Levitakunata tantiyatsinqan
3
Sinaí jirkacho Moisésta Tayta Dios parlapanqan witsanmi Moiséspa y Aarónpa tsurinkuna kayarqanna. 2 Aarónpa tsurinkunami kayarqan Nadab, Abiú, Eleazar y Itamar.† Nadabqa mayor tsurinmi karqan. 3 Paykunatami sacerdöti kayänanpä Moisés churarqan. 4 Sinaí tsunyaq jirkacho yarpayllankunapita inciensiuwan qoshnitsiyanqanpitami Tayta Diospa ñöpancho Nadabwan Abiú wanuyarqan.† Tsuriynaqlla wanushqa kayaptinmi Eleazarwan Itamarna taytan Aarón yätsinqannö sacerdöti kayarqan.5 Tsaypitanami Moisésta Tayta Dios nirqan: 6 “Levitakunata qayaykatsir willay Aarónta imaypis yanapayänanpä. 7 Paykunami Aarónta y Israel mayinkunata yanapar Tinkunantsik Tolducho imapis ruraypä kaqkunata rurayanqa. 8 Tsaynöllami Tolducho llapan manëjukunatapis rikayanqa. Paykunami Israel mayinkunapa trokin Tinkunantsik Sagrädu Tolducho imapis ruraypä kaqkunata rurayanqa. 9 Tsaynö kaptinqa levitakunata churay Aarónpa y paypita aywaraqkunapa makincho kar imaypis yanapayänanpä. 10 Aarón y paypita aywaraqkunallami sacerdöti kayanqa. Pipis sacerdöti mana kaykar sacerdöti rurananpä kaqkunata rurarqa wanunqami”.
Levitakunata Tayta Dios akranqan
11 Tsaypitanami Moisésta Tayta Dios nirqan: 12-13 “Egiptucho llapan runakunapa mayor tsurinkunata wanutsirmi nirqä Israel runakunapa mayor tsurinkuna y uywankunapa punta yuriq wawankunapis noqapa kayänanpä.† Israel runakunapa mayor ollqu tsurinkunapa trokinmi levitakunatana akrashqä noqapa kayänanpä. Tsaymi paykunaqa noqapana kaykäyan. Noqaqa Tayta Diosmi kaykä”.
Levitakunata censayanqan
14 Sinaí tsunyaq jirkachömi Moisésta Tayta Dios nirqan: 15 “Leví trïbuta ayllunpa ayllunpa castanpa castanpa ollqu kaqkunata juk killayuqpita janaman censanki”.
16 Tayta Dios ninqannöllami Moisés censarqan.
17 Levípa tsurinkunami kayarqan Gersón, Coat y Merari.
18 Gersónpa tsurinkunami kayarqan Libniwan Simei. Paykunapita aywaraqkunami kaykäyan Libni ayllu y Simei ayllu runakuna.
19 Coatpa tsurinkunami kayarqan Amram, Izhar, Hebrón y Uziel. Paykunapita aywaraqkunami kaykäyan Amram ayllu, Izhar ayllu, Hebrón ayllu y Uziel ayllu runakuna.
20 Meraripa tsurinkunami kayarqan Mahliwan Musi. Paykunapita aywaraqkunami kaykäyan Mahli ayllu y Musi ayllu runakuna. Tsaynömi levitakunapa castankuna mayorpita qepayaq kaykäyan.
21 Gersónpita aywaraqkunami kaykäyan Libni ayllu y Simei ayllu runakuna. 22 Juk killayuqpita janaman llapan ollqukunata yupaptinmi tsay ishkay ayllu runakuna qanchis waranqa pitsqa pachak (7,500) kayarqan. 23 Gersónpita aywaraqkunami Sagrädu Toldupita rupay jeqananläpa toldunkunata shäritsiyarqan. 24 Paykunapa mandaqninmi karqan Laelpa tsurin Eliasaf. 25 Tsay ishkay ayllu runakunami Tinkuna Tolduta, qataraq toldukunata y yaykuna cortïnatapis cuidayaq. 26 Tsaynöllami cuidayaq patiupa cortïnankunata, patiuman yaykuna cortïnata y watunkunatapis. Tsay patiumi Tinkuna Sagrädu Toldupa y altarpa entëru waqtankunapa karqan.
27 Coatpita aywaraqkunami kaykäyan Amram ayllu, Izhar ayllu, Hebrón ayllu y Uziel ayllu runakuna. 28 Juk killayuqpita janaman llapan ollqukunata yupaptinmi tsay chusku ayllu runakuna puwaq waranqa kimsa pachak (8,300) kayarqan. Paykunami Tinkuna Sagrädu Toldu rurincho kaqkunata cuidayaq. 29 Coatpita aywaraqkunami Sagrädu Toldupita sur kaqläpa toldunkunata shäritsiyarqan. 30 Paykunapa mandaqninmi karqan Uzielpa tsurin Elizafán. 31 Tsay chusku ayllu runakunami cuidayaq Pactu Babulta, mësata, candelabruta, altarkunata, Tinkuna Sagrädu Toldu ruricho cortïnata y sagrädu manëjunkunatapis.
32 Levitakunapa mandaqninmi karqan sacerdöti Aarónpa tsurin Eleazar. Tsaymi Tinkuna Sagrädu Tolduta cuidayänanpä levitakunata mandarqan.
33 Meraripita aywaraqkunami kaykäyan Mahli ayllu y Musi ayllu runakuna. 34 Juk killayuqpita janaman llapan ollqukunata yupayaptinmi tsay ishkay ayllu runakuna soqta waranqa ishkay pachak (6,200) kayarqan. 35 Meraripita aywaraqkunapa mandaqninmi karqan Abihailpa tsurin Zuriel. Paykunami Sagrädu Toldupita norti kaqläpa toldunkunata shäritsiyarqan. 36 Tsay ishkay ayllu runakunami cuidayaq Sagrädu Toldupa marcunkunata, travisninkunata, jorcunninkunata, jawiräkuyänankunata y llapan manëjunkunatapis. 37 Tsaynöllami cuidayaq Tinkuna Sagrädu Toldupa patiunpa jiruruypa jorcunkunata, estäcankunata y watunkunatapis.
38 Tinkuna Toldupita rupay yarqamunan kaqläpanami Moiséswan Aarón toldunkunata shäritsiyarqan. Tsaynöllami paykunapa ñöpancho Aarónpa tsurinkunapis toldunkunata shäritsiyarqan. Paykunami kayarqan Israel mayinkunapa trokin Sagrädu Tolduta cuidayänanpä. Pipis sacerdöti mana kaykar sacerdöti rurananpä kaqkunata rurarqa wanunqami.
39 Tayta Dios ninqannölla Moiséswan Aarón levitakunata castanpa castanpa juk killayuqpita janaman censayaptinmi ishkay chunka ishkay waranqa (22,000) ollqukuna kayarqan.
Israel runakuna wakin mayor tsurinkunapita pägayanqan
40 Moiséstami Tayta Dios nirqan: “Juk killayuqpita janaman Israel runakunapa mayor tsurinkunata censay. 41 Israel runakunapa mayor tsurinkunapa trokin levitakunami noqapä kaykäyan. Tsaynöllami Israel runakunapa uywankunapa punta yuriq wawankunapa trokin levitakunapa uywankuna noqapä kaykäyan. Noqaqa Tayta Diosmi kaykä”.
42 Tayta Dios ninqannöllami Israel runakunapa mayor tsurinkunata Moisés censarqan. 43 Juk killayuqpita janaman ollqu kaqkunata censaptinmi ishkay chunka ishkay waranqa ishkay pachak qanchis chunka kimsa (22,273) mayor kaqkuna kayarqan.
44 Tsaymi Moisésta Tayta Dios nirqan: 45 “Israel runakunapa mayor ollqu tsurinkunapa trokinmi levitakuna noqapa kayan. Tsaynöllami Israel runakunapa punta yuriq uywankunapa trokin levitakunapa uywankuna noqapa kaykäyan. Noqaqa Tayta Diosmi kaykä. 46 Levitakunapitaqa Israel runakunapa mayor tsurinkuna ishkay pachak qanchis chunka kimsa (273) masmi kayan. Tsay sobraq runakunapa trokin 47 pägashunaykipä mañanki cada ünunpita pitsqa siclo qellaytaa. Juk siclo qellayqa Tinkuna Sagrädu Tolducho kaykaq pësakunawan pësaptinmi chunka juk grämu qellay kanqa. 48 Tsay qellayta Aarónta y tsurinkunata entreganki”.
49 Tsaynö niptinmi Israel runakunapa mayor tsurinkunapita pägayanqanta ishkay pachak qanchis chunka kimsa (273) qellayta Moisés qorirqan. 50 Tsaynö qorirqan juk waranqa kimsa pachak soqta chunka pitsqa (1,365) siclo qellaykunata. Tsay siclukunatami pësarqan Tinkuna Sagrädu Tolducho qellay pësakunawan. 51 Tayta Dios ninqannöllami Aarónta y tsurinkunata tsay qellayta Moisés entregarqan.