Tsunyaq jirkacho Tayta Dios yanapanqanta yarpätsinqan
8
Tsaypitami mastapis Moisés nirqan: “Kanan willanqä mandamientukunata cumpliyanki. Cumplirqa Abrahamta, Isaacta y Jacobta Tayta Dios awninqan nacionman yaykurmi atskaman mirar alli kawayanki.2 “Chusku chunka (40) wata Tayta Dios pruebayäshurniki tsunyaq jirkapa puritsiyäshunqaykita ama qonqäyaytsu. Tsaynö pruebayäshurqayki shonquykikunacho imata yarpaykäyanqaykita musyananpä y mandamientunkunata cäsukuq o mana cäsukuq kayanqaykitapis musyananpämi.
3 “Pasaypa mallaqaywan ñakatsiyäshurnikipis manátami mikuyänaykipä kamaripäyäshurqayki. Tsay mikuytaqa manami unay castantsikkunapis ni qamkunapis reqiyarqaykitsu. Tsaynöpami Tayta Dios tantiyatsiyäshurqayki kaynö ninqanta: ‘Manami tantata mikullartsu runa kawan, sinöqa Tayta Dios llapan ninqankunata cäsukurmi’.†
4 “Chusku chunka watantin puriyaptikipis latsapaykikuna manami ushakarqantsu, ni chakikikunapis manami pushllarqantsu. 5 Shumaq tantiyakuyay. Tsurinta taytan corriginqannömi qamkunatapis Tayta Dios corrigiyäshunki.† 6 Tsaynö kaykaptinqa Tayta Diospa mandamientunkunata cumplir paypita mantsapakuyay.
7 “Tayta Diosmi pushaykäyäshunki raqrakunacho y jallqakunacho atska yakuyuq y atska pukyuyuq nacionman. 8 Tsaychöqa trïgupis, cebädapis, üvapis, hïguspis, granädapis, olïvupis pasaypami wayun. Tsaynöllami olïvupita rurashqa aceitipis y abëjapa mishkinpis atska kaykan. 9 Tsay nacioncho mikuy atska kaptinmi muchuypis kanqatsu. Qaqakunachöpis fiërrumi kaykan. Jirkakunapitami cobrita jipiyanki. 10 Awninqan nacionta rikatsiyäshunqaykicho pacha junta kawarmi Tayta Diosta imaypis alabayanki”.
Tayta Diosta mana qonqäyänanpä yätsinqan
11 Tsaypitami mastapis Moisés nirqan: “Tayta Diosta ama qonqäyankitsu. Kanan junaq willanqä mandamientunkunata, leyninkunata y estatütunkunata imaypis cumpliyanki. 12 Imaykaykikunapis mana pishiptin kushishqa kawar, alli wayicho täyaptiki, 13 wäkaykikuna, üshaykikuna y cabraykikuna atskaman miraptin y qoriki, qellayniki y imaykaykikunapis atska kaptin 14 Tayta Diosta ama qonqäyankitsu. Paymi Egiptucho wätay kayanqaykipita jipiyämushushqayki. 15 Tsaynöllami pushayämushurqayki pasaypa mantsaypä tsunyaq jirkapa. Tsaychömi wanutsikuq culebrakunapis alacrankunapis atska karqan. Upuyänaykipä yaku mana kaptinpis qaqapitami pashtatsimurqan. 16 Mikuyänaykipäpis manátami kamaripäyäshurqayki. Tsay mikuytaqa manami unay castantsikkunapis reqiyarqantsu. Ñakatsiyäshurnikimi pruebayäshurqayki tantiyakur alli kawayänaykipä.† 17 Tsaynö kaykaptinqa ama yarpäyankitsu imaykatapis kikikikunapa kallpaykikunawan tariyanqaykita. 18 Tsaypa trokinqa tantiyakuyanki llapan imaykata tariyänaykipä Tayta Dios yanapayäshunqaykita. Unay castantsikkunawan pactu ruranqanta cumplirmi tsaynö yanapayäshunki.