan: “¡Ajä! ‘Tayta Diosmi yanapaykämantsik’ niq tumpalla aywakuyänaykipä kanqanta ¿mana tantiyanqätaku yarpäyanki? ¿Wamraykikunawan llapayki aywayänaykipä kachänätaku yarpäyanki? 11 Manami yarpanqaykinötsu kanqa. Tayta Diosta adoraq aywayta munarqa ollqu kaqkunalla aywayay. Ollqu kaqkunalla aywayänaykipämi niyämashqayki”.
Tsaynö nirmi paykunata ñöpanpita qarqutsirqan.
12 Tsaypitanami Moisésta Tayta Dios nirqan: “Atska chukllushkuna shayämunanpä Egipto nacionman makikita joqariy. Tsay chukllushkunami ushayanqa llapan plantakunata y runtu tamya mana ushanqankunatapis”.
13 Tsaynö niptinmi Egiptuman tukrunta Moisés joqarirqan. Tsaymi rupay yarqamunanläpita juk paqas y juk junaq Tayta Dios wayratsimurqan. Tsay wayrawanmi patsa waränanpäqa tsaytsika chukllushkuna kaykäyänä. 14 Tsaynöpami llapan Egiptuman chukllushkuna juntäyarqan. Tsaytsika chukllushkuna imaypis manami kashqatsu ni imaypis kanqatsu.† 15 Tsaymi juntäyarqan patsapis mana rikakanqanyaq. Tsaynö ishniyparä karmi llapan plantakunata y runtu tamyapita qeshpiq jachakunapa wayuynintapis mikuyarqan. Tsaymi Egiptucho jachakunapis ni qewakunapis verdiqa quëdarqantsu.
16 Tsaymi Moisésta y Aarónta juklla qayaykatsir Faraón nirqan: “Mana cäsukurmi Tayta Diosnikikunapa contran y qamkunapa contraykikuna jutsata rurashqä. 17 Tsaymi qamkunata rugakü kananllana perdonaykayämänaykipä. Tsaynölla Tayta Diosnikikunata mañakuykuyällay kay chukllushkunata illakaykatsinanpä”.
18 Tsaymi Faraónpa palaciunpita Moisés yarquskir Tayta Diosta jinan höra mañakurqan. 19 Mañakuptinmi rupay jeqananläpita Tayta Dios pasaypa wayratsimurqan. Tsay wayra llapan chukllushkunata Puka Lamarman apaptinmi llapan Egiptucho ushakäyarqan.
20 Tsaynö kaptinpis Faraónpa shonqunta Tayta Dios yapay chukruyätsiptinmi Israel runakuna yarquyänanta munarqantsu.
Patsa tsakanqan
21 Tsaypitanami Moisésta Tayta Dios nirqan: “Llapan Egiptucho pasaypa tsakänanpä ciëlupa makikita joqariy”.
22 Ninqannö makinta Moisés joqariptinmi kimsa junaqyaq Egiptucho pasaypa tsakarqan.† 23 Tsaymi Egipto runakunaqa kimsa junaq pitapis rikayarqantsu ni maypa aywaytapis kamäpakuyarqantsu. Israel runakuna täyanqan partichöqa manami tsakarqantsu.
24 Tsaynami Moisésta qayaykatsir Faraón nirqan: “Tayta Diosta adorayänaykipä wamraykikunawan llapayki aywayay. Üshaykikunata, cabraykikunata y wäkaykikunata itsanqa kayllacho jaqiykuyay”.
25 Faraón tsaynö niptinmi Moisés nirqan: “Uywäkunata qatiyänäta mana munarqa ¿qamtsurä uywakunata kamaripäyämanki Tayta Diosnïta adorar sacrificiukunata rupatsiyänäpä? 26 Uywäkunataqa juktapis mana jaqiypami llapanta qatiyäshä. Tsay uywakunapitami akrayäshä sacrificiuta rupatsir Tayta Diosnïta adorayänäpä. Manarä charqa manami musyayärätsu ayka uywata rupatsiyänäpä kanqantapis”.
27 Tsaynö niptinmi Faraónpa shonqunta Tayta Dios yapay chukruyätsirqan Israel runakunata mana kachänanpä. 28 Tsaymi Moisésta Faraón nirqan: “Ñöpäpita witikuy. Kananpitaqa manami rikaytapis munätsu. Yapay kutimuptikiqa wanutsishaykimi”.
29 Moisésnami nirqan: “Ninqaykinömi kanqa. Kananpitaqa imaypis manami rikayämankinatsu”.