Moiséspa tukrun culebraman tikranqan
7
Tsaynö niptinmi Moisésta Tayta Dios nirqan: “Shumaq wiyamay. Qamtami churashqä Faraónpa ñöpancho noqapa trokï parlanaykipä. Wawqiki Aarónnami willakuqniki kar Faraónta parlapanqa. 2 Qammi llapan ninqäkunata Aarónta willanki. Paynami Faraónwan parlanqa Israel runakunata nacionninpita kachapäyäshunaykipä. 3 Tsaynö parlapaptinpis Faraónpa shonqunta chukruyätsiptï manami jukllaqa kachapäyäshunkitsu. Mana kachapäyäshuptikimi mantsariypä castïgukunawan Egipto runakunata castigashä.† 4 Castigaykaptïpis Faraónqa manami cäsuyäshunkitsu. Tsaymi paykunata masrä castigarkur kuyanqä Israel runakunata tröpa tröpa jipimushä. 5 Israel runakunata tsaynö jipiptïmi Egipto runakuna tantiyayanqa munayyuq Tayta Dios kanqäta”.6 Tayta Dios ninqannöllami Moiséswan Aarón aywayarqan Faraónwan parlayänanpä. 7 Faraónwan parlanqan witsanmi puwaq chunka (80) watayuq Moisés kaykarqan. Tsaynöllami Aarónpis puwaq chunka kimsa (83) watayuq kaykarqan.
8 Tsaypitanami Moiséstawan Aarónta Tayta Dios nirqan: 9 “Faraón ima milagrutapis ruranaykipä nishuptikiqa Aarónta ninki tukrunta ñöpanman jitaykunanpä. Jitaykuptinmi culebraman tikranqa”.
10 Tsaynö niptinmi Moiséswan Aarón aywar Tayta Dios ninqannölla Faraónpa ñöpancho llapantapis rurayarqan. Tsaymi Faraónpa y mandashiqninkunapa ñöpancho tukrunta patsaman Aarón jitaykuptin culebraman tikrarqan. 11 Tsayta rikaykurmi Faraónpis suerti qatiqkunatawan brüjukunata qayatsirqan. Brüju karmi paykunapis tsaynölla rurayarqan. 12 Tsaymi tukrunkunata patsaman jitaykuptin culebraman tikrarqan. Tsaychömi Aarónpa tukrun paykunapa tukrunkunata mikuskirqan. 13 Tsayta rikaykarpis Tayta Dios ninqannöllami Faraónqa chukru shonqu tikrar Moiséstawan Aarónta cäsurqantsu.
Yawarman yaku tikranqan
14 Tsaypitanami Moisésta Tayta Dios nirqan: “Faraónqa chukru shonquyashqami kaykan. Tsaymi Israel runakunata kachariyta munantsu. 15 Waray tuta ayway mayuman Faraón bäñakuq aywaptin tsaycho shuyänaykipä. Tsayman apanki culebraman tikraq tukruykita. 16 Faraónwan tinkur ninki: ‘Hebreo runakunapaa Tayta Diosninmi kachamashqa qamta ninäpä: “Kuyanqan runakunatashi kacharinki tsunyaq jirkaman aywaykur adorayänanpä”.
“ ‘Tayta Dios tsaynö nimanqanta nikaptïpis kananyaq manami cäsumashqaykitsu. 17 Kananmi musyanki Tayta Dios pï kanqantapis. Tayta Dios nimanqannöllami kay aptaraykanqä tukruwan mayuta wiruptï yawarman yaku tikranqa.† 18 Tsaymi mayucho pescädukunapis wanur ushakäyanqa. Pasaypa asyaptinmi Egipto runakunapis tsay yakuta melanar upuyanqatsu’ ”.
19 Mastami Moisésta Tayta Dios nirqan: “Aarónta ninki tukrunta aptarkur mayukuna, raqrakuna, qochakuna pukyukuna jananpa toqinanpä. Tsaynöpami llapan yakukuna yawarman tikranqa. Rumipita y qerupita rurashqa yaku churaräkunankunachöpis yawarllanami kanqa”.
20 Tayta Dios ninqannöllami Moiséswan Aarón llapanta rurayarqan. Tsaymi Faraónpa y mandashiqninkunapa ñöpancho Aarónqa mayuta tukrunwan wirurqan. Wiruskiptinmi jinan höra llapan yaku yawarman tikrarqan. 21 Tsaymi mayucho pescädukuna wanuyarqan y mayupis pasaypa asyarqan. Tsaynö asyaptinmi Egipto runakuna tsay yakuta upuyarqannatsu. Egiptuchöqa llapan yaku yawarllanami karqan.
22 Tsaynöllami Egiptucho taq brüjukunapis yakuta yawarman tikratsiyarqan. Tsayta rikarmi Tayta Dios ninqannölla Moiséswan Aarón niyanqanta Faraón cäsurqantsu. 23 Imatapis mana cäsurmi palaciunman Faraón kutirqan. 24 Mayu yaku upuyänanpä mana alli kaptinmi Egipto runakuna mayu kuchunkunacho pözukunata uchkuyarqan tsaypitana chuya yakuta upuyänanpä.
Tsaytsika säpu yurinqan
25 Mayuta wirutsinqanpita qanchis junaqtanami