Nazareo kar imanö kawananpä tantiyatsinqan
6
Moiséstami Tayta Dios nirqan: 2 “Israel runakunata niy: ‘Mayqan runapis o mayqan warmipis nazareo kananpä Tayta Diosta awnirqa 3 manami vïnuta ni ima machätsikuqtapis upunmantsu. Manami upunmantsu üvapita rurashqa vinagrita ni üvapa yakuntapis. Manami üvata ni päsastapis mikunmantsu.† 4 Nazareo kananpä awninqanta cumplinqanyaq manami imatapis üvapita rurashqa kaqtaqa mikunmantsu ni upunmantsu. 5 Nazareo karqa Tayta Diospä santumi kanqa. Tsaymi nazareo kananpä awninqanta cumplinqanyaq aqtsanta rutukunqatsu. 6 Nazareo kaykarqa pï wanuptinpis ayaman ama witipätsuntsu. 7 Maman wanuptinpis, taytan wanuptinpis, wawqin wanuptinpis o panin wanuptinpis impüru mana kananpä ama witipätsuntsu. Tsaynö ama witipätsuntsu Tayta Diospä consagrädu kanqanta cumplir. 8 Nazareo kananpä Tayta Diosta awninqanta cumplinqanyaqmi ollqupis o warmipis consagrädu kanqa.9 “ ‘Juntu kaykäyaptin illaqpita wanuptinqa Tayta Diospä consagranqan aqtsan impürumi kanqa. Tsaymi qanchis junaq päsaskiptin aqtsanta rutukunqa purificakunanpä. 10 Tsaypita puwaq kaq junaqchönami ishkay kullkushta o ishkay pushapa palumata karpis Tinkuna Toldupa patiunman apaykur sacerdötita entreganqa. 11 Sacerdötinami jukta purificatsina sacrificiupä rupatsinqa y jukaqtana rupatsina sacrificiupä rupatsinqa. Tsaynöpami tsay nazareo runa o nazareo warmi püruna kanqa. Aqtsanpis Tayta Diospä yapaymi consagrädu kanqa. 12 Tsaynöllami watayuq carnishta consagratsina sacrificiupä apamur yapay nazareo runa o nazareo warmi kanqa. Itsanqa impüruyayninpami ñöpata nazareo kanqan tiempu imapäpis sirvinqanatsu. Tsaymi nazareo kayta qallaykunanpita yapay cumplinqa awninqan tiempu cumplinqanyaq.
13 “ ‘Nazareo kananpä tiempun cumpliskiptinnami Tinkuna Toldupa patiunman shamunqa. 14 Tsayman shamurmi rupatsina sacrificiupä juk watayuq carnishta, purificatsina sacrificiupä juk watayuq china üshata y alli päsakuy sacrificiupä juk carnëruta apamunqa. Tsay uywakunaqa llapanpis sänumi kayanqa. 15 Tsaynölla allinnin jarinapita levadüraynaq tantata canastawan apamunqa. Tsay tantaqa aceitiwan masarashqami kanqa. Tsay canastamanmi wiñanqa aceitiwan llushipashqa levadüraynaq llapsha tantata, tsaki mikuy ofrendakunata y vïnutapis.
16 “ ‘Tsaykunata chaskiskirmi purificatsina sacrificiuta Tayta Diospa ñöpancho sacerdöti rupatsinqa. Tsaypitanami rupatsina sacrificiutapis rupatsinqa. 17 Nirkurnami alli päsakuy sacrificiupä apayämunqan carnëruta y canastacho levadüraynaq tantakunata Tayta Diospä junishpa joqarkur wakman kayman kuyutsinqa. Tsaynöllami apamunqan tsaki mikuyta y vïnuta altarman wiñapanqa. 18 Tsay hörami nazareo runa aqtsanta Tinkuna Toldupa patiuncho rutukunqa. Tsay consagrädu aqtsatanami alli päsakuy sacrificiu rupaykanqan ninaman jitaykunqa.
19 “ ‘Nirkurmi rutukushqa nazareo runata sacerdöti makyanqa carnërupa palitillan yanushqata. Tsaynöllami canastapita makyanqa levadüraynaq juk tantata y levadüraynaq llapsha tantatapis. 20 Tsaykunata nazareo runapita yapay qoriskirnami Tayta Diospa ñöpancho joqarkur wakman kayman kuyutsinqa. Nirkurnami sagrädu kar sacerdötipä kanqa. Tsaynöllami sacerdötipä kanqa Tayta Diospa ñöpancho wakman kayman kuyutsinqan pëchunwan derëcha kaq chankanpis. Tsaypitaqa nazareo runa vïnuta upunqanami.
21 “ ‘Nazareo runa aypäpakurqa ofrendatapis uywatapis mastami apamunqa. Nazareo kananpä Tayta Diosta awnirqa ley ninqannölla llapantapis cumplinqa’ ”.†
Sacerdötikuna bendisar imata niyänanpä kanqan
22 Moiséstami Tayta Dios nirqan: 23 “Aarónta y tsurinkunata yätsinki Israel runakunata bendisar niyänanpä:
24 “ ‘Bendicionninta Tayta Dios qamkunaman churamur ima peligrupitapis tsapaykuyälläshuy.
25 Tayta Dios alli rikashurniki imaypis kuyapaykuyälläshuy.
26 Tayta Dios kuyapäyäshurniki alli kawayänaykipä yanapaykuyälläshuy’.
27 “Tsaynömi Israel runakunata yanapanäpä sacerdötikuna jutïcho mañakayämanqa. Tsaymi bendicionnïta churamushä”.