5 “Patsakuyanqanpita Israel runakuna aywakuyänanpämi Aarónwan tsurinkuna Pactu Babulta wankuyanqa. Tsaynö wankuyanqa Lugar Santupita Lugar Santïsimuta rakiq cortïnawanmi. 6 Tsay jananmanmi fïnu qarapita rurashqa tolduwan pituyanqa. Tsay toldu jananmannami juk piëzalla awashqa azul tëlawan pituyanqa. Nirkurnami ishkay largu qerukunata churayanqa puritsiyänanpä.

7 “Tsaynölla tanta churakuna mësapita tantata jipiskir azul tëlawan wankuyanqa. Tsay tëla jananmanmi churayanqa plätukunata, wishllakunata y altarman vïnuta jichananpä kaq cöpakunatapis järrakunatapis. Tsaynöllami jipinqan tantatapis tëla jananman churayanqa. 8 Llapanta churaykurmi puka tëlawan pituyanqa. Tsay jananpa fïnu qarapita rurashqa tolduwan pituykurmi ishkay largu qerukunata churayanqa apayänanpä.

9 “Tsaynöllami mechëruntinta candelabruta, alicätinkunata, platïllukunata, aceiti wiñakuyänan väsunkunatapis azul tëlawan wankuyanqa. 10 Tsaykunatami fïnu qarapita rurashqa tolduwan piturkur kirma jananman churayanqa apayänanpä.

11 “Tsaynöllami qoripita rurashqa altartapis azul tëlawan wankuyanqa. Tsay jananpami fïnu qarapita rurashqa tolduwan piturkur ishkay largu qerukunata churayanqa apayänanpä.

12 “Nirkurnami Tinkunantsik Sagrädu Tolducho manëjukunatapis azul tëlakunawan wankuyanqa. Tsaynöllami fïnu qarapita rurashqa tolduwan piturkur kirma jananman churayanqa apayänanpä.

13 “Sacrificiu rupatsina altarpita uchpata limpiaskirmi granäti tëlawan altarta wankuyanqa. 14 Tsay tëla jananmannami churayanqa tenäzakunata, trinchikunata, kanallakunata, tazonkunata y altarcho llapan manëjukunatapis. Nirkurnami fïnu qarapita rurashqa tolduwan piturkur ishkay largu qerukunata churayanqa apayänanpä.

15 “Aarónwan tsurinkuna llapan tsay sagrädu kaqkunata pituyta ushaskiyaptinnami Coatpita aywaraqkuna shayämunqa apayänanpä. Manarä pituptinqa manami yatayllapis yatayanmantsu. Tsaykunata yatarqa wanuyanqami. Tsaynöpami Tinkuna Tolducho kaqkunata Coatpita aywaraqkuna apayanqa.

16 “Aarónpa tsurin Eleazarmi apanqa candelabru tsarinanpä aceitita, mushkuq inciensiuta, altarcho rupatsinanpä apayämunqan tsaki mikuykunata y sagrädu aceititapis. Paymi kanqa Sagrädu Tolduta y tsaycho kaykaq llapan manëjukunata rikananpä”.

17 Moiséstawan Aaróntami Tayta Dios nirqan: 18 “Paqtä levitakunacho Coat castapita aywaraqkuna ushakäyanman. 19 Sagrädu manëjukunata yatar mana wanuyänanpä Aarón y tsurinkuna Coat casta runakunata tantiyatsiyanqa imata rurayänanpä y imata apayänanpäpis. 20 Tsay sagrädu manëjukunata manarä pituyaptin Tinkunantsik Tolduman ama yaykuyätsunrätsu. Tsay manëjukunata rikarqa wanuyanqami”.

21 Tsaypitanami Moisésta Tayta Dios nirqan: 22 “Tsaynölla Gersónpita aywaraq levitakunata ayllunpa ayllunpa castanpa castanpa censayay. 23 Paykunata censayanki kimsa chunka (30) watayuqpita pitsqa chunka (50) watayuqyaq. Tsay edä runakunami Tinkunantsik Tolducho imatapis ruraypä kaqkunata rurayanqa.

24 “Gersónpita aywaraq levitakunami apayanqa 25 Tinkunantsik Sagrädu Toldupa cortïnankunata, Tinkunantsik Tolduta, qataraq toldunkunata, tsay jananman qataraq fïnu qarapita rurashqa tolduta, Tinkunantsik Toldupa punkun tsaparaq cortïnata, 26 patiutawan altarta jiruruypa tsaparaq cortïnakunata watuntinta, waqtapita patiuman yaykuna cortïnata y wakin manëjunkunatapis. 27 Aarónwan tsurinkunami niyanqa Gersón runakuna imata rurayänanpä y imata apayänanpäpis. 28 Tsay manëjukunatami Gersónpita aywaraqkuna apayanqa. Llapantami rurayanqa sacerdöti Aarónpa tsurin Itamar ninqannölla.

29 “Tsaynölla Meraripita aywaraq runakunata ayllunpa ayllunpa castanpa castanpa censayay. 30 Paykunata censayanki kimsa chunka (30) watayuqpita pitsqa chunka (50) watayuqyaq. Tsay edä runakunami Tinkunantsik Tolducho imapis ruraypä kaqkunata rurayanqa. 31 Paykunami apayanqa Tinkunantsik Sagrädu Toldupa marcunkunata, travisninkunata, jorcunninkunata, jawiräkunanta, 32 Tinkunantsik Sagrädu Toldupa patiunpa jorcunninkunata, jorcunpa jawiräkunanta, estäcankunata, watunkunata y llapan manëjunkunatapis. Qammi willanki cada ünü imata apayänanpä kanqantapis. 33 Tsay manëjukunatami Meraripita aywaraqkuna apayanqa. Tinkunantsik Tolducho sirvimarmi llapanta rurayanqa sacerdöti Aarónpa tsurin Itamar ninqannölla”.

34 Tayta Dios tsaynö niptinmi Moiséswan Aarón y mayor runakuna Coatpita aywaraqkunata ayllunpa ayllunpa castanpa castanpa censayarqan. 35 Tsaynömi censayarqan kimsa chunka (30) watayuqpita pitsqa chunka (50) watayuqyaq. Tsay edä runakunami Tinkuna Tolducho imapis ruraypä kaqkunata rurayarqan. 36 Coatpita aywaraqkunata censayaptinmi ishkay waranqa qanchis pachak pitsqa chunka (2,750) runakuna kayarqan. 37 Paykunami Tinkuna Tolducho ima ruraykunatapis rurayarqan. Moisésta Tayta Dios ninqannöllami paykunata Moiséswan Aarón censayarqan.

38 Gersónpita aywaraqkunatapis ayllunpa ayllunpa castanpa castanpami censayarqan. 39 Tsaynömi censayarqan kimsa chunka (30) watayuqpita pitsqa chunka (50) watayuqyaq. Tsay edä runakunami Tinkuna Tolducho imapis ruraypä kaqkunata rurayanqa. 40 Gersónpita aywaraqkunata censayaptinmi ishkay waranqa soqta pachak kimsa chunka (2,630) runakuna kayarqan. 41 Paykunami Tinkuna Tolducho ima ruraykunatapis rurayarqan. Tayta Dios ninqannöllami Moiséswan Aarón paykunata censayarqan.

42 Meraripita aywaraqkunatapis ayllunpa ayllunpa castanpa castanpami censayarqan. 43 Tsaynömi censayarqan kimsa chunka (30) watayuqpita pitsqa chunka (50) watayuqyaq. Tsay edä runakunami Tinkuna Tolducho imapis ruraypä kaqkunata rurayarqan. 44 Meraripita aywaraqkunata censayaptinmi kimsa waranqa ishkay pachak (3,200) runakuna kayarqan. 45 Paykunami Tinkuna Tolducho imapis ruraypä kaqkunata rurayarqan. Tayta Dios ninqannöllami Moiséswan Aarón paykunata censayarqan.

46 Levitakunata ayllunpa ayllunpa castanpa castanpa censarninmi Moiséswan Aarón y Israel runakunapa mandaqninkuna 47 kimsa chunka (30) watayuqpita pitsqa chunka (50) watayuqyaq censayarqan. Tsay edä runakunami Tinkuna Tolducho imapis ruraypä kaqkunata rurayarqan. 48 Llapanta censayaptinmi puwaq waranqa pitsqa pachak puwaq chunka (8,580) runakuna kayarqan. 49 Moisésta Tayta Dios ninqannöllami cada ünun imata apayänanpä kanqantapis niyarqan.

Moisésta Tayta Dios ninqannöllami levitakuna censashqa kayarqan.