Tayta Dios munayyuq kanqan
11
Tsaypitami mastapis Moisés nirqan: “Tayta Diosta kuyar yachatsikuyninkunata, estatütunkunata, leyninkunata y mandamientunkunata imaypis cumpliyay. 2 Kanan junaq yarpäyay Tayta Diosnintsik castigakuq y munayyuq kanqanta. Manami tsurikikunatsu tsayta rikayarqan, sinöqa kikikikunami. 3 Manami tsurikikunatsu rikayarqan Faraónta y Egiptucho taq runakunata Tayta Dios munayninwan castiganqanta, sinöqa kikikikunami.† 4 Tsaynöpis manami tsurikikunatsu rikayarqan Egipto soldädukunata, cawallunkunata y carrëtankunatapis Tayta Dios Puka Lamarcho ushakätsinqanta, sinöqa kikikikunami.† 5 Yarpäyay tsunyaq jirkapa päsayämuptiki kayman chäyämunqaykiyaq Tayta Dios imanö yanapashunqaykita. 6 Tsaynöpis yarpäyay runakuna rikaykaptin Rubén trïbu Eliabpa tsurinkuna Datánta y Abiramta Tayta Dios castiganqanta. Paykunata castigaptinmi patsata kichakaskatsir ultaskatsirqan llapan castankunata, toldunkunata y imaykankunatapis.† 7 Kikikikunami rikayarqayki munayninwan Tayta Dios tsaynö ruranqankunata.Tayta Diospita bendicionta chaskiyänanpä ninqan
8 “Tsaykunata rikashqa kaykarqa kanan willanqä llapan mandamientukunata cumpliyay. Llapanta cumpliyaptikiqa Canaánman yaykuyaptiki kallpaykikunapis kanqami tsaycho taq runakunata ushakätsiyänaykipä. 9 Tsaynöpis awkinyäyanqaykiyaqmi tsaycho kushishqa kawayanki. Tsaycho kawayänaykipämi Abrahamta, Isaacta y Jacobta Tayta Dios awnirqan. Tsaychöqa lichipis abëjapa mishkinpis yakunörämi atska kaykan.
10 “Täyänaykipä kaykaqchöqa chakra manami Egiptucho täyanqayki chakranötsu. Egiptuchöqa muruykurpis huertata qarpaqnömi qarpayarqayki. 11 Tsaynö kashqa karpis yaykuyänaykipä kaykaq partichöqa imaypis tamyaptinmi jallqakuna y raqrakuna kuyayllapä kaykan. 12 Tsay chakrakunataqa tamya tiempuchöpis usya tiempuchöpis kikin Tayta Diosmi mana qonqaypa rikaykan.
13 “Kanan junaq willanqä mandamientukunata cumplir Tayta Diosnintsikta kuyayaptiki y llapan shonquykikunawan y voluntänikiwan payta sirviyaptikiqa 14 punta tamyata y qepa tamyatapis tiempullanchömi tamyatsimunqa. Tsaymi trïgupis, vïnupis ni aceitipis pishïyäshunkitsu. 15 Qewakunapis entëru jallqakunacho lloqlluypa lloqllurrämi uywaykikunapä kanqa. Tsaynöllami mikuyänaykipäpis mikuy pishïyäshunkitsu.
16 “Tsaynö kaykaptinqa paqtä pipis engañayäshuptiki Tayta Diosta qonqaykur juk dioskunata adorayankiman. 17 Juk dioskunata adorayaptikiqa Tayta Dios pasaypa ajanar mana tamyatsimuptinmi murukuyanqaykikunapis wayunqatsu. Tayta Dios rikatsiyäshunqayki nacioncho tarpis llapaykimi wanuyanki.†
18 “Tsaymi llapan willanqä mandamientukunata shonquykikunacho imaypis yarparäyanki. Mana qonqäyänaykipä tsay mandamientukunata qellqaykur rikraykikunamanpis urkuykikunamanpis watakuyay. 19 Tsurikikunata mana qonqaypa yachatsiyanki wayikikunachöpis, nänikunachöpis, punukurpis y sharkurpis. 20 Tsaynölla qellqayanki wayi punkupa marcunkunaman y marka yaykuna punkukunamanpis.† 21 Tsaynöpami unay castantsikkunata Tayta Dios awninqan nacioncho qamkuna y tsurikikuna kay patsapis ciëlupis ushakanqanyaq atska wata kushishqa kawayanki.
22 “Kanan junaq willanqä mandamientukunata cumpliyaptiki, Tayta Diosnintsikta kuyayaptiki y pay munanqannö kawayaptikiqa 23 Tayta Diosmi yanapayäshunki Canaánman yaykur tsaycho taq runakunata ushakätsiyänaykipä. Tsaynö ushakätsiyanki qamkunapita mas atskaq y mas munayyuq kayaptinpis. 24 Tsaymi Canaáncho mayqan markaman yaykuyanqaykipis qamkunapäna kanqa. Lindëruykipis tsunyaq jirkapita Líbano nacionyaq y Éufrates mayupita Mediterráneo Lamaryaqmi kanqa. 25 Mayman chäyaptikipis Tayta Diosnintsik awninqannö yanapayäshuptikimi runakuna mantsayäshurniki ichipäyäshunkitsu.†
26 “Bendicionta o maldicionta karpis qamkuna kanan akrayay. 27 Tayta Diosnintsikpa mandamientunkunata kanan junaq willanqäta cäsukurqa bendiciontami chaskiyanki. 28 Tayta Diosnintsikta qonqaykur, mandamientunkunata mana cäsukur y imaypis mana adorayanqayki dioskunata adorarmi itsanqa maldicionashqa kayanki.
29 “Canaánman yaykuyänaykipä Tayta Dios yanapayäshuptikimi Gerizim jirkaman witsarkur jinchi niyämunki Tayta Diosta cäsukuyaptiki bendicionninta chaskiyänaykipä kanqanta. Tsaynölla Ebal jirkaman witsarkur jinchi niyämunki Tayta Diosta mana cäsukur maldicionashqa kayänaykipä kanqanta.† 30 Tsay ishkay jirkakunaqa Jordán mayu tsimpan rupay jeqanan kaqlächömi kaykan. Tsaynöllami tsay jirkakuna kaykäyan Gilgal marka tsimpancho y More encina jachakuna cercancho. Tsayqa Arabá pampacho taq cananeo runakuna täyanqanchömi kaykan.