Moiséswan Aarón Faraónman aywayanqan
5
Tsaypitanami Faraónman aywaykur Moiséswan Aarón niyarqan: “Israel runakunata kuyaq Tayta Diosmi nin: ‘Kuyanqä runakunata kachariy tsunyaq jirkaman aywaykur noqata adorayämarnin fiestata rurayänanpä’ ”.2 Tsaynö niyaptinmi Faraón nirqan: “¿Pitä Tayta Diosnikiqa payta cäsukur Israel runakunata ‘ayway ari’ ninäpäqa? Tayta Diosnikitaqa manami reqïtsu. Israel runakunataqa aywakuyänanpä manami kachapäshätsu”.
3 Tsaynö niptinmi Moiséswan Aarón niyarqan: “Hebreo runakunapaa Tayta Diosninmi yuripäyämashqa. Tsaymi kimsa junaq aywayta tsunyaq jirkaman aywar sacrificiuta rupatsir Tayta Diosnïta adorayäshä. Tsaynö mana rurayaptïqa qeshyawanpis o guërrawanpis ushakätsiyämanqami”.
4 Tsaymi Egipto nacionpa mandaqnin reyqa nirqan: “Moisés y Aarón, ¿imanirtä runakuna alli arukuykäyaqta tiempunta perdiykätsiyanki? ¡Juklla aruq aywayay! 5 Kaytsika Israel runakuna alli arukuykaqta ¿imanirtä willapaykäyanki?”
Israel runakunata mana jamatsiypa arutsiyanqan
6 Tsaynö nirmi tsay junaq capatazninkunatawan yanapaqninkunata Faraón nirqan: 7 “Kananpitaqa amana päjata kamaripäyaynatsu Israel runakuna adöbita sutayänanpä. Kikinkunana päja ashimuq aywayätsun. 8 Ñöpata adöbita sutayanqannölla rurayänanpä obligayay. Tsay runakunaqa aruyta qelanarninmi nikäyan: ‘Tsunyaq jirkaman aywar Diosnïkunapä sacrificiuta rupatsiyäshä’. 9 Kanan junaqpita Israel runakunata mana jamatsiypa arutsiyay. Aruywan ñitipakashqa karmi criyitsiyanqankunatapis cäsupäyanqanatsu”.
10 Tsaymi capatazkuna y yanapaqninkuna aywar Israel runakunata niyarqan: “Faraónmi niyämashqa kananpita päjata manana kamaripäyänäpä. 11 Kananpitaqa adöbita sutayänaykipä kikikikunami päjatapis ashiyämunki. Tsaynöpis ñöpata sutayanqaykinöllami jukllayllapis mana pishiqta adöbita sutayanki”.
12 Tsaymi Israel runakunaqa entëru Egiptupa mashtakäyarqan päjapa trokin raströjukunata ashirnin.
13 Capatazkunanami niyarqan: “Päjata kamaripäyäshuptiki adöbita sutayanqaykinölla kananpis rurayay”.
14 Yanapaqninkuna cumplitsiyta mana kamäpakuyaptinmi capatazkuna castigayarqan: “Qäyanpis ni kananpis ¿imanirtä ñöpata sutatsiyanqaykinö cumplitsiyankitsu?”
(Capatazkunapa yanapaqninkunaqa Israel runakunami kayarqan.)
15 Tsaymi capatazkunapa yanapaqninkunaqa Faraónman quejakuq aywar niyarqan: “Taytay, sirvishuqniki kaykäyaptïqa ¿imanirtä pasaypa ñakatsiyämanki? 16 Capataznikikunaqa päjatapis mana kamariykämurmi ñöpata sutatsiyanqänölla cumplitsiyänäta munayan. Tsaynö cumpliykätsiyaptïpis pasaypami maqayäman. Taytay, päjata mana kamarimurmi capataznikikuna jutsayuq kaykäyan adöbi sutayta mana cumplitsiyänäpä”.
17 Faraónnami nirqan: “¡Qela runakunami kayanki! Tsaymi ‘Tayta Diospä sacrificiuta rupatsiq aywayäshä’ nir puriykäyanki. 18 Tsaynö puriyänaykipa trokinqa juklla aruq aywayay. Päjata manana kamaripäyäshuptikipis juktapis mana pishiqtami adöbita sutatsiyänayki”.
19 Imanöpapis tareata cumplitsiyänanpä niptinmi capatazkunapa yanapaqninkuna pasaypa llakikuyarqan. 20 Faraónwan palaciuncho parlayanqanpita yarqayämurmi Moiséswan Aarón shuyaraykaqta capatazkunapa yanapaqninkuna tariyarqan. 21 Tsaymi niyarqan: “Kayjinanpa ñakatsiyämänanpä qamkunami Faraónta ajanätsiyashqayki. Wanutsiyämänanpä cuchilluta aptapaqnömi achäquita ashipäyashqayki. ¡Tsaynö rurayanqaykipita Tayta Dios castigayäshuy!”
22 Tsaynö niyaptinmi Tayta Diosta mañakur Moisés nirqan: “Tayta Dios, ¿imanirtä pasaypa ñakaykätsinki akranqayki runakunata? ¿Tsaypäku kachamarqayki? 23 Faraónwan parlaq aywanqä junaqpitami kuyanqayki runakunata maqa maqarkur arutsirnin pasaypa ñakaykätsiyan. Tsaynö ñakaykätsiyaptinpis manami paykunata salvaykunkitsu”.