Moisés imanö rurananpäpis tantiyatsinqan
4
Tsaypitanami Moisés nirqan: “Willaptïpis Israel mayïkuna manami criyiyämanqatsu ni cäsukayämanqatsu. Tsaynöllami niyämanqa: ‘Qamtaqa ¿imanöpatä Tayta Dios yuripäshunkiman?’ ”2 Niptinmi Tayta Dios tapurqan: “¿Imatatä aptaraykanki?”
Tsaymi Moisés nirqan: “Taytay, tukrütami aptaraykä”.
3 Niptinmi Tayta Dios nirqan: “Patsaman jitay”.
Patsaman jitaykuptinmi culebraman tikrarqan. Tsayta rikaykurmi mantsakar qepaman Moisés saltarqan.
4 Tsaymi Tayta Dios nirqan: “Chupapita tsariy”.
Chupapita tsariskiptinmi culebraqa tukrunmanna tikraskirqan.
5 Nirkurnami Tayta Dios nirqan: “Tsayta rikarmi Abrahampa, Isaacpa y Jacobpa Tayta Diosnin yuripanqäta paykuna criyiyanqa”.
6 Mastami Tayta Dios nirqan: “Kananqa makikita oqllaynikiman jatiy”.
Niptinmi makinta oqllayninman jatirqan. Jipiriptinnami leprawan rashtanö yuraqashqa kaykänä. 7 Tayta Diosnami nirqan: “Yapay makikita oqllaynikiman jatiy”.
Tayta Dios ninqannöllami rurarqan. Makinta oqllayninpita jipiskiptinnami sänuna kaykänä.
8 Tsaykunata ruraskatsirnami Tayta Dios nirqan: “Punta kaq señalta mana criyirpis yapay mas jukaq señalta ruraptikimi criyiyäshunki. 9 Ishkay kaq señaltapis mana criyiyaptinmi mayupita yakuta chaqarkur patsaman jichanki. Jichaptikimi yawarman tikranqa”.
Moiséspa trokin Aarón parlananpä kanqan
10 Niptinmi Moisés nirqan: “¡Ay, Tayta Dios! Noqaqa parlaytapis manami shumaqqa yachätsu. Tsaynö kanqäqa manami kananllarätsu, sinöqa unaypita patsami. Tsaymi parlarpis shumaq tantiyatsiyta kamäpakütsu”.
11 Tsaynö niptinmi Tayta Dios nirqan: “¿Pitä runapa shiminta kamashqa? ¿Pitä kamakätsin upa kananpä, wiyaq kananpä, qapra kananpä y alli rikaq kananpä? ¿Manaku noqa kaykä? 12 Tsaynö kaykaptinqa Egiptuman ayway. Parlanaykipä kaptinqa qamwanmi kaykäshä. Imanö parlanaykipäpis noqami tantiyatsishayki”.
13 Moisésnami yapay nirqan: “¡Ay, Tayta Dios! Noqapa rantï jukta kachaykullay”.
14 Tsaynö niptinmi Tayta Dios rabyakurnin nirqan: “Mana valuraptikiqa Leví trïbu wawqiki Aarónmi yanapashunki. Shumaqmi runakunata tantiyatsin. Paymi tinkuyänaykipä shamunqa. Tinkuskiyaptikimi pasaypa kushikunqa. 15 Paytami tantiyatsinki imata parlananpä kaqtapis. Noqami alli parlayänaykipä paytapis qamtapis tantiyatsiyäshayki. Tsaynöllami tantiyatsiyäshayki imata rurayänaykipä kaqtapis. 16 Llapan parlapanqäkunatami Aarónta parlapanki. Qam ninqaykikunatanami Israel runakunata Aarón parlapanqa. 17 Tukruykita apanki. Tsaywanmi mantsakaypä kaqkunata ruranki”.
Egiptuman Moisés kutinqan
18 Tsaypitanami suegrun Jetrupa wayinman Moisés kutirqan. Chaykurmi nirqan: “Papä, Egiptucho castäkunata watukaqmi aywayta munä. ¿Kawaykäyanrätsurä o mananatsurä?”
Tsaymi suegrun Jetro nirqan: “Hïju, allimi kanqa. Aywar watukaskamuy”.
19 Madiánpita manarä aywaptinmi Moisésta Tayta Dios nirqan: “Egiptuman kutiy. Wanutsiyäshunaykipä yarpaqkunaqa llapannami wanuyashqa”.
20 Tsaymi Moisésqa warminta wamrankunata ashnuman muntarkatsir tukrunta apakurkur Egiptuman aywarqan. 21 Tsaypitanami Moisésta Tayta Dios nirqan: “Qamtami munaynïta qarashqä Egiptuman char Faraónpa ñöpancho mantsakaypä kaqkunata ruranaykipä. Tsaykunata llapanta ruranki. Noqami Faraónpa shonqunta chukruyätsishä Israel runakuna yarqayämunanta mana munananpä. 22 Tsaymi Faraónta ninki: ‘Tayta Diosmi nin: Israel runakunaqa mayor tsurïmi kaykan. 23 Tsurï adoramaq aywananpä nikaptïpis manami aywananta munankitsu. Tsaymi mayor kaq tsurikita wanutsishä’ ”.†
24 Egiptuman aywaykanqanchömi tardiyäpakur patsakuyarqan. Tsay paqasmi Tayta Dios yuripaykur Moisésta wanutsiyta munarqan. 25 Tsaymi qetsqa rumiwan wawanpa penqayninpa qaranta Séfora roqurqan. Tsay roqunqan qarata Moiséspa chakinman laqaykurmi nirqan: “Kananqa yawarwan señalashqa runämi kaykanki”.
26 Tsaynö ruraptinmi Moisésta Tayta Dios wanutsirqannatsu. Wawanpa penqayninpa punta qaranta roqunqanpitami Séfora nirqan: “Yawarwan señalashqa runämi kaykanki”.
27 Egiptucho Aarón kaykaptinmi Tayta Dios nirqan: “Moiséswan tinkunaykipä tsunyaq jirkaman ayway”.
Tsaymi Aarón aywar Moiséswan tinkurqan Tayta Dioswan tinkuna jirkacho†. Moiséswan tinkuskirmi winchikurnin mutsarqan. 28 Tsaychömi Aarónta Moisés willarqan Tayta Dios ninqankunata y mantsakaypä kaqkunata rurananpä kanqanta.
29 Egiptuman chaykurnami Moiséswan Aarón aywayarqan Israel mayor runakunata qoriyänanpä. 30 Paykuna qorikaskiyaptinmi Moisésta Tayta Dios ninqankunata Aarón willarqan. Tayta Dios ninqannöllami paykunapa ñöpancho mantsakaypä kaqkunata Moisés rurarqan. 31 Tsaymi llapan runakuna criyirnin niyarqan: “Imanö ñakar kawanqantsiktapis Tayta Diosqa rikamashqantsikmi”.
Tsaynö nirmi qonqurikuykur Tayta Diosta adorayarqan.