Canaánman yaykuyaptin Tayta Dios yanapananpä awninqan
9
Tsaypitami mastapis Moisés nirqan: “Israel runakuna, shumaq wiyayämay. Qamkunaqa Jordán mayuta tsimpar munayyuq runakuna täyanqan nacionmanmi yaykuyanki. Tsay runakunaqa qamkunapita mas atskaqmi kaykäyan. Markankunapis jatunmi y altuyaq murallashqami kaykan. 2 Musyayanqaykinöpis paykunaqa Anacpita aywaraq karmi jatusaq runakuna kaykäyan. Tsaymi paykunapä runakuna niyan: ‘¿Pirächi ichipunman Anacpita aywaraq jatusaq runakunataqa?’3 “Tsaynö kaptinpis Tayta Dios ñöpaykikunata aywarmi nina ushaqnöpis paykunata ushakätsinqa. Awninqannöllami yanapayäshunki paykunata vincir ras ushakätsiyänaykipä. 4 Tsaynö yanapayäshuptiki paqtä shonquykikunacho yarpar niyankiman: ‘Cäsukuq kanqantsikpitami Tayta Dios tsay runakunata ushakätsishqa’ nir. Manami cäsukuq kayanqaykipitatsu ushakätsinqa, tsaypa trokinqa tsay runakuna jutsata rurayanqanpitami. 5 Yapaymi qamkunata nï: Manami cäsukuq kayanqaykipitatsu tsay nacionta Tayta Dios rikatsiyäshunki, tsaypa trokinqa tsaycho taq runakuna jutsasapa kayanqanpitami. Tsaynö rikatsiyäshurnikimi unay castantsikkunata awninqanta cumplinqa. 6 Shumaq tantiyakuyay. Manami cäsukuq kayanqaykipitatsu Tayta Dios tsay alli nacionta rikaykätsiyäshunki, tsaypa trokinqa tsay runakuna jutsasapa kayanqanpitami. Qamkunapis mana wiyakuq runakunami kaykäyanki”.
Qoripita torïtuta rurayanqan
7 “Tayta Diosta tsunyaq jirkacho ajanätsiyaptiki castigayäshunqaykita imaypis ama qonqäyaytsu. Egiptupita yarqayämunqaykipita patsa kayman chäyämunqaykiyaqpis manami payta cäsukuyashqaykitsu. 8 Horeb jirkachöpis ajanätsiyanqaykipitami ushakätsiyäshunkiman karqan. 9 Jirkacho kanqäyaqmi tsaynö ajanätsiyarqayki.
“Tsay jirkamanmi witsarqä Tayta Dios qamkunawan pactu ruranqanta läja rumikunacho qellqaraykaqta chaskimunäpä. Tsaychömi karqä chusku chunka (40) junaq y chusku chunka paqas imatapis mana mikuypa y yakutapis mana upuypa.† 10 Tsay jirka chakincho kaykäyaptikimi nina lunyaykaqpita Tayta Dios parlamurqan. Llapan parlamunqankunatami ishkay läja rumikunaman dëdunwan qellqarkur tsay jirkacho aptatsimarqan. 11 Tsaycho aptatsimarqan chusku chunka junaq y chusku chunka paqas cumpliskiptinmi. Tsay ishkay läja rumikunachömi qamkunawan pactu ruranqan qellqaraykarqan. 12 Aptatsimarmi nimarqan: ‘Kay jirkapita ras kutiy. Egiptupita jipimunqayki Israel runakunami jutsata ruraykäyan. Paykunaqa manaräpis unayta qonqaskamarmi qoripita ïduluta ruraskir adoraykäyan’.
13 “Mastapis Tayta Dios nimarqanmi: ‘Rikashqämi Israel runakuna pasaypa mana wiyakuq kayanqanta. 14 Paykunapa janan ama shäriynatsu. Kananmi ushakätsishä jutinkunatapis qonqäyänanpä. Qamllapitanami mirayanqa jatun nación rikakuyanqanyaq. Qampita aywaraqkunaqa Israel runakunapitapis mas atskaqmi kayanqa’.
15 “Tsaynö nimaptinmi Tayta Dios ruranqan pactu ishkay läja rumikunacho qellqaraykaqta apakurkur lunyaykaq jirkapita urämurqä. 16 Qamkuna kaqman chämurmi tarirqä Tayta Diosnintsikta ajanätsir qoripita rurashqa torïtuta adoraykäyaqta. Tsaynö rurar qamkunaqa manaräpis unaytami pay ninqanta qonqaskiyarqayki. 17 Tsaymi ajanarnï tsay ishkay läja rumikunata ñöpaykikunacho ñuchuqpä saqtariykurqä.
18 “Tsaypitanami jirkaman yapay kutiykur Tayta Diospa ñöpanman lätakaykur llakishqa rugakurqä. Ñöpatanöllami chusku chunka junaq y chusku chunka paqas imatapis mana mikuypa ni yakutapis mana upuypa karqä. Tsaynö karqä payta ajanätsir jutsata rurayanqaykipitami. 19 Tayta Dios ajanar ushakätsiyäshunaykipä kanqanta yarparmi pasaypa mantsarirqä. Tsaynö kaptinpis rugakuptïmi ushakätsiyäshunaykipa trokin kuyapäyäshurqayki. 20 Tayta Dios pasaypa ajanarmi Aaróntapis wanutsiyta munarqan. Mana wanutsinanpä rugakuptïmi paytapis kuyaparqan. 21 Qoripita torïtuta rurayanqaykitapis ninamanmi qaykurqä. Nirkurmi ñuchu aqaskir Horeb jirkapita urämuq yakuman jitarirqä.
22 “Tsaynöllami Tayta Diosta ajanätsiyarqayki Taberacho,† Masahcho† y Kibrot-hataavachöpis.† 23 Cades-barneaman† chaykurpis Tayta Diosnintsik ninqanta† mana criyirmi cäsukuyarqaykitsu. Tsaymi yaykuyarqaykitsu rikatsiyäshunaykipä kaq nacionmanpis.† 24 Qamkunaqa reqinqä junaqpita patsami Tayta Diosta mana cäsukuq kaykäyanki. 25 Tsaymi mana ushakätsiyäshunaykipä rugakur chusku chunka junaq y chusku chunka paqas Tayta Diospa ñöpancho llakishqa lätararqä. 26 Rugakurmi nirqä: ‘Tayta Dios, herenciaykipä akranqayki runakunataqa ama ushakaykatsillaytsu. Munaynikiwanmi Egiptupita jipimurqayki. 27 Sirviyäshuqniki Abrahamta, Isaacta y Jacobta awninqaykita yarpar Israel runakuna jutsata rurayanqanpita perdonaykullay. 28 Mana perdonaptikiqa Egipto runakuna musyaskirmi niyanqa: “Awninqan nacionman chätsiyta Tayta Dios manami kamäpakushqatsu”.
“ ‘Tsaynöllami niyanqa: “Israel runakunapa contran karmi tsunyaq jirkaman apaykur ushakätsishqa”.
29 “ ‘Imanö karpis Israel runakunami kuyanqayki herenciayki kaykäyan. Kikikimi Egiptucho ñakaykaptin munaynikiwan jipimushqayki’ ”.