Números
Israel runakunata Sinaí jirkacho censayanqan
1
Israel runakuna Egiptupita yarqayämunqan juk wata y juk killa päsaskiptinmi Sinaí tsunyaq jirkacho kaykäyarqan. Tsay junaqmi Tinkuna Tolducho Moisésta Tayta Dios parlapar nirqan: 2 “Israel runakunapa jutinkuna ima kanqanta y aykaq kayanqantapis musyanaykipä ayllunpa ayllunpa castanpa castanpa censayay.† 3 Censarnin ishkay chunka (20) watayuqpita janaman jutinkunata apuntayay. Tsay runakunaqa guërraman aywayänanpä kallpankunachönami kaykäyan. Aarónmi censar yanapashunki. 4 Tsaynölla cada trïbupita juk mandaqta churanki censar yanapayäshunaykipä. 5 Paykuna kayanqa:Rubén trïbupita Sedeurpa tsurin Elisur,
6 Simeón trïbupita Zurisadaipa tsurin Selumiel,
7 Judá trïbupita Aminadabpa tsurin Naasón,
8 Isacar trïbupita Zuarpa tsurin Natanael,
9 Zabulón trïbupita Helónpa tsurin Eliab,
10 Efraín trïbupita Amiudpa tsurin Elisama,
Manasés trïbupita Pedasurpa tsurin Gamaliel (Efraínwan Manasésqa Josépa tsurinkunami kayarqan),
11 Benjamín trïbupita Gedeonipa tsurin Abidán,
12 Dan trïbupita Amisadaipa tsurin Ahiezer,
13 Aser trïbupita Ocránpa tsurin Pagiel,
14 Gad trïbupita Reuelpa tsurin Eliasaf,
15 y Neftalí trïbupita Enánpa tsurin Ahira”.
16 Tayta Dios ninqannöllami cada trïbupita tsay mandaq runakunata Moisés akrarqan censar yanapayänanpä. 17 Tsay akranqan runakunawan Moisés y Aarón qorikaskirmi 18 llapan Israel runakunata qayatsiyarqan. Tsay junaqmi ishkay kaq killa qallaykunan junaq karqan. Tsaychömi Israel runakunata ayllunpa ayllunpa castanpa castanpa censayarqan. Tsaynö censarmi ishkay chunka (20) watayuqpita janaman ollqu kaqkunapa jutinkunata apuntayarqan. 19 Tayta Dios ninqannöllami Sinaí tsunyaq jirkacho llapan ollqu kaqkunata Moisés censatsirqan.
20-21 Cada ünunpa jutinkunata apuntarmi ayllunpa ayllunpa castanpa castanpa censayarqan. Tsaynöpami musyayarqan ishkay chunka (20) watayuqpita janaman aykaq ollqukuna guërraman aywayänanpä kallpankunachöna kayanqanta.
Israelpa mayor tsurin Rubén trïbupitami chusku chunka soqta waranqa pitsqa pachak (46,500) ollqukuna kayarqan.
22-23 Simeón trïbupitami pitsqa chunka isqun waranqa kimsa pachak (59,300) kayarqan.
24-25 Gad trïbupitami chusku chunka pitsqa waranqa soqta pachak pitsqa chunka (45,650) kayarqan.
26-27 Judá trïbupitami qanchis chunka chusku waranqa soqta pachak (74,600) kayarqan.
28-29 Isacar trïbupitami pitsqa chunka chusku waranqa chusku pachak (54,400) kayarqan.
30-31 Zabulón trïbupitami pitsqa chunka qanchis waranqa chusku pachak (57,400) kayarqan.
32-33 Josépa tsurin Efraín trïbupitami chusku chunka waranqa pitsqa pachak (40,500) kayarqan.
34-35 Josépa tsurin Manasés trïbupitami kimsa chunka ishkay waranqa ishkay pachak (32,200) kayarqan.
36-37 Benjamín trïbupitami kimsa chunka pitsqa waranqa chusku pachak (35,400) kayarqan.
38-39 Dan trïbupitami soqta chunka ishkay waranqa qanchis pachak (62,700) kayarqan.
40-41 Aser trïbupitami chusku chunka juk waranqa pitsqa pachak (41,500) kayarqan.
42-43 Neftalí trïbupitami pitsqa chunka kimsa waranqa chusku pachak (53,400) kayarqan.
44 Paykunatami Moiséswan Aarón y chunka ishkay mandaq Israel runakuna censayarqan. Tsay mandaq runakunami cada trïbupita juk kayarqan. 45 Paykunami censayarqan ishkay chunka (20) watayuqpita janaman. Censayanqan runakunami guërraman aywayänanpänö kallpankunachöna kayarqan. 46 Castanpa castanpa censayanqan runakunami soqta pachak kimsa waranqa pitsqa pachak pitsqa chunka (603,550) kayarqan.
Levitakunata mana censayanqan
47 Israel runakunata censar levitakunataqa manami censayarqantsu. 48 Mana censayänanpämi Moisésta Tayta Dios nirqan: 49 “Israel runakunata censar levitakunataqa ama censankitsu. 50 Paykunataqa churanki Pactu Tolduta y tsaycho manëjukunata shumaq rikayänanpä. Maypa aywayaptikipis Sagrädu Toldutawan llapan manëjunkunata paykunallami apayanqa. Tsaynöllami Sagrädu Toldu ñöpanpa jiruruypa toldunkuna shäritsiyanqa. 51 Maypa aywayaptikipis paykunallami Sagrädu Tolduta paskaskir apayanqa. Mayman chäyaptikipis Sagrädu Tolduta paykunallami shäritsiyanqa. Mayqanpis levita mana kaykar Sagrädu Tolduman witirqa wanunqami. 52 Wakin trïbu Israel runakunaqa bandërankuna kaqchömi toldunkuna shäritsiyanqa. 53 Levitakunaqa Pactu Toldupa ñöpankunapami jiruruypa toldunkuna shäritsiyanqa. Tsaynöpami täpayanqa pipis llutalla mana yaykunanpä. Llutalla yaykuyaptinqa rabyanarmi Israel runakunata castigashä”.
54 Moisésta Tayta Dios ninqannöllami Israel runakuna llapanta rurayarqan.