3 “Rupay yarqamunanläpa bandërata ichïtsiyanqan kaqchömi Judá trïbu kaqkuna tröpanpa tröpanpa toldunkuna shäritsiyanqa. Paykunapa mandaqninmi Aminadabpa tsurin Naasón kaykan. 4 Tsay trïbu runakunata censar yupayaptinmi qanchis chunka chusku waranqa soqta pachak (74,600) kayarqan.

5 “Paykunapa ñöpanpanami Isacar trïbu kaqkuna toldunkuna shäritsiyanqa. Paykunapa mandaqninmi Zuarpa tsurin Natanael kaykan. 6 Tsay trïbu runakunata censar yupayaptinmi pitsqa chunka chusku waranqa chusku pachak (54,400) kayarqan.

7 “Paykunapa ñöpanpanami Zabulón trïbu runakunapis toldunkuna shäritsiyanqa. Paykunapa mandaqninmi Helónpa tsurin Eliab kaykan. 8 Tsay trïbu runakunata censar yupayaptinmi pitsqa chunka qanchis waranqa chusku pachak (57,400) kayarqan.

9 “Tsaynöpami Judá trïbu kaqlächo kimsa trïbukuna kayanqa. Tsay trïbu runakunami juk pachak puwaq chunka soqta waranqa chusku pachak (186,400) kaykäyan. Israel runakuna maypapis aywayaptin paykunami puntallankunata aywayanqa.

10 “Sur kaqläpa bandërata ichïtsiyanqan kaqchömi Rubén trïbu kaqkuna tröpanpa tröpanpa toldunkuna shäritsiyanqa. Paykunapa mandaqninmi Sedeurpa tsurin Elisur kaykan. 11 Tsay trïbu runakunata censar yupayaptinmi chusku chunka soqta waranqa pitsqa pachak (46,500) kayarqan.

12 “Paykunapa ñöpanpanami Simeón trïbu kaqkuna toldunkuna shäritsiyanqa. Paykunapa mandaqninmi Zurisadaipa tsurin Selumiel kaykan. 13 Tsay trïbu runakunata censar yupayaptinmi pitsqa chunka isqun waranqa kimsa pachak (59,300) kayarqan.

14 “Paykunapa ñöpanpanami Gad trïbu runakunapis toldunkuna shäritsiyanqa. Paykunapa mandaqninmi Reuelpa tsurin Eliasaf kaykan. 15 Tsay trïbu runakunata censar yupayaptinmi chusku chunka pitsqa waranqa soqta pachak pitsqa chunka (45,650) kayarqan.

16 “Tsaynöpami Rubén trïbu kaqlächo kimsa trïbukuna kayanqa. Tsay trïbu runakunami juk pachak pitsqa chunka juk waranqa chusku pachak pitsqa chunka (151,450) kaykäyan. Israel runakuna maypapis aywayaptin paykunami kimsa trïbukunapa qepanta aywayanqa.

17 “Paykunapa qepantanami levitakunapis Tinkunantsik Tolduta apakurkur aywayanqa. Tsaynöpami levitakunapa ñöpanta aywayanqa soqta trïbukuna y soqta kaq trïbukunanami qepanta aywayanqa. Llapan trïbukuna patsakuyänanpä churanakuyanqannöllami bandëran aptashqa aywayanqa.

18 “Rupay jeqananläpami bandëran ichïtsiyanqan kaqcho Efraín trïbu kaqkuna tröpanpa tröpanpa toldunkuna shäritsiyanqa. Paykunapa mandaqninmi Amiudpa tsurin Elisama kaykan. 19 Tsay trïbu runakunata censar yupayaptinmi chusku chunka waranqa pitsqa pachak (40,500) kayarqan.

20 “Paykunapa ñöpanpanami Manasés trïbu kaqkuna toldunkuna shäritsiyanqa. Paykunapa mandaqninmi Pedasurpa tsurin Gamaliel kaykan. 21 Tsay trïbu runakunata censar yupayaptinmi kimsa chunka ishkay waranqa ishkay pachak (32,200) kayarqan.

22 “Paykunapa ñöpanpanami Benjamín trïbu kaqkunapis toldunkuna shäritsiyanqa. Paykunapa mandaqninmi Gedeonipa tsurin Abidán kaykan. 23 Tsay trïbu runakunata censar yupayaptinmi kimsa chunka pitsqa waranqa chusku pachak (35,400) kayarqan.

24 “Tsaynöpami Efraín trïbu kaqlächo kimsa trïbukuna kayanqa. Tsay trïbu runakunami juk pachak puwaq waranqa juk pachak (108,100) kaykäyan. Israel runakuna maypapis aywayaptin paykunami soqta trïbukunapa qepanta aywayanqa.

25 “Norti kaqläpami bandëran ichïtsiyanqan kaqcho Dan trïbu kaqkuna tröpanpa tröpanpa toldunkuna shäritsiyanqa. Paykunapa mandaqninmi Amisadaipa tsurin Ahiezer kaykan. 26 Tsay trïbu runakunata censar yupayaptinmi soqta chunka ishkay waranqa qanchis pachak (62,700) kayarqan.

27 “Paykunapa ñöpanpanami Aser trïbu kaqkuna toldunkuna shäritsiyanqa. Paykunapa mandaqninmi Ocránpa tsurin Pagiel kaykan. 28 Tsay trïbu runakunata censar yupayaptinmi chusku chunka juk waranqa pitsqa pachak (41,500) kayarqan.

29 “Paykunapa ñöpanpanami Neftalí trïbu kaqkunapis toldunkuna shäritsiyanqa. Paykunapa mandaqninmi Enánpa tsurin Ahira kaykan. 30 Tsay trïbu runakunata censar yupayaptinmi pitsqa chunka kimsa waranqa chusku pachak (53,400) kayarqan.

31 “Tsaynöpami Dan trïbu kaqlächo kimsa trïbukuna kayanqa. Tsay trïbu runakunami juk pachak pitsqa chunka qanchis waranqa soqta pachak (157,600) kaykäyan. Israel runakuna maypapis aywayaptin paykunami wakin trïbukunapa qepanta bandëran aptashqa aywayanqa”.

32 Israel runakunata castanpa castanpa censayaptinmi soqta pachak kimsa waranqa pitsqa pachak pitsqa chunka (603,550) kayarqan. 33 Moisésta Tayta Dios ninqannöllami levitakunataqa censayarqantsu.

34 Moisésta Tayta Dios ninqannöllami Israel runakuna llapanta rurayarqan. Tsaymi bandëran ichïtsiyanqan kaqcho ayllunpa ayllunpa castanpa castanpa patsakur patsakur aywayarqan.