2 Mastami Moisésta Tayta Dios nirqan: “Noqaqa Yahwehmi kaykä. 3 Abrahamta, Isaacta y Jacobta yuripaykurmi El-Shaddai^a kanqäta musyatsirqä. Paykunata manami willarqätsu jutï Yahweh kanqanta.^† 4 Paykunawanmi pactuta rurarqä Canaánta rikatsinäpä.^† Tsaychömi jäpanölla paykuna täyarqan. 5 Egipto runakuna ñakatsiyaptin Israel runakuna waqaykäyanqanta wiyarmi pactu ruranqäta kanan cumplishä.

6 “Tsaynö kaptinqa aywar Israel mayikikunata willar ninki: ‘Tayta Diosmi nin: Noqaqa Tayta Diosmi kaykä. Egipto runakuna pasaypa ñakatsir arutsiyäshunqaykipitami jipiyäshayki. Munaynïwanmi Egipto runakunata mantsariypä castïgukunawan castigashä. 7 Noqami qoriyäshayki kuyanqä runakuna kayänaykipä. Qamkunapa Diosnikikunami kashä.^† Tsaynöpami musyayanki Egipto runakuna ñakatsiyäshunqaykipita jipimushuqniki Tayta Dios kanqäta. 8 Nirkurmi pushayäshayki Abrahamta, Isaacta y Jacobta entreganäpä rikatsinqä nacionman. Noqa Tayta Diosmi tsaynö nï’ ”.

9 Tayta Dios tsaynö ninqantami Israel mayinkunata Moisés willarqan. Willaptinpis pasaypa ñakarmi willanqanta cäsuyarqantsu.

10 Tsaymi Moisésta Tayta Dios nirqan: 11 “Aywar Faraónta ninki Israel runakunata nacionninpita kachapäshunaykipä”.

12 Tsaynö niptinmi Tayta Diosta Moisés nirqan: “Israel mayïkunapis mana cäsuykämaptinqa Faraónnäqa cäsumanmanräku. Noqaqa parlaytapis manami shumaq yachätsu”.

13 Tsaynö niptinpis Moiséstawan Aaróntami Tayta Dios kacharqan Israel runakunata y Faraónta willayänanpä: “Tayta Diosmi nin Egiptupita Israel runakuna yarquyänanpä”.

14 Kaychömi qellqaraykan Israel runakunapa unay mandaqninkunapa jutinkuna. Israelpa mayor tsurin Rubénpa tsurinkunami kayarqan Hanoc, Falú, Hezrón y Carmi. Tsay runakunapitami Rubén trïbu castakuna kayan.

15 Simeónpa tsurinkunami kayarqan Jemuel, Jamín, Ohad, Jaquín, Zohar y Saúl. Saúlpa mamanqa cananea warmimi karqan. Tsay runakunapitami Simeón trïbu castakuna kayan.

16 Leví kawarqan juk pachak kimsa chunka qanchis (137) watayuq kanqanyaqmi. Paypa tsurinkunami mayorpita qepayaq kayarqan Gersón, Coat y Merari.

17 Gersónpa tsurinkunami kayarqan Libni y Simei. Paykunapitami Libni y Simei casta runakuna kayan.

18 Coat kawarqan juk pachak kimsa chunka kimsa (133) watayuq kanqanyaqmi. Paypa tsurinkunami kayarqan Amram, Izhar, Hebrón y Uziel.

19 Meraripa tsurinkunami kayarqan Mahli y Musi.

Gersón, Coat y Meraripitami levitakuna kayan.^†

20 Coatpa tsurin Amrammi tiyan Jocabedwan tarqan. Jocabedpa wawankunami kayarqan Aarón y Moisés. Amram kawarqan juk pachak kimsa chunka qanchis (137) watayuq kanqanyaqmi.

21 Izharpa tsurinkunami kayarqan Coré, Nefeg y Zicri.

22 Uzielpa tsurinkunami kayarqan Misael, Elzafán y Sitri.

23 Aarónnami Aminadabpa tsurin Elisabetwan tarqan. Elisabetqa karqan Naasónpa paninmi. Aarónpa tsurinkunami kayarqan Nadab, Abiú, Eleazar y Itamar.

24 Corépa tsurinkunami kayarqan Asir, Elcana y Abiasaf. Tsay runakunapitami Coré casta runakuna kayan.

25 Aarónpa tsurin Eleazarnami Futielpa tsurinwan tarqan. Eleazarpa tsurinmi Finees karqan.

Tsaynömi levitakunapa unay castankuna kayarqan. Cada mandaqpitami juk casta kayan. 26 Amrampa tsurin Aarónta y Moiséstami Tayta Dios nirqan: “Israel runakunata tröpanpa tröpanpa qoriskir Egiptupita jipiyämuy”.

27 Tayta Dios ninqannöllami Israel runakunata jipiyämunanpä Aarónwan Moisés Egiptupa mandaqnin Faraónwan parlayarqan.

28 Tayta Dios Egiptucho Moiséswan parlanqan junaqmi 29 nirqan: “¡Noqaqa Tayta Diosmi kä! Egipto nacionpa mandaqnin Faraónta llapan ninqäkunata willanki”.

30 Tsaymi Moisés nirqan: “Tayta Dios, noqaqa manami tantiyatsiyta kamäpakütsu. Tsaynö kaykaptïqa ¿imanörä Faraón cäsumanqa?”