Impüru runakunata qarquyänanpä tantiyatsinqan
5
Moiséstami Tayta Dios nirqan: 2 “Israel runakunata niy leprawan qeshyaqkunata, purgacionwan qeshyaqkunata y aya yatashqakunatapis campamentupita qarquyänanpä. 3 Campamentu impüru mana kananpä warmi o ollqu kaptinpis qarquyanki. Campamentuchöqa qamkunawanmi taykä”.4 Moisésta Tayta Dios ninqannöllami impüru kaqkunata campamentupita Israel runakuna qarquyarqan.
Perjuiciuta ruranqanpita pägananpä tantiyatsinqan
5 Moiséstami Tayta Dios nirqan: 6 “Israel runakunata niy: ‘Warmipis ollqupis Tayta Diosta mana cäsukur runa mayinta perjuiciuta rurarqa jutsatami ruraykan. 7 Tsaymi jutsanta reconöcir runa mayinta perjuiciuta ruranqanpita päganqa. Tsay jananmannami quinta parti masta päganqa. 8 Perjuiciuta ruranqan runa wanushqana kaptin y castankuna manana kaptinqa pägananpä kaqta sacerdötita entregatsun. Tsay päganqan Tayta Diospäna kaptinmi sacerdötipäna kanqa. Tsaynölla entregatsun juk carnëruta altarcho rupatsiptin perdonashqa kananpä.†
9 “ ‘Sagrädu ofrendakunata Israel runakuna Tayta Diospä apayanqankunami sacerdötipä kanqa. 10 Llapan chaskinqankunapis kikin sacerdötipämi kanqa’ ”.
Celösu runa imata rurananpä tantiyatsinqan
11 Moiséstami Tayta Dios nirqan: 12 “Israel runakunata niy: ‘Capazchi cäsu kanman pï warmipis runanta engañanqan. 13 Runanta tsaynö engañanqanta pipis mana tariykaptin 14 runan cëlarqa 15 warminta sacerdötiman pushatsun. Tsaynöllami tsaki mikuy ofrendapä ishkay kïlu cebäda jarinata apanqa. Tsay ofrendamanqa ama wiñatsuntsu aceitita ni inciensiuta. Tsay ofrendami kanqa warmin engañanqanta o mana engañanqanta musyananpä.
16 “ ‘Sacerdötinami tsay warmita Tayta Diospa ñöpanmana pushanqa. 17 Nirkurnami sagrädu yakuta mitu cöpaman wiñarkur tsay yakuman Sagrädu Tolducho kaykaq allpata qoriskir wiñanqa. 18 Tsay warmita Tayta Diospa ñöpanman pushaykurmi pilltashqa aqtsanta paskatsinqa. Tsaychömi celösu kanqanpita runan apamunqan ofrendata sacerdöti aptatsinqa. Tsaypitanami cöpacho iwjiq yakuta aptaranqa tsay warmi jutsayuq kar maldicionashqa kananpä. 19 Nirkurmi tsay warmita juratsir ninqa: “Pï runawanpis runaykita mana engañashqa kaptikiqa kay iwjiq yakuta upuptiki manami maldición päsashunkitsu. 20 Runaykita engañar jukwan kakushqa kaptikiqa 21 llapan runakuna rikashunaykipämi Tayta Dios maldicionashunki. Tsaymi mädriki jakaptin shulluylla shullunki. 22 Tsay maldición päsashunki kay iwjiq yakuta upuptikimi”.
“ ‘Sacerdöti tsaynö niptinmi tsay warmi ishkay kuti ninqa: “Ninqaykinö katsun”.
23 “ ‘Tsaypitanami maldición päsananpä ninqanta sacerdöti qellqanqa. Nirkurmi qellqanqanta mayllaskir tsay yakuta wiñanqa cöpacho kaykaq iwjiq yakuman. 24 Warmitami tsay iwjiq yakuta sacerdöti makyanqa. Jutsayuq karqa tsay yakuta upuskirmi pasaypa ñakanqa. 25 Yakuta chaskiskirmi qowan celösu kar apamunqan tsaki mikuy ofrendata sacerdötita entreganqa. Tsaytami Tayta Diospa ñöpancho joqarkur wakman kayman kuyuskatsir altarman sacerdöti churanqa. 26 Tayta Dios imaypis yarparänanpämi tsay ofrendapita juk aptayta jipiskir altarcho rupatsinqa. Nirkurnami iwjiq yakuta warmita uputsinqa. 27 Runanta engañashqa karqa tsay yakuta upuskirmi pasaypa ñakanqa. Tsaymi mädrin jakaptin shulluylla shullunqa. Tsaynö ñakanqa llapan runakuna rikayänanpämi. 28 Runanta mana engañashqa kaptinmi itsanqa imapis päsanqatsu y qeshyaq karpis shullunqatsu.
29 “ ‘Tsaynö rurayanki warmin engañanqanta runan maliciaptin 30 jutsayuq o mana jutsayuq kanqanta musyananpä. Tsay warmitami Tayta Diospa ñöpanman sacerdöti pushanqa Tayta Dios ninqankunata llapanta rurananpä. 31 Tsaynö ruraptinqa runan manami jutsayuqtsu kanqa. Warminmi itsanqa jutsata ruranqanpita shulluylla shullunqa’ ”.