8
(7.26) Moisésta Tayta Dios yapay nirqan: “Faraón kaqman aywaykur ninki: ‘Tayta Diosmi nin: Kuyanqä runakuna noqata adoramaq aywayänanpä kachariy.2 (7.27) Aywananta mana munaptikiqa säpukunawanmi llapan nacionnikita castigashä.†3 (7.28) Mayupita ishniypa säpukuna yarqamurmi yaykuyanqa palaciuykimanpis, cämaykimanpis, jornuykimanpis, artësaykimanpis, mandar yanapashuqnikikunapa wayinkunamanpis y llapan Egiptucho taq runakunapa wayinkunamanpis.4 (7.29) Tsay säpukunaqa janaykimanpis, mandar yanapashuqnikikunapa jananmanpis y llapan Egiptucho taq runakunapa jananmanpis saltayanqami’ ”.
5 (1) Mastami Moisésta Tayta Dios nirqan: “Aarónta niy mayukunaman, qochakunaman y pukyukunaman aywaykur tukrunwan toqinanpä. Tsaynö toqiptinmi Egiptuman juntaqpä säpukuna ishniypa yarqayämunqa”.
6 (2) Tsaymi llapan yakuman aywaykur Aarón toqiptin entëru Egiptuman ishniyparä säpukuna yarqayämurqan. 7 (3) Brüjukunapis munayyuq kayanqanta musyatsinanpämi Aarón ruranqannölla säpukunata yakupita yuritsiyämurqan.
8 (4) Nirkurnami Moiséstawan Aarónta qayaykatsir Faraón nirqan: “Tayta Diosta mañakuyay noqapita y Egipto runakunapitapis llapan säpukunata illakätsinanpä. Illakätsiptinqa Tayta Diosta adorar sacrificiuta rupatsiq aywayänanpä Israel runakunata kachäshämi”.
9 (5) Faraóntanami Moisés nirqan: “Tayta Diosta mañakunäpä nimanqayki hörami qampä, mandar yanapashuqnikikunapä y wakin Egipto runakunapäpis mañakushä. Mañakuptïmi palaciuykicho y maytsaychöpis säpukuna wanur ushakäyaptin Nilo mayucho kaqkunallana quëdayanqa”.
10 (6) Faraónnami nirqan: “Waray junaq juklla mañakuykullay”.
Tsaymi Moisés nirqan: “Ninqaykinömi kanqa. Tsaynöpami musyanki Tayta Diosnïman mayqan diospis mana tinkunqanta. 11 (7) Säpukuna palaciuykicho wanur ushakäyaptinmi Nilo mayullachöna quëdayanqa. Tsaynöpami qamta, mandar yanapashuqnikikunata ni pitapis wajupanqanatsu”.
12 (8) Tsaynö niskirmi Faraónpa palaciunpita Moiséswan Aarón aywakuyarqan. Ninqannöllami Tayta Diosta Moisés mañakurqan säpukunata illakätsinanpä. 13 (9) Moisés mañakunqannölla Tayta Dios ruraptinmi llapan säpukuna wanuyarqan wayikunacho, patiukunacho y chakrakunachöpis. 14 (10) Wanushqa säpukunata atska muntunta qoriyaptinmi maytsaychöpis pasaypa asyarqan.
15 (11) Säpukuna illakaskiptinnami Faraónqa yapay shonqunta chukruyätsirqan. Tsaymi cäsurqannatsu Moisésta y Aarónta. Tayta Dios ninqannöllami tsaynö karqan.
Tsaytsika chuspi yurinqan
16 (12) Tsaypitanami Moisésta Tayta Dios nirqan: “Aarónta ninki tukrunwan patsata wirunanpä. Tsaynö wiruptinmi akapa chuspikunamana polvu tikranqa Egiptucho ishniyparä kananpä”.
17 (13) Tsaymi Tayta Dios ninqannölla patsata Aarón wiruskiptin entëru Egiptucho ichishaq chuspikunaman polvu tikrarqan. Tsay chuspikunami maytsaychöpis runakunata y uywakunata kaniyarqan. 18 (14) Tsayta rikarmi brüjukunapis chuspikunata yuritsiyta munayarqan. Itsanqa manami kamäpakuyarqantsu. Tsay chuspikunaqa runakunatapis uywakunatapis pasaypa kanirmi ushayarqan.
19 (15) Tsaymi brüjukuna Faraónta niyarqan: “Kayqa Diospa castïgunmi kaykan”.
Tsaynö niyaptinpis Faraónqa shonqun chukru kaptinmi cäsurqantsu. Tayta Dios ninqannöllami tsaynö karqan.
Tsaytsika upukurukuna yurinqan
20 (16) Tsaypitanami Moisésta Tayta Dios nirqan: “Waray tutami mayuman Faraón aywanqa. Qampis tsaka tsakalla aywaykur payta ninki: ‘Tayta Diosmi nin: Kuyanqä runakunata kachariy adorayämänanpä. 21 (17) Aywayänanta mana munaptikiqa upukurukunatami yuritsimushä qamman, mandar yanapashuqnikikunaman y llapan Egiptucho taq runakunamanpis. Wayichöpis y maytsaychöpis ishniyanqarämi. 22 (18) Tsaynö kaptinpis kuyanqä runakuna täyanqan Gosén partichöqa manami jukllayllapis upukuru kanqatsu. Tsaynöpami musyanki Egipto runakunata noqa Tayta Dios castigaykanqäta. 23 (19) Tsaymi Egipto runakunata castigarpis kuyanqä Israel runakunataqa castigashätsu. Tsay castïguqa waraypitami qallaykunqa’ ”.
24 (20) Tayta Dios ninqannöllami Faraónpa palaciunman, mandashiqninkunapa wayinkunaman y llapan Egiptuman ishniyparä upukurukuna juntarqan. Tsaynö kaptinmi Egipto runakuna ima ruraytapis kamäpakuyarqantsu.
25 (21) Tsaymi Faraónqa Moiséstawan Aarónta qayaykatsir nirqan: “Diosnikikunata adorar sacrificiuta rupatsiyänaykipä aywayay. Itsanqa kay nacionpita ama yarquyaytsu”.
26 (22) Tsaynö niptinmi Moisés nirqan: “Ninqaykinöqa manami allitsu kanqa. Tayta Diosnïta adorar sacrificiuta rupatsiyanqäqa Egipto runakunapä pasaypa melanaypämi kanqa. Sacrificiuta rupaykätsiqta rikayämarqa pasaypa rabyanarninmi rumiwanpis saqmayämanqa. 27 (23) Tsaymi kimsa junaq aywayta tsunyaq jirkaman aywayäshä. Tsaychörämi Tayta Diosnï ninqannö sacrificiuta rupatsir adorayäshä”.
28 (24) Tsaynö niptinmi Faraón nirqan: “Tsaynö kaptinqa tsunyaq jirkaman aywayay Tayta Diosnikikunata adorar sacrificiuta rupatsiyänaykipä. Itsanqa alläpa karumanqa ama aywayaytsu. Tsaycho noqapäpis mañakuykuyällanki”.
29 (25) Tsaynö niptinmi Moisés nirqan: “Kaypita yarqur jukllami Tayta Diosta mañakushä upukurukunata qampita, mandar yanapashuqnikikunapita y llapan Egiptupitapis illakätsinanpä. Kachäyämänaykipä kanqanta kanan yarparpis paqtä waray junaq juk yarpaywan yuriskamur Tayta Diosta adoraq aywayänäta michäyämankiman”.
30 (26) Tsaymi Faraónpa palaciunpita yarquskir Moisésqa Tayta Diosta juklla mañakurqan. 31 (27) Mañakunqannö Tayta Dios ruraptinmi upukurukuna Faraónpita, mandashiqninkunapita y llapan Egiptucho taq runakunapita illakar ni jukpis karqannatsu. 32 (28) Upukurukuna illakaskiptinqa yapaymi Faraónpa shonqun chukruyaskirqan. Tsaymi munarqannatsu Israel runakuna aywayänanta.