Israel runakunawan Tayta Dios pactuta yapay ruranqan
10
“Tsaypitanami Tayta Dios nimarqan: ‘Punta kaqtanölla ishkay läja rumikunata ruray. Tsaynöpis juk babulta qerupita ruray. Tsay läjakunata apakurkur noqa kaykanqä jirkaman witsämuy. 2 Noqanami pakinqayki rumicho qellqanqätanö tsay läja rumikunaman yapay qellqaskir babulman churanaykipä aptatsishayki’.3 “Tsaynö nimaptinmi acacia qerupita babulta ruraskir† ishkay läja rumikunata ñöpata ruranqätanö rurarqä. Tsay läjakunata apakurkurmi jirkaman witsarqä. 4 Tsaychömi ñöpata qellqanqannölla Tayta Dios yapay tsay läjakunaman chunka mandamientunkunata qellqarqan. Tsay mandamientukunami jirka chakincho qorikashqa kaykäyaptiki nina lunyaykaqpita parlamunqan mandamientukuna karqan. Tsaykunatami läjakunaman qellqaskir Tayta Dios entregamarqan. 5 Jirkapita kutiskamurnami Tayta Dios nimanqannölla tsay läjakunata ruranqä babulman churarqä. Tsaymi kananyaqpis babulcho churaraykan”.
6 Beerot-bene-jaacánpita aywakurmi Israel runakuna Moseraman chäyarqan. Tsaychömi Aarón wanuskiptin pampayarqan.† Tsaypitaqa tsurin Eleazarnami mandaq sacerdöti karqan.
7 Tsaypita aywakurnami Gudgoda partiman chäyarqan. Gudgodapita aywakurnami atska yaku kanqan Jotbata partiman chäyarqan. 8 Tsaychönami levitakunata† Tayta Dios akrarqan Pactu Babulta apayänanpä, paypa ñöpancho sirviyänanpä y paypa jutincho runakunata bendisayänanpä. Tsaypita patsami kananyaqpis paykunaqa tsaykunata rurayan. 9 Tsaynö rurayänanpä churanqanpitami wakin kaq trïbukunanöqa levitakuna chakrata chaskiyashqatsu. Chakrata chaskiyänanpa trokinqa kikin Tayta Diosmi paykunapa herencian kaykan. Tsaynö kananpämi Tayta Dios nirqan.
10 Mastapis Moisés nirqanmi: “Jirkacho ñöpata kanqänöllami yapaypis chusku chunka (40) junaq chusku chunka paqas karqä.† Tsaycho mañakuptïmi Tayta Dios kuyapäyäshurniki ushakätsiyäshurqaykitsu. 11 Tsaypa trokinmi nimarqan: ‘Shärir Israel runakunata pushay Abrahamta, Isaacta y Jacobta awninqä nacionman yaykuyänanpä’ ”.
Tayta Dios munanqannö kawayänanpä ninqan
12 Tsaypitami mastapis Moisés nirqan: “Israel runakuna, Tayta Dios imata munanqantapis kananmi willayäshayki. Payqa munan paypita mantsapakur munanqannö kawayänaykitami. Tsaynöllami munan llapan shonquykikunawan y voluntänikikunawan payta kuyar sirviyänaykita 13 y kanan junaq yachatsinqä mandamientunkunata y estatütunkunata imaypis cäsukuyänaykita. Tsaynöpami alli kawayanki.
14 “Ciëlupapis, kay patsapapis y llapan imaykapapis Tayta Diosmi duëñun. 15 Mayqan nación runakunata akrananpä munayyuq karmi unay castantsikkunata kuyar akrarqan. Tsaynöllami kuyanqan runakuna kayänaykipä qamkunatapis akrayäshurqayki. Kananpis kuyanqan runakunami kaykäyanki. 16 Tsaynö kuyaykäyäshuptikiqa shonquykikunata señalakura shumaq tantiyakuyay Tayta Dios ninqankunata cäsukuyänaykipä. Mana wiyakuqqa amana kayaytsu.†
17 “Tayta Diosnintsikqa ima dioskunapitapis y mandaqkunapitapis mas munayyuqmi kaykan.† Munayyuq karmi mantsaypä kaykan. Payqa pïmaytapis iwalmi rikan. Manami ni pipapis favornin kananpä chaskipakuntsu.† 18 Payqa waktsatapis viüdatapis kuyapanmi. Tsaynöllami qamkunacho taq jäpa runakunata kuyapar mikuytapis latsapatapis kamaripan. 19 Tsaynö kaykaptinqa qamkunapis jäpa runakunata kuyapäyanki. Ama qonqäyankitsu Egiptucho tar jäpa kayanqaykita.
20 “Tayta Diospita mantsapakur pay japallanta adorayanki. Pay munanqannölla imaypis kawayanki. Paypa jutillancho jurayanki. 21 Payllata alabayanki. Tayta Diosnintsik karmi llapan rikanqantsik milagrukunatapis rurashqa. 22 Unay castantsikkuna qanchis chunkalla (70) Egiptuman chäyaptinpis† Tayta Diosmi kamakätsirqan qoyllurkunanöpis yupayta mana atipaypä mirayänanpä”.†