Pestiwan uywakuna wanuyanqan
9
Tsaypitanami Moisésta Tayta Dios nirqan: “Aywaykur Faraónta ninki: ‘Hebreo runakunapaa Tayta Diosninmi nin: Kuyanqä hebreo runakunata adoramaq aywayänanpä kachariy. 2 Aywayänanta mana munar yapay michaptikiqa 3 llapan Egiptumanmi pesti qeshyata kachamushä. Tsaywanmi wanuyanqa cawallukuna, ashnukuna, camëllukuna, wäkakuna, üshakuna y cabrakunapis. 4 Egipto runakunapa uywankuna qeshyawan wanuyaptinpis Israel runakunapa uywankunaqa manami ni jukllayllapis wanuyanqatsu’ ”.5 Nirkurmi Tayta Dios nirqan: “Waraymi tsay ninqäta rurashä”.
6 Ninqannölla waraynin junaq ruraptinmi Egipto runakunapa uywankuna wanuyarqan. Israel runakunapami itsanqa ni jukllayllapis wanuyarqantsu. 7 Tsaymi Israel runakunapa uywankunata rikamuq Faraón kachaptin wanushqataqa ni jukllayllatapis tariyarqantsu. Tsaynö kaykaptinpis Faraónqa shonqun yapay chukruyaptinmi Israel runakuna aywayänanta munarqantsu.
Runakunata y uywakunata chupu qeshya ushanqan
8 Tsaymi Moiséstawan Aarónta Tayta Dios nirqan: “Jornupita uchpata achkuskir Faraónpa ñöpanman aywayay. Chaykur Faraónpa ñöpancho uchpata junishpa Moisés jichatsun. 9 Tsay uchpataqa llapan Egiptupami polvutanö wayra apanqa. Tsaymi chupu yurinqa Egipto runakunacho y uywankunachöpis”.
10 Tayta Dios ninqannömi Moiséswan Aarón jornupita uchpata achkuyarqan. Faraón kaqman aywaykurmi uchpata junishpa Moisés jicharqan. Tsaymi runakunatapis uywakunatapis chupu qeshya usharqan.† 11 Wakin runakunatanölla brüjukunatapis chupu ushaptinmi Moiséspa ñöpanman brüjukuna aywayarqannatsu.
12 Yapaypis Tayta Diosmi Faraónpa shonqunta chukruyätsirqan. Tsaymi Faraónqa Moiséswan Aarón ninqanta cäsurqantsu. Tsaynö karqan Moisésta Tayta Dios ninqannöllami.
Runtu tamya kanqan
13 Tsaypitanami Moisésta Tayta Dios nirqan: “Waray tutalla aywaykur Faraónta ninki: ‘Hebreo runakunapa Tayta Diosninmi nin: Adoramaq aywayänanpä kuyanqä runakunata kachariy. 14 Mana kachariptikiqa kananyaq castiganqäpitapis peormi castigashayki. Tsaynöllami castigashä mandar yanapashuqnikikunata y llapan Egiptucho taq runakunatapis. Tsayrämi tantiyanki kay patsacho japallä munayyuq Dios kanqäta. 15 Munarqa maynami qamtapis llapan Egipto runakunatapis mantsaypa qeshyawan ushakätsïman karqan. 16 Tsaynö kaptinpis maytsaychöpis taq runakuna munayyuq kanqäta musyayänanpämi qamta ushakätsishqätsu.†
17 “ ‘Mana tantiyakurmi kuyanqä runakunata michaykanki adoramaq aywayänanta. 18 Tsaymi waray junaq kaynö höra runtu tamyata tamyatsimushä. Tsay runtu tamyanöqa Egipto nación qallaykunqanpita hasta kananyaqpis manami kashqatsu. 19 Kananqa uywaykikunata wayi rurinman qaykatsiy. Wayi rurincho mana llantukuqtaqa uywatapis runatapis llapantami runtu tamya wanutsinqa’ ”.
20 Moisés tsaynö niptinmi Faraónpa wakin mandashiqninkuna Tayta Dios ninqanta cäsukur wätayninkunatapis uywankunatapis wayi rurinman llantutsiyarqan. 21 Wakinmi itsanqa Tayta Dios ninqanta mana cäsukur waqtallacho jaqiykuyarqan.
22 Tsaymi Moisésta Tayta Dios nirqan: “Runtu tamya tamyamunanpä makikita ciëlupa joqariy. Tsay runtu tamyami chanqa Egiptucho kaykaq llapan runakunaman, uywakunaman y chakracho mikuykunamanpis”.
23 Ninqannö ciëluman Moisés tukrunta joqariptinmi llapan Egiptuman Tayta Dios maqakatsimurqan, illaqukatsimurqan y runtu tamyata tamyatsimurqan. 24 Tsaymi runtupis maqakuypis mana päsaypa karqan.† Tsaynöqa imaypis manami Egiptucho karqantsu. 25 Tsaymi tsay runtu tamya llapan Egiptucho runakunatapis uywakunatapis wanutsirqan. Chakracho mikuykunatapis chipyaqmi ushakätsirqan. Tsaynöllami jachakunatapis llapan Egiptucho qallapächuta jaqiykurqan. 26 Tsaynö tamyaykarpis Israel runakuna taykäyanqan Gosén partimanqa manami runtu tamya charqantsu.
27 Tsaymi Moisésta y Aarónta qayaykatsir Faraón nirqan: “Noqa y Egipto runakunami jutsayuq kaykäyä Tayta Dios kaynö castigayämänanpä. 28 Tayta Diosta mañakuyay maqakuytapis runtu tamyatapis päratsinanpä. Kananqa kachäyäshaykimi Tayta Diosta adoraq aywayänaykipä”.
29 Tsaynö niptinmi Moisés nirqan: “Kay markapita yarqunqä höra makïta ciëluman joqarkur Tayta Diosta mañakuptïmi runtu tamyapis maqakuypis päranqa. Tsaynöpami musyanki kay patsapis Tayta Diospa munaynincho kanqanta. 30 Tsaynö kaptinpis musyämi qampis ni mandar yanapashuqnikikunapis Tayta Diospita mana mantsapakuyanqaykita”.
31 Tsay runtu tamyawanmi espigaraykaq cebädapis y tukturaykaq lïnupis chipyaq ushakarqan. 32 Trïgutawan centënataqab qepa muruy kaptinmi ushakätsirqantsu.
33 Markapita yarquskir makinta joqarkur Tayta Diosta Moisés mañakuptinmi jinan höra runtu tamyapis maqakuypis päraskirqan. 34 Tamyapis, runtupis, maqakuypis päraskiptinnami Faraón y mandashiqninkunapis shonqunkunata chukruyätsiyarqan. 35 Tsaymi Israel runakuna Tayta Diosta adoraq aywayänanta Faraón munarqannatsu. Tsaynö karqan Moisésta Tayta Dios ninqannöllami.